“Ndinga ya Nzambi kele ya moyo mpi ya ngolo.”​—BAEB. 4:12, NW.

1. Inki beto fwete sala sambu na kukota na kupema ya Nzambi bubu yai, mpi sambu na nki yo lenda vanda pete na kutuba kansi mpasi na kusala?

 NA DISOLO yina meluta, beto monaka nde beto lenda kota na kupema ya Nzambi kana beto kelemfukila yandi, mpi kesala mambu na kuwakana ti lukanu na yandi. Yo lenda vanda pete na kutuba mpidina, kansi mpasi na kusala yo. Mu mbandu, ntangu beto kelongukaka nde Yehowa kebuyaka dyambu mosi buna ya beto kezolaka, na luyantiku beto lenda buya kulemfukila yandi. Yo kemonisa nde, beto fwete yela sambu na kuvanda ya kuyilama sambu na ‘kulemfuka na Nzambi.’ (Yak. 3:17) Na disolo yai, beto tatubila mwa mambu yina tamonisa luzolo na beto ya kusala mambu na kuwakana ti lukanu ya Nzambi, disongidila kulemfukila yandi na ntima ya mvimba, lenda mekama.

2, 3. Inki bikesa beto fwete sala sambu na kuvanda ntangu yonso mfunu na meso ya Yehowa?

² Keti nge kezolaka kulemfukila bandongisila yina kekatukaka na Biblia? Masonuku kezabisa beto nde, luzolo ya Nzambi kele ya kuvukisa “bima ya mfunu ya makanda yonso.” (Agai 2:7, NW) Ya kyeleka, bantu mingi na kati na beto kuvandaka ve mfunu ntangu beto zabaka kyeleka sambu na mbala ya ntete. Kansi, zola sambu na Nzambi mpi sambu na Mwana na yandi kupusaka beto na kusoba nkadilu mpi bikalulu na beto, sambu na kusepedisa Nzambi na ntima ya mvimba. Nsukansuka, na nima ya kusala bisambu mpi bikesa, kilumbu ya lusakumunu kukwisaka  mpi beto bakaka mbotika.​—Tanga Kolosai 1:9, 10.

³ Kansi ntangu beto bakaka mbotika, mvita yina beto kenwanaka sambu na kukonda kukuka na beto kusukaka ve. Mvita yango kele kaka mpi beto talanda na kunwana tii ntangu kukonda kukuka tamana. Ata mpidina, beto kele ti kivuvu nde, kana beto landa kunwana mpi kele ti lukanu ya kukuma mfunu mingi na meso ya Yehowa, yandi tasakumuna bikesa na beto.

Ntangu Beto Kevandaka na Mfunu ya Bandongisila

4. Tanga mitindu tatu yina beto lenda baka bandongisila ya mekatuka na Masonuku.

⁴ Na ntwala ya kuyidika mambu na beto ya kukonda kukuka, beto fwete zaba ntete mambu yango. Yehowa lenda sadila diskure mosi na Nzo ya Kimfumu to disolo mosi ya kepusa na kuyindula ya mekatuka na mukanda na beto sambu na kumonisa kifu mosi ya nene yina beto kele ti yo. Kansi, kana beto tula ve dikebi na mambu ya mfunu yina diskure ketubila to kubakisa ve nde beto fwete sadila ndongisila yina kele na mukanda mosi, Yehowa lenda sadila mpangi-Mukristu mosi sambu na kumonisa beto kifu yango.​—Tanga Galatia 6:1.

5. Tubila mitindu ya mbi yina beto lenda sala mambu kana bo mepesa beto ndongisila, mpi tendula kikuma yina bankuluntu fwete kwamina na bikesa na bo sambu na kusadisa beto.

⁵ Yo kevandaka ve pete sambu na kundima ndongisila yina mekatuka na muntu ya kukonda kukuka, ata kana yandi mepesa yo na mayele mpi na zola yonso. Kansi, mutindu Galatia 6:1 kemonisa yo, Yehowa ketuma bankuluntu na kumeka kusungika beto, ‘na nzila ya mbote mpi na malembe yonso.’ Kana beto ndima lusadisu na bo, beto takuma mfunu mingi na meso ya Nzambi. Dyambu ya keyitukisa kele nde, ntangu beto kesambaka beto kendimaka na luzolo yonso nde beto kele bantu ya kukonda kukuka. Kansi, ntangu mpangi mosi kezabisaka beto nde beto mesala kifu, mbala mingi beto kesosaka kupesa bikuma yina kupusaka beto na kusala dyambu yango, kefyotunaka bunene ya kifu yango, mpi beto kekudiyulaka bikuma yina kepusa yandi na kupesa beto ndongisila, to beto kebuyaka mutindu yina yandi kepesila beto ndongisila yango. (2 Bant. 5:11) Mpi mbala yankaka beto kewaka makasi, kana ndongisila yango ketadila dyambu mosi yina beto kezolaka ve nde bo tubila yo, mu mbandu nkadilu ya muntu mosi ya dibuta, kulwata na beto, bunkete na beto, to bansaka ya kulutisila ntangu yina beto kezolaka kansi Yehowa kemengaka! Kansi na nima ntangu makasi kemanaka, beto kebakisaka mbala mingi nde ndongisila yina kuvandaka ya mbote mpenza.

6. Inki mutindu Ndinga ya Nzambi kemonisaka “mabanza ti bangindu ya ntima”?

⁶ Verse yina mesimba disolo yai, Baebreo 4:12, keyibusa beto nde Ndinga ya Nzambi ‘kele ti ngolo.’ Ya kyeleka, Ndinga ya Nzambi kele ti ngolo ya kusoba luzingu ya bantu. Kaka mutindu yo vandaka ti ngolo ya kusadisa beto na kusala bansoba yina beto vandaka na yo mfunu sambu beto baka mbotika, yo kele mpi ti ngolo ya kusadisa beto na nima ya kubaka mbotika. Na mukanda yina yandi sonikilaka Bakristu ya Ebreo, Polo kusonikaka mpi nde ndinga ya Nzambi “kekotaka tii na kukabisa moyo ti mpeve, mpi binkoso ti butomfu ya mikwa na yo, mpi yo kele ti ngolo ya kuswasisa mabanza ti bangindu ya ntima.” (Baeb. 4:12, NW) Ngogo “moyo” ketendula kimuntu na beto ya nganda to mutindu yina bantu yankaka kemonaka beto, kansi “mpeve” kele kimuntu na beto ya kati, disongidila mambu yina bantu lenda mona ve. Polo zolaka kutuba nde, ntangu beto kebakisaka mbote-mbote lukanu ya Nzambi sambu na beto, mambu yina beto kesalaka kemonisaka kimuntu na beto ya kati. Na bantangu yankaka, keti luswaswanu kevandaka na mutindu yina bantu yankaka kemonaka beto ti mutindu yina beto kele mpenza na kati? (Tanga Matayo 23:27, 28.) Tadila mutindu yina nge lenda sala mambu kana nge mekutana ti mambu yina melanda.

Landa Kutambula ti Organizasio ya Yehowa

7, 8. (a) Ziku, nki kupusaka Bakristu yankaka ya Bayuda na kulanda kulemfukila mambu yankaka ya Nsiku ya Moize? (b) Sambu na nki beto lenda tuba nde bo vandaka kusala ve mambu na kuwakana ti lukanu ya Yehowa?

⁷ Bantu mingi na kati na beto lenda vutukila kukonda mpasi bangogo yai ya Bingana 4:18: “Nzila ya bantu ya mbote ke tambulaka kele bonso ntangu ntongo ke tana, yo ke kuma mwini na mwini tii kuna ntangu yonso me basika.” Dyambu yai ketendula nde, nkadilu na beto mpi  nzayilu na beto ya balukanu ya Nzambi keyelaka malembe-malembe na bunda ya ntangu.

⁸ Mutindu beto tubilaka yo na disolo yina meluta, na nima ya lufwa ya Yezu yo vandaka mpasi sambu nde, Bakristu mingi ya Bayuda kuyambula kulemfukila Nsiku ya Moize. (Bis. 21:20) Ata Polo kutendulaka pwelele nde, Bakristu kuvandaka dyaka ve na nsi ya Nsiku ya Moize, bankaka kundimaka ve ndongisila na yandi. (Kol. 2:13-15) Ziku, bo yindulaka nde kana bo landa kulemfukila ata mwa ndambu ya mambu ya Nsiku, bantu ya dibundu ya Bayuda zolaka kunyokula bo ve. Kansi, Polo kusonikilaka Bakristu ya Ebreo mpi kuzabisaka bo pwelele nde, bo lendaka ve kukota na kupema ya Nzambi sambu bo buyaka kusala mambu na kuwakana ti lukanu na yandi. a (Baeb. 4:1, 2, 6; tanga Baebreo 4:11.) Sambu Yehowa kundima bo, yo lombaka nde bo ndima nde Yehowa kumaka kutwadisa bantu na yandi sambu na kusambila yandi na mutindu yankaka.

9. Inki beto fwete sala kana nsoba mosi mesalama na mutindu yina beto kebakisaka mambu yankaka ya Masonuku?

⁹ Bubu yai, kele ti bansoba yina kesalama na mutindu yina beto kebakisaka malongi yankaka ya Biblia. Yo fwete yangisa beto ve; kansi yo fwete pusa beto na kutula mpenza ntima na kimvuka ya mpika ya kwikama mpi ya mayele. Ntangu bampangi ya Nto-Kimvuka, yina kele mumonisi ya “mpika” kebakisaka nde bo fwete soba to kusungika mabanza na beto na dilongi mosi buna, bo kevutukaka ve nima sambu na kusala nsoba yango. Kimvuka ya mpika ketulaka dikebi ya mingi na kusala mambu na kuwakana ti lukanu ya Nzambi, na kisika ya kudiyangisa na mambu ya mbi yina bantu yankaka tatuba sambu na nsoba yango. Inki nge tasala kana nsoba mosi mesalama na mutindu yina beto kebakisaka dyambu mosi ya Masonuku?​—Tanga Luka 5:39.

10, 11. Inki malongi beto lenda baka na mutindu yina bampangi yankaka kusalaka, ntangu bansoba ya mpa kusalamaka na yina metala kusamuna nsangu ya mbote?

¹⁰ Bika beto tadila mbandu yankaka. Na kiteso ya bamvula nkama yina meluta, balongoki yankaka ya Biblia yina vandaka kusala badiskure mbote mpenza kuyindulaka nde kusala badiskure kuvandaka mutindu ya kuluta mbote ya kusala kisalu ya kusamuna. Bo vandaka kusepela na kutuba na ntwala ya bantu, mpi bankaka na kati na bo vandaka kusepela mingi ntangu bantu vandaka kukumisa bo sambu na badiskure na bo. Kansi na nima, yo monanaka nde Yehowa kuzolaka nde bantu na yandi kusuka kaka ve na kusala badiskure, kansi bo vukana na mitindu ya kuswaswana ya kisalu ya kusamuna, mu mbandu kusamuna nzo na nzo. Bampangi yankaka yina vandaka kusala badiskure mbote kubuyaka dibanza yina ya mpa. Na badiskure na bo, bo vandaka kumonisa nde bo vandaka mpenza bantu ya kimpeve, mpi ya mekudipesaka ya mvimba na Yehowa. Kansi, ntangu lukanu ya Nzambi sambu na kisalu ya kusamuna kuzabanaka pwelele, mabanza, lukanu, mpi mpusa na bo ya kyeleka kumonanaka pwelele. Inki mutindu Yehowa kutadilaka bo? Yandi sakumunaka bo ve. Bo yambulaka organizasio na yandi.​—Mat. 10:1-6; Bis. 5:42; 20:20.

¹¹ Yo ketendula ve nde, yo vandaka pete sambu na bampangi yonso yina kubikalaka ya kwikama na organizasio na kusamuna nzo na nzo. Bampangi mingi vandaka kumona yo mpasi, mingi-mingi na luyantiku. Kansi, bo lemfukaka. Na nima, bo nungaka bampasi na bo, mpi Yehowa kusakumunaka bo mingi. Inki nge kesalaka ntangu bo kelombaka nge na kusamuna na mitindu yankaka ya kisalu ya kusamuna yina nge mesalaka ntete ve? Keti nge kevandaka ti luzolo ya kumeka dyambu mosi ya mpa?

Ntangu Muntu Yina Beto Kezolaka Meyambula Yehowa

12, 13. (a) Sambu na nki Yehowa kelombaka nde bo basisa na dibundu muntu mosi yina mebalula ve ntima? (b) Inki kumekama bibuti yankaka ya Bakristu kekutanaka ti yo, mpi sambu na nki yo kele mpasi?

¹² Ntembe kele ve nde beto yonso kendimaka munsiku yina ketubaka nde, sambu na kusepedisa Nzambi beto fwete vanda bunkete na nitu, na mabanza, mpi na kimpeve. (Tanga Tito 2:14.) Kansi, bantangu yankaka yo lenda vanda mpasi na kulemfuka na dyambu yai ya kele na kuwakana ti lukanu ya Nzambi. Mu mbandu, yindula  nde bankwelani mosi ya Bakristu ya kepesaka mbandu ya mbote kele kaka ti mwana-mosi ya bakala mpi mwana yango meyambula kyeleka. Sambu leke yango mepona ‘kuzinga na kiese ya ntangu fioti yina kekatukaka na masumu,’ na kisika ya kuvanda ti bangwisana ya mbote ti Yehowa mpi bibuti na yandi yina ketinaka Nzambi boma, bo mebasisa yandi na dibundu.​—Baeb. 11:25.

¹³ Bibuti na yandi mewa mpasi mpenza! Bo mezaba nde sambu na yina metala kubasisama ya muntu na dibundu, Biblia ketubaka nde “beno lenda vukana ve ti muntu yina ke tubaka nde yandi kele mukristo, kansi yandi ke salaka pite, to yandi ke vandaka na nzala ya kuvanda na konso kima yina, to yandi ke sambaka biteki, to ke fingaka bantu ya nkaka, to ke laukaka malafu, to ke yibaka. Beno dia mpi ve kisika mosi ti muntu ya mutindu yina.” (1 Kor. 5:11, 13) Bo mezaba mpi nde bangogo “muntu yina” ketadila mpi bantu ya dibuta yina kezingaka ve nzo mosi ti bo. Kansi, bo kezolaka mwana na bo mingi mpenza! Zola ya ngolo yina bo kele na yo sambu na mwana na bo lenda pusa bo na kudiyula nde: ‘Inki mutindu beto lenda sadisa mwana na beto na kuvutukila Yehowa kana beto yambula kuvukana ti yandi? Keti beto tasadisa yandi ve na kuvutuka kana beto kesolula ti yandi mbala na mbala?’ b

14, 15. Bibuti ya bana yina bo mebasisaka na dibundu fwete baka nki lukanu?

¹⁴ Beto kewila bibuti yina kenyokwama mawa. Mwana na bo kusalaka nsola mpi yandi ponaka kulanda luzingu ya mbi na kisika ya kuvanda ti bangwisana ya mbote ti bibuti na yandi mpi bampangi yankaka ya Bakristu. Kansi, bibuti vandaka na dyambu ya kutuba ve na nsola yina mwana na bo kusalaka. Ntembe kele ve nde, bo kele na mpasi ya ngolo mpenza!

¹⁵ Kansi, bibuti yai ya zola tasala nki? Keti bo talemfuka na lutwadisu ya Yehowa ya pwelele? To bo tayindula nde bo lenda landa kuvanda ti bangwisana na mwana na bo yina bo basisaka na dibundu, mpi kusolula ti yandi “mambu ya mfunu ya dibuta”? Ntangu bo kebaka lukanu, bo fwete vila ve na kutadila mawi ya Yehowa na mambu yina bo kesala. Lukanu na yandi kele ya kutanina bunkete ya organizasio na yandi mpi kana mpila kele, kupusa bantu yina kusalaka mbi na kuvutukila mabanza ya mbote. Inki mutindu bibuti-Bakristu lenda monisa nde bo kele ti mawi ya kiteso mosi ti Yehowa?

16, 17. Inki dilongi beto lenda baka na mbandu ya Aroni?

¹⁶ Aroni, mpangi ya Moize, kukutanaka ti dyambu ya mutindu mosi na mambu yina bana na yandi zole ya babakala kusalaka. Yindula mutindu yandi waka ntangu bana na yandi Nadabi ti Ahibu, kupesaka Yehowa kimenga mutindu Nsiku vandaka kulomba ve mpi Yehowa kufwaka bo. Ya kyeleka, dyambu yai kuzengaka bangwisana ya mbote yina bo vandaka ti yo na bibuti na bo. Kansi, kele ti dyambu yankaka ya kuluta mpasi. Yehowa kuzabisaka Aroni mpi bana na yandi yina kuvandaka ya kwikama nde: “Beno kangula ve nsuki na beno na kubika yo kisakasaka, beno pasula-pasula mpi ve bilele na beno sambu na mafwa, kana ve lufwa ta bwila beno, [Yehowa] mpi ta wila bantu yonso ya Israele makasi.” (Levi 10:1-6) Dilongi kele pwelele. Zola na  beto sambu na Yehowa fwete vanda ngolo kuluta zola yina beto kemonisaka na bampangi na beto ya dibuta ya mekonda kwikama.

¹⁷ Bubu yai, Yehowa kefwaka ve na mbala mosi bantu yina kelemfukilaka ve bansiku na yandi. Na zola yonso, yandi kepesaka bo dibaku ya kubalula ntima na bisalu na bo ya mbi. Kansi, inki mutindu Yehowa kewaka ntangu bibuti ya mwana mosi yina mebalula ve ntima kelanda kutula Yehowa na kumekama ntangu bo kelandaka kuvanda ti bangwisana na mwana na bo yina bo basisaka na dibundu?

18, 19. Inki balusakumunu kevingila mabuta yina kesalaka mambu na kuwakana ti ntuma ya Yehowa ya ketadila kubasisama ya muntu na dibundu?

¹⁸ Bantu mingi yina bo basisaka na dibundu ketubaka nde, lukanu ya ngolo yina banduku na bo mpi ya bantu ya dibuta na bo kuvandaka na yo kusadisaka bo na kuvutukila mabanza ya mbote. Mu mbandu, mpangi-nkento mosi kuzabisaka bankuluntu nde kima yina kupusaka yandi na kusoba luzingu na yandi, kuvandaka mutindu mpangi na yandi ya bakala kusalaka mambu. Yandi vandaka ya kwikama na Yehowa mpi kulemfukaka na ntuma ya Yehowa ntangu bo basisaka mpangi na yandi ya nkento na dibundu. Yo pusaka mpangi na yandi ya nkento na kusosa kuvutuka na dibundu.

¹⁹ Ntangu yai, nki beto fwete sala? Beto fwete nwanisa mpusa ya ntima na beto ya kukonda kukuka yina kepusaka beto na kubuya kulemfuka na bandongisila yina kekatukaka na Masonuku. Beto fwete ndima na ntima ya mvimba nde, mutindu yina Nzambi kesadilaka beto mambu kevandaka ntangu yonso mbote.

“Ndinga ya Nzambi Kele ya Moyo”

20. Inki kele mitindu zole yina beto lenda sadila Baebreo 4:12? (Tala noti na nsi ya lutiti.)

²⁰ Ntangu Polo kusonikaka nde “Ndinga ya Nzambi kele ya moyo,” yandi vandaka kutubila kaka ve Ndinga ya Nzambi ya kusonika, disongidila Biblia. c Baverse yankaka ya kapu yina kemonisa nde yandi vandaka kutubila mpi balusilu ya Nzambi. Polo vandaka kutuba nde, Nzambi kesalaka ve lusilu mosi mpi na nima kuvila yo. Yehowa kutubilaka yo na nzila ya profete Yezaya na kutubaka nde: ‘Mambu yina mono ketubaka kevutukaka ve mpamba na mono kana yo me sala ve luzolo na mono, mpi kana yo me lungisa ve bangindu na mono.’ (Yez. 55:10, 11) Yo yina, beto fwete vanda ntima-nda ntangu mambu kesalama ve mutindu beto zodilaka yo. Yehowa ‘kelanda kusala’ sambu na kulungisa mbote-mbote lukanu na yandi.​—Yoa. 5:17.

21. Inki mutindu Baebreo 4:12, lenda pesa kikesa na bampangi ya bambuta mpi ya kwikama ya ‘kibuka ya nene’?

²¹ Bampangi ya bambuta mpi ya kwikama ya ‘kibuka ya nene’ mesadilaka Yehowa tuka bamvula mingi. (Kus. 7:9) Bamingi na kati na bo kuyindulaka ve nde bo tanuna na ngidika yai ya bima. Ata mpidina, bo melembaka ve nitu. (Nk. 92:14) Bo kebakisaka nde balusilu ya Nzambi kele ve mambu ya luvunu, kansi ya kyeleka, mpi Yehowa kesalaka mambu sambu na kulungisa yo. Sambu lukanu ya Nzambi kele mfunu mingi sambu na yandi, beto kepesaka yandi kyese ntangu beto ketulaka lukanu yango na kisika ya ntete. Na kilumbu ya nsambwadi, Yehowa kupemaka, sambu yandi zabaka nde lukanu na yandi talungana mpi bantu na yandi yonso tasala mambu na kuwakana ti kulungana na yo. Ebuna nge? Keti nge mekotaka na kupema ya Nzambi?

[Banoti na nsi ya lutiti]

Kuvila Ve Lukanu na Yo

• Beto fwete sala nki sambu na kukota na kupema ya Nzambi bubu yai?

• Inki kuwakana kele na kati ya lukanu ya Nzambi mpi luzolo na beto ya kundima bandongisila ya Masonuku?

• Na nki mambu yo lenda vanda mpasi na kulemfuka na lutwadisu ya Masonuku, kansi sambu na nki yo kele mfunu nde beto lemfuka?

• Inki kele mitindu zole yina beto lenda sadila Baebreo 4:12?

[Bangyufula ya disolo ya kulonguka]

[Kifwanisu ya kele na lutiti 31]

Bibuti mewa mpasi mingi!