Lusadisu Sambu na ‘Bantu Yonso Yina Kele na Mafwa’

‘Mpeve ya Nzambi kele na mono sambu Mfumu Nzambi mesola mono na kupesa lusadisu na bantu yonso yina kele na mafwa.’​—YEZ. 61:1, 2.

1. Inki Yezu kusalaka sambu na bantu yina vandaka na mafwa mpi sambu na nki?

YEZU KRISTU kutubaka nde: ‘Madia na mono kele kusala luzolo ya muntu yina tindaka mono ti kumanisa kisalu yina yandi pesaka mono.’ (Yoa. 4:34) Ntangu Yezu vandaka kulungisa kisalu yina Nzambi kupesaka yandi, yandi vandaka kumonisa bikalulu ya kitoko ya Tata na yandi. Mosi na yo kele zola ya mingi yina Yehowa kevandaka ti yo sambu na bantu. (1 Yoa. 4:7-10) Ntumwa Polo kutubilaka mutindu mosi yina Yehowa kumonisaka zola yango ntangu yandi bingaka yandi, ‘Nzambi yina kepesaka lusadisu.’ (2 Kor. 1:3) Yezu kumonisaka zola ya mutindu mosi ntangu yandi salaka mambu yina mbikudulu ya Yezaya kutubilaka na ntwala. (Tanga Yezaya 61:1, 2.) Yezu kutangaka mbikudulu yango na sinagoga ya Nazareti mpi kutubaka nde mambu yango kulunganaka na yandi. (Luka 4:16-21) Na nsungi ya kisalu na yandi, Yezu kupesaka lusadisu na bantu yina vandaka na mafwa, mpi yandi pesaka bo kikesa mpi ngemba ya mabanza.

2, 3. Sambu na nki balongoki ya Kristu fwete landa mbandu na yandi na kupesaka bankaka lusadisu?

² Balongoki yonso ya Yezu fwete landa mbandu na yandi na kupesaka lusadisu na bantu yina ke na mafwa. (1 Kor. 11:1) Polo kutubaka  nde: “Beno pesana kikesa, beno sadisana beno na beno.” (1 Tes. 5:11) Sambu beto kezinga ‘na bilumbu ya nsuka mpi ya mpasi mingi’ yo kele mpenza mfunu nde, beto sadisa bantu yankaka. (2 Tim. 3:1) Konso kilumbu, bantu ya masonga kezinga kumosi ti bantu yina ketubaka mpi kesalaka mambu yina kepesaka bankaka mpasi mpi mawa.

³ Mutindu mbikudulu ya Biblia kubikulaka yo, na bilumbu ya nsuka ya ngidika ya bima yai ya mbi, bantu mingi ‘kezolaka ve bantu yankaka, kezolaka kaka mbongo; kele lulendo mingi; kevwenzaka Nzambi, kelemfukilaka ve batata mpi bamama na bo; kezabaka ve kupesa mersi; kezitisaka ve mambu ya Nzambi; kele nku mingi, kezingaka kaka na kimbeni, kekumaka songi-songi, kewaka makasi nswalu, kepesaka bantu yankaka mpasi, kezolaka ve mambu ya mbote; kezolaka kuteka bantu yankaka; kesalaka mambu kukonda kuyindula; ntima na bo mefulukaka na lulendo; kezolaka kiese ya nsi-ntoto, kansi Nzambi ve.’ Bikalulu ya mutindu yai kekuma kaka mingi, sambu ‘bantu ya mbi mpi bantu ya luvunu kesala mambu mingi ya mbi.’​—2 Tim. 3:2-4, 13.

4. Inki mambu kesalama na nsi-ntoto na bilumbu na beto?

⁴ Mambu yai yonso fwete yitukisa beto ve, sambu Ndinga ya Nzambi ketuba pwelele nde ‘nsi-ntoto ya mvimba kele na maboko ya muntu ya mbi.’ (1 Yoa. 5:19) ‘Nsi-ntoto ya mvimba’ ketendula mambu ya politiki, ya dibundu, mumbongo yika mpi banzila yankaka yina Satana kesadilaka sambu na kuyalumuna bangindu na yandi. Yo yina, Biblia kebingaka Satana Dyabulu “mfumu ya nsi-ntoto” mpi “nzambi ya ntangu yai.” (Yoa. 14:30; 2 Kor. 4:4) Mambu na nsi-ntoto kelanda na kubeba sambu ntangu yai Satana kele ti makasi ya mingi, mpi yandi kezaba nde yandi mebikala kaka ti mwa ntangu fyoti na ntwala nde Yehowa kufwa yandi. (Kus. 12:12) Yo kepesa beto kikesa mpenza na kuzaba nde, kubika fyoti Nzambi tatula nsuka na Satana, na ngidika na yandi ya mbi mpi na ntembe yina yandi basisaka na kilanga ya Edeni na yina metala luyalu ya Yehowa!​—Kuy., kapu 3; Yobi, kapu 2.

Nsangu ya Mbote Kelongama na Nsi-Ntoto ya Mvimba

5. Inki mutindu mbikudulu ya metala kisalu ya kusamuna kelungana na bilumbu yai ya nsuka?

⁵ Na nsungi yai ya mpasi, dyambu yina Yezu kubikulaka ke na kulungana. Yandi tubaka nde: “Bo ta longaka nsangu yai ya mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” (Mat. 24:14) Kisalu ya kusamuna nsangu ya Kimfumu ya Nzambi na nsi-ntoto ya mvimba kesalama na mutindu yina yo mesalamaka ntete ve. Bubu yai na nsi-ntoto ya mvimba, Bambangi ya Yehowa kuluta 7 500 000 na mabundu kuluta 107 000 kesamuna nsangu ya Kimfumu ya Nzambi, Yezu mpi kusamunaka mpi kulongaka Kimfumu ya Nzambi. (Mat. 4:17) Na nzila ya kisalu yango, beto kepesa lusadisu ya mingi na bantu yina ke na mafwa. Kaka na bamvula zole yai meluta, bantu  570 601 kubakaka mbotika mpi kukumaka Bambangi ya Yehowa!

6. Inki kele dibanza na nge na kuyela ya kisalu na beto ya kusamuna?

⁶ Bunene ya kisalu yai ya kusamuna lenda monana bubu yai, na mutindu Bambangi ya Yehowa kebalula mpi kekabula mikanda yina ketendulaka Biblia na bandinga kuluta 500. Dyambu ya mutindu yai mesalamaka ntete ve ata fyoti na disolo ya luzingu ya bantu! Mutindu kitini ya organizasio ya Yehowa yina kele awa na nsi-ntoto kesala kisalu na yo mpi kelanda kuyela, kele mpenza dyambu ya kuyituka. Kukonda lutwadisu mpi lusadisu ya mpeve santu ya Nzambi, dyambu ya mutindu yai lendaka kusalama ve na nsi-ntoto yai ya Satana keyala. Sambu nsangu ya mbote kelongama bubu yai na nsi-ntoto ya mvimba, bampangi na beto kaka ve kebaka lusadisu yina Masonuku kepesaka kansi mpi bantu yina ke na mafwa ya kendima nsangu ya Kimfumu.

Pesa Bampangi Lusadisu

7. (a) Sambu na nki beto fwete vingila ve nde Yehowa kukatula bampasi yonso bubu yai? (b) Inki mutindu beto mezaba nde beto lenda kanga-ntima na bampasi mpi mbangika?

⁷ Na nsi-ntoto yai ya mefuluka ti mambu ya mbi mpi ya mpasi, beto kezaba nde beto takutana ti mambu yina tapesa beto mpasi. Na ntwala nde Nzambi kufwa ngidika ya bima yai, beto fwete vingila ve nde yandi kukatula mambu yonso yina kepesaka beto mpasi. Kansi bubu yai, ntangu beto kekanga-ntima na mbangika, kwikama na beto na Yehowa kemonisa nde beto kepesaka maboko na luyalu na yandi. (2 Tim. 3:12) Kansi, sambu Tata na beto ya zulu kepesaka beto lusadisu mpi kikesa, beto lenda vanda bonso Bakristu bapakulami ya Tesalonika, yina kunungaka mbangika ti kukanga-ntima mpi lukwikilu.​—Tanga 2 Tesalonika 1:3-5.

8. Inki mutindu Masonuku kendimisa nde Yehowa kepesaka bansadi na yandi lusadisu?

⁸ Ntembe kele ve nde, Yehowa kepesaka bansadi na yandi lusadisu yina bo kevandaka ti yo mfunu. Mu mbandu, mbikudi Elia kuwaka boma mpi kutinaka ntangu ntotila-nkento Yezabele zolaka kufwa yandi. Nkutu Elia kutubaka nde, yandi vandaka na mfunu ya lufwa. Kansi, na kisika ya kunganina Elia, Yehowa kupesaka yandi lusadisu mpi kikesa sambu yandi landa kusala kisalu na yandi ya kiprofete. (1 Bant. 19:1-21) Mutindu Yehowa kusadisaka Bakristu ya dibundu ya mvu-nkama ya ntete kemonisa mpi nde, yandi kepesaka lusadisu na bansadi na yandi. Mu mbandu, Biblia ketuba nde na ntangu mosi buna “bantu ya dibundu ya Yudea yonso, ya Galilea yonso ti ya Samaria yonso, bo vandaka kuzinga na ngemba. Yo yina dibundu vandaka kukuma ngolo.” Dyaka, sambu dibundu ‘vandaka kuzitisa Mfumu, bantu kukumaka mingi na lusadisu ya mpeve ya Nzambi.’ (Bis. 9:31) Beto mpi kele na ntonda ya mingi na mutindu beto kebakaka ‘lusadisu yina mpeve ya Nzambi kepesaka’!

9. Sambu na nki kulonguka mbandu ya Yezu lenda pesa beto lusadisu?

⁹ Sambu beto kele Bakristu, beto kebakaka lusadisu na kulongukaka mambu ya metala Yezu Kristu mpi na kulandaka mbandu na yandi. Yezu kutubaka nde: “Beno kwisa na mono, beno yonso bantu yina me lemba, sambu beno ke nata kilo ya nene, ebuna mono ta pesa beno ntangu ya kupema. Beno baka kilo na mono, beno nata yo; beno vanda balonguki na mono, sambu mono kele muntu ya pima, mono kele muntu ya ntima ya mbote; ebuna beno ta zaba kupema. Kilo yina ya mono ta pesa beno yo kele mpasi ve na kunata yo, sambu yo kele kilo mingi ve.” (Mat. 11:28-30) Kulonguka mutindu ya mbote yina Yezu vandaka kusadila bantu mambu mpi kulanda mbandu na yandi ya mbote, kele lusadisu ya ngolo sambu na bampasi yina beto lenda kutana ti yo.

10, 11. Na kati ya dibundu, nani lenda pesa bankaka lusadisu?

¹⁰ Beto lenda baka mpi lusadisu na bampangi na beto Bakristu. Mu mbandu, yindula mutindu bankuluntu kepesaka lusadisu na bampangi yina kekutanaka ti bampasi ya ngolo. Longoki Yakobo kusonikaka nde: “Kana muntu mosi na kati na beno ke na maladi [ya kimpeve], yandi binga bambuta ya dibundu; bo ta samba Nzambi sambu na yandi.” Lusadisu na bo tabasisa nki mbutu? “Bisambu yina ya bo ta samba ti  lukwikilu, yo ta belula muntu yina ya maladi, ebuna Mfumu Nzambi ta vutula ngolo na nitu na yandi, yandi ta lolula yandi mpi sambu na masumu ya yandi salaka.” (Yak. 5:14, 15) Katula bankuluntu, bampangi yankaka mpi na dibundu lenda pesa bankaka lusadisu.

¹¹ Mbala mingi, yo kevandaka pete sambu bankento kuzabisa bampangi na bo bankento mambu yina kepesaka bo mpasi. Mingi-mingi bampangi-bankento ya bambuta mpi ya kezabaka mambu mingi, kepesaka bandongisila ya mbote na bampangi-bankento ya baleke. Ziku, bo mosi mpi mekutanaka ti mambu ya mutindu mosi na luzingu na bo. Sambu bo kekuditulaka na kisika ya bankaka mpi kevandaka ti bikalulu ya bunkento, bo lenda pesa bampangi-bankento ya baleke lusadisu ya mingi. (Tanga Tito 2:3-5.) Ya kyeleka, bankuluntu mpi bampangi yankaka fwete “pesa kikesa na bantu yina ke na ntima ya petepete.” (1 Tes. 5:14, 15) Mpi yo kele mbote na kuyibuka nde, Nzambi “ke sadisaka beto na bampasi na beto ya mutindu na mutindu na mpila nde beto mpi lenda sadisa bantu ya nkaka na bampasi na bo ya mutindu na mutindu.”​—2 Kor. 1:4.

12. Sambu na nki yo kele mfunu nde beto kwendaka na balukutakanu ya Bukristu?

¹² Mutindu ya mbote ya kubaka lusadisu kele ya kukwenda na balukutakanu ya dibundu, kisika beto kewaka malongi ya Biblia yina kepesaka beto kikesa. Biblia ketuba nde, Yude ti Silasi vandaka kusala masolo yina ‘vandaka kupesa bampangi kikesa mpi ngolo.’ (Bis. 15:32) Na ntwala mpi na nima ya balukutakanu na beto, bampangi kesolulaka mambu yina kepesaka kikesa. Yo yina, ata beto kenyokwama na dyambu mosi buna, bika beto yambula ve ata fyoti bampangi na beto, sambu kusala mpidina tayidika ve mambu. (Bing. 18:1) Kansi, yo tavanda mbote na kusadila ndongisila yai ya ntumwa Polo: “Beto talanaka beto na beto sambu na kupusana na zola mpi na bisalu ya mbote, kukonda kuyambula lukutakanu na beto, bonso bantu yankaka kesalaka yo, kansi beto pesana kikesa bamosi ti bankaka, mpi kuluta mingi mutindu beno kemona kilumbu yango kefinama.”​—Baeb. 10:24, 25, NW.

Baka Lusadisu na Ndinga ya Nzambi

13, 14. Monisa mutindu Masonuku lenda pesa beto lusadisu.

¹³ Yo vanda beto mebakaka mbotika to meyantika kulonguka ntama mingi ve mambu ya Nzambi mpi balukanu na yandi, beto lenda baka lusadisu na Ndinga ya Nzambi. Polo kusonikaka nde: “Mambu yonso ya bo sonikaka na mukanda ya Nzambi, bo sonikaka yo sambu na kulonga beto na mpila nde beto kukanga ntima, beto kuvanda na kikesa na kuvingila mambu yina ya Nzambi silaka beto.” (Roma 15:4) Biblia lenda pesa beto lusadisu mpi kukumisa beto ‘bantu ya kukuka, ya kele ti makuki ya kusala konso kisalu ya mbote.’ (2 Tim. 3:16, 17) Kuzaba kyeleka ya lukanu ya Nzambi mpi kuvanda ti kivuvu ya kyeleka sambu na makwisa tapesa beto lusadisu ya mingi mpenza. Yo yina, bika beto tangaka  Ndinga ya Nzambi mpi mikanda yina ketendulaka Biblia sambu yo pesa beto kikesa mpi lusadisu na mambu mingi.

¹⁴ Yezu kubikilaka beto mbandu ya mbote na yina metala kusadila Masonuku sambu na kulonga mpi kupesa bankaka lusadisu. Mu mbandu, na nima ya lufutumuku na yandi, Yezu kumonanaka na balongoki na yandi zole mpi ‘kutendudilaka bo mambu yina vandaka na mukanda ya Nzambi.’ Ntangu yandi vandaka kusolula ti bo, mambu yina kusimbaka ntima na bo. (Luka 24:32) Ntumwa Polo kulandaka mbandu na yandi mpi kuyindulaka ti bantu na nsadisa ya Masonuku. Na Berea, bawi na yandi “ndimaka nsangu ya Nzambi na luzolo yonso. Konso kilumbu bo vandaka kuzikisa mbote-mbote na mukanda ya Nzambi.” (Bis. 17:2, 10, 11) Yo mefwana mpenza nde, beto tanga Biblia konso kilumbu, kubakila yo mambote mpi kutanga mikanda na beto ya Bukristu ya mesalamaka sambu na kupesa beto lusadisu mpi kivuvu na bantangu yai ya mpasi!

Mitindu Yankaka ya Kupesa Lusadisu

15, 16. Tanga mwa mambu yina beto lenda sala sambu na kupesa lusadisu mpi kikesa na bampangi na beto.

¹⁵ Beto lenda pesa bampangi na beto lusadisu na mitindu mingi. Mu mbandu, beto lenda sadisa mpangi mosi ya mbuta to ya kebela na kusumba bima. Beto lenda pesa mpi bankaka lusadisu na bisalu ya nzo mpidina yo tamonisa nde, beto ketudilaka bo dikebi. (Filp. 2:4) Ziku, beto lenda sikisa bampangi na beto sambu na bikalulu na bo ya mbote, mu mbandu zola, kikesa mpi lukwikilu.

¹⁶ Sambu na kusadisa bampangi ya minunu, beto lenda kwenda kutala bo mpi kuwidikila bo na dikebi yonso ntangu bo kezabisa beto mambu yina bo mekutanaka ti yo mpi balusakumunu yina bo mebakaka na kisalu ya Yehowa. Yo lenda pesa beto mpi lusadisu ti kikesa! Beto lenda tanga Biblia to mikanda yina ketendulaka Biblia kumosi ti bampangi yina beto mekwenda kutala. Ziku, beto lenda yidika ti bo Kulonguka ya Nzozulu ya Nkengi to malongi yina beto tatadila na Kulonguka ya Biblia ya Dibundu na mposo yina. Beto lenda tala kumosi ti bo DVD ya ketubila ntu-dyambu mosi ya Masonuku. Dyaka, beto lenda tangila bo to kutela bo masolo ya kepesa kikesa ya kele na mikanda na beto.

17, 18. Sambu beto kele bansadi ya kwikama ya Yehowa, sambu na nki beto lenda ndima nde yandi tapesa beto kikesa mpi lusadisu?

¹⁷ Kana beto mebakisa nde mpangi mosi kele na mfunu ya lusadisu, beto lenda tanga zina na yandi na bisambu na beto ya kingenga. (Roma 15:30; Kol. 4:12) Ntangu beto kenyokwama na bampasi ya luzingu mpi kesala bikesa sambu na kupesa bankaka lusadisu, beto lenda vanda ti lukwikilu mpi kivuvu bonso ya muyimbi-bankunga yina kuyimbaka nde: “Bikila Mfumu Nzambi kilo na nge, yandi ta sadisa nge; yandi ta bika ve muntu ya mbote bo bwisa yandi.” (Nk. 55:23) Ya kyeleka, Yehowa tavanda ntangu yonso penepene na beto sambu na kupesa beto lusadisu mpi kikesa sambu beto kele bansadi na yandi ya kwikama.

¹⁸ Nzambi kuzabisaka bansadi na yandi ya ntangu ya ntama nde: “Mono, muntu [ta] pesa beno kikesa.” (Yez. 51:12) Yehowa tasala kiteso mosi sambu na beto mpi tasakumuna bangogo mpi bisalu ya mbote yina beto kesala sambu na kupesa lusadisu na bantu yina ke na mafwa. Yo vanda beto kele ti kivuvu ya kuzinga na zulu to na ntoto, beto yonso lenda baka kikesa na bangogo yina Polo kuzabisaka bampangi na yandi Bakristu bapakulami nde: “Mfumu na beto Yesu Kristo yandi mosi ti Tata na beto Nzambi bo pesa kikesa mingi na ntima na beno, bo pesa beno ngolo ya kusala mambu ya mbote ti ya kutuba mambu ya mbote.”​—2 Tes. 2:16, 17.

Keti Nge Keyibuka?

• Kisalu na beto ya kupesa bankaka lusadisu meyalumukaka tii na wapi?

• Tanga mwa mambu yina beto lenda sala sambu na kupesa bankaka lusadisu.

• Inki mutindu Masonuku kendimisa nde, Yehowa kepesaka bantu na yandi lusadisu?

[Bangyufula ya disolo ya kulonguka]

[Kifwanisu ya kele na lutiti 26]

Keti nge mpi kepesaka lusadisu na bantu yina ke na mafwa?

[Kifwanisu ya kele na lutiti 28]

Baleke mpi bambuta lenda pesana kikesa