Nani Fwete Longa Bana Mambu ya Nzambi?

‘Mwana-kalasi meluta longi na yandi ve, kansi konso mwana-kalasi yina melonguka mbote-mbote, tavanda bonso longi na yandi.’​—LUKA 6:40.

BIBUTI yankaka kemonaka nde bo mefwana ve na kulonga bana na bo mambu ya Nzambi. Bo lenda yindula nde bo melongukaka mingi ve to kezabaka ve mambu mingi ya dibundu sambu na kuvanda balongi ya mbote. Yo yina, yo lenda pusa bo na kuyambula mukumba yai ya mfunu na muntu mosi ya dibuta to na ntwadisi mosi ya dibundu.

Kansi, nani mpenza kele ti kiyeka ya kulonga bana mambu ya Nzambi mpi minsiku ya bikalulu ya mbote? Beto tadila mambu yina Biblia ketuba na dyambu yai, mpi beto fwanisa yo ti mambu yina bantu ya kesalaka bansosa memonaka.

Inki Kele Mukumba ya Tata?

Mambu yina Biblia kelongaka: ‘Batata, beno pesa bana na beno makasi ve, kansi beno sansa bo na malongi mpi bantuma ya Mfumu.’​—Efezo 6:4, “Holman Christian Standard Bible.”

Mambu yina bantu ya kesalaka bansosa memonaka: Inki mambote bibuti kebakaka ntangu bo kelongukaka mambu ya Nzambi? Disolo mosi (Fathers’ Religious Involvement and Early Childhood Behavior) yina kubasikaka na mvu 2009, kutubaka nde: “Kuvanda na kimvuka yina kevandaka ti balukwikilu ya kiteso mosi lenda sadisa babakala na kukuma batata ya mbote. Dibundu kesadisaka, ketaninaka, keyalaka, mpi kepesaka bantu malongi  mpi lutwadisu na mutindu ya kutwadisa luzingu na bo.”

Biblia kebakaka na mbalu mukumba yina tata kele ti yo ya kusansa mpi kulonga bana. (Bingana 4:1; Kolosai 3:21; Baebreo 12:9) Kansi, keti ndongisila yai kele mfunu bubu yai? Na mvu 2009 iniversite ya Floride kubasisaka disolo mosi yina kutubilaka bupusi yina bibuti kevandaka ti yo na zulu ya bana na bo. Bantu yina kesalaka bansosa memonaka nde bana yina batata na bo kudipesaka mingi na kusansa bo, kekuditulaka na kisika ya bankaka kukonda mpasi mpi kevandaka ti nkandilu ya mbote ya kudimona ve mpamba. Bana-babakala kesalaka mpenza ve mambu ya mbi mpi bana-bankento kevandaka ti mabanza ya mbote. Ya kyeleka, ndongisila yai ya Biblia kele mfunu tii bubu yai.

Inki Kele Mukumba ya Mama?

Mambu yina Biblia kelongaka: “Kubuya ve mambu ya mama na nge ke tubaka.”​—Bingana 1:8.

Mambu yina bantu ya kesalaka bansosa memonaka: Na mvu 2006 mukanda mosi (Handbook of Child Psychology) kutubaka nde: “Bamama kelutisaka ntangu kiteso ya 65 to 80 na kati ya nkama kuluta batata na kusolulaka ti bana na bo ya fyoti, mpi dyambu yai kesalamaka na bansi mingi.” Sambu bamama kelutisaka ntangu mingi ti bana na bo, bangogo, bisalu mpi bikalulu na bo kevandaka ti bupusi ya ngolo na kuyela ya mwana.

Ntangu mama ti tata kesalaka kumosi sambu na kulonga bana na bo kyeleka ya Nzambi, bo kepesaka bana na bo makabu zole ya mbalu. Ya ntete, bana kebakaka dibaku ya kusala bangwisana ya mbote ti Tata na bo ya zulu, bangwisana yina lenda natila bo mambote na luzingu na bo ya mvimba. Ya zole, bana kelongukaka na mbandu ya bibuti na bo mutindu bakala mpi nkento fwete sala kumosi sambu na kulungisa balukanu ya mfunu. (Kolosai 3:18-20) Ata bantu yankaka lenda sadisa tata ti mama na kulonga bana, yo kele mukumba ya bibuti ya kulonga bana na bo mambu ya Nzambi mpi mutindu yandi kezolaka nde dibuta kutwadisama.

Kansi, inki mutindu bibuti fwete longa bana na bo? Inki kele mutindu ya kuluta mbote?