Kwenda Penepene na Nzambi

“Mfumu Nzambi, . . . Nge Me Zaba Mono”

“DYAMBU yina lenda pesa muntu mpasi kele ya kuzaba nde, ata muntu mosi ve kekudibanzaka sambu na yandi to kebakisaka yandi.” * Keti nge mpi kekudiwaka mpidina? Keti nge mekudiwaka ntete ve nde, ata muntu mosi ve kekudibanza sambu na nge to kebakisa bampasi na nge? Kana yo kele mpidina, nge lenda baka kikesa na dyambu yai: Yehowa kekudibanzaka sambu na bansambidi na yandi mpi ketulaka dikebi na mambu yonso yina bo kekutanaka ti yo na luzingu na bo ya konso kilumbu. Bangogo ya Davidi yina kele na Nkunga 139 kendimisa beto nde, dyambu yai kele ya kyeleka.

Sambu Davidi vandaka kutula ntima na dikebi yina Nzambi ketudilaka yandi, yandi tubaka nde: ‘Mfumu Nzambi, nge metala mono mbote-mbote, nge mezaba mono.’ (Verse 1) Na verse yai, Davidi kesadila kifwanisu mosi ya kitoko. Kisongi-dyambu ya Kiebreo yina bo mebalula na ‘kutala’ lenda tendula kutimuna sambu na kusosa matadi ya ntalu (Yobi 28:3), kutala ntoto mosi sambu na kuzaba yo mbote-mbote (Bazuzi 18:2), to kutadila dyambu mosi yina bo kesambisa (Kulonga 13:14). Ya kyeleka, Yehowa kezabaka beto mbote mpenza mpi yandi kefimpaka mambu yonso ya luzingu na beto. Ntangu Davidi kesadila ngogo “mono,” yandi kelonga beto nde Nzambi ketulaka dikebi na konso nsadi na yandi. Yandi ketalaka bo mpi kezabaka mbote-mbote konso muntu.

Davidi kuyindululaka dyaka mutindu yina Nzambi ketalaka beto mpi kutubaka nde: “Nge zaba ntangu mono ke vandaka, nge zaba ntangu mono ke telamaka; ata nge kele ntama nge ke zabaka ngindu na mono yonso.” (Verse 2) Ya kyeleka, Yehowa kele “ntama” sambu yandi kezingaka na zulu. Kansi, yandi kezabaka ntangu beto kevandaka, mu mbandu na nkokila na nima ya kusala mambu mingi, mpi ntangu beto ketelamaka na suka sambu na kukwenda na kisalu. Dyaka, yandi kezabaka mabanza mpi bampusa na beto. Keti Davidi vandaka kuwa boma sambu Yehowa vandaka kufimpa yandi mbote-mbote? Ve, nkutu yandi lombaka Nzambi na kufimpa yandi. (Verse 23, 24) Sambu na inki?

Davidi kuzabaka nde Yehowa kefimpaka bansambidi na yandi ti kikuma ya mbote. Yandi monisaka kikuma yango ntangu yandi sonikaka nde: “Nge ke monaka mono ntangu mono ke tambula ti ntangu mono ke pema, nge zaba mambu yonso ya mono ke salaka.” (Verse 3) Konso kilumbu, Yehowa kemonaka ‘mambu yonso’ yina beto kesalaka, disongidila bifu mpi mambu na beto ya mbote. Keti yandi ketulaka dikebi na bifu na beto to na mambu ya mbote? Ngogo ya Kiebreo yina bo mebalula na ‘kumona’ lenda tendula “kuyungula” to “kupupula” mutindu nsadi-bilanga kepupulaka matiti sambu na kuzwa bambuma ya mbote yina yandi kele na yo mfunu. Ngogo ya Kiebreo ya bo mebalula na ‘kuzaba’ lenda tendula “kuzola.” Ntangu Yehowa kefimpaka mambu yina bansambidi na yandi ketubaka mpi kesalaka konso kilumbu, yandi kezolaka mambu ya mbote yina bo kesalaka. Sambu na nki? Yandi kesepelaka na bikesa yina bo kesalaka sambu na kusepedisa yandi.

Nkunga 139 kelonga beto nde, Yehowa kekudibanza-banzaka mpenza sambu na bansambidi na yandi. Yandi ketalaka mpi kelangidilaka bo na luzingu na bo ya konso kilumbu. Yo yina, yandi kezabaka bampasi yonso yina bo kekutanaka ti yo mpi kebakisaka mambu yina kenyokulaka mabanza mpi ntima na bo. Keti mambu yai kepusa nge na kusambila Nzambi ya mutindu yai? Kana yo kele mpidina, nge lenda ndima dyambu yai: Yehowa ‘tavila ve bisalu yina nge kesalaka mpi zola yina nge kemonisaka sambu na zina na yandi.’​—Baebreo 6:10.

[Noti na nsi ya lutiti]