Tula Ntima na Yehowa, ‘Nzambi Yina Kepesaka Lusadisu’
Tula Ntima na Yehowa, ‘Nzambi Yina Kepesaka Lusadisu’
‘Beto pesa mersi na Nzambi mpi Tata ya Mfumu na beto Yesu Kristo, Tata yina kewilaka beto mawa mpi kepesaka beto lusadisu.’—2 KOR. 1:3.
1. Beto yonso kevandaka na mfunu ya inki?
YANTIKA lubutuku na beto, beto kevandaka na mfunu ya lusadisu. Mwana-fyoti kedilaka ntangu yandi kevandaka na mfunu ya lusadisu. Ziku, yandi kezolaka nde bo baka yandi to yandi kevandaka na nzala. Ata ntangu beto kekumaka bambuta, mbala mingi beto kevandaka na mfunu ya lusadisu mingi-mingi ntangu beto kekutanaka ti bampasi.
2. Inki dyambu kendimisa beto nde Yehowa kepesaka lusadisu na bantu yina ketudilaka yandi ntima?
2 Bantu ya dibuta mpi banduku na beto lenda pesa beto mwa lusadisu. Kansi, na mambu yankaka yina kepesaka beto mpasi, ata muntu mosi ve lenda pesa beto lusadisu. Kaka Nzambi muntu lenda pesa beto lusadisu ata bampasi na beto kele ya nki mutindu. Ndinga na yandi kendimisa beto nde: ‘Mfumu Nzambi kele penepene na bantu yonso yina kebingaka yandi, yandi kewaka kudila na bo.’ (Nk. 145:18, 19) Ya kyeleka, Yehowa “ke talaka mbote bantu ya [lunungu], makutu na yandi ke waka kudila na bo.” (Nk. 34:16) Kansi, sambu Nzambi kupesa beto kikesa mpi lusadisu, beto fwete tudila yandi ntima. Davidi, kumonisaka dyambu yai pwelele ntangu yandi yimbaka nde: “Bantu yina ya bo ke pesa mpasi, Mfumu Nzambi kele kisika ya bo ke tininaka, yandi kele kisika ya ngemba na ntangu ya mpasi. Bantu yina kuzaba nge Mfumu Nzambi, bo ta tula nge ntima; nge ke buyaka ve muntu yina ke kwisa na nge.”—Nk. 9:10, 11.
3. Inki mutindu Yezu kutubilaka zola ya Yehowa sambu na bansadi na yandi?
3 Yehowa kezolaka bansambidi na yandi. Yezu kumonisaka yo pwelele ntangu yandi tubaka nde: “Keti bo ke tekaka ve bandeke tanu ya fioti na tubibende zole ya mbongo? Kansi Nzambi ke vilaka ata ndeke mosi ve. Ata nsuki na beno ya ntu, Nzambi me tangaka yo yonso. Beno kuwa boma ve; ata bandeke kele mingi, kansi beno me luta bo na mfunu!” (Luka 12:6, 7) Na nzila ya mbikudi Yeremia, Yehowa kuzabisaka dikanda ya Izraele nde: “Mono me [zolaka] beno ntama, yo yina mono ke talaka beno na disu ya mbote.”—Yer. 31:3.
4. Sambu na nki beto lenda tula ntima na balusilu ya Yehowa?
4 Kutula ntima na Yehowa mpi na kulungana ya balusilu na yandi lenda pesa beto lusadisu na bantangu ya mpasi. Yo yina, beto fwete tudila Nzambi ntima bonso Yozue yina kutubaka nde: ‘Mfumu Nzambi, mesalaka mambu yonso ya yandi tubaka; ata kima mosi ve mekondaka, yandi melungisaka mambu yonso mpenza.’ (Yoz. 23:14) Dyaka, beto lenda ndima nde ata beto kenyokwama bubu yai, Nzambi kele muntu ya kwikama mpi yandi tavila ve ata fyoti bansadi na yandi ya kwikama.—Tanga 1 Korinto 10:13.
5. Inki mutindu beto lenda pesa bankaka lusadisu?
5 Ntumwa Polo kubingaka Yehowa ‘Nzambi yina kepesaka lusadisu.’ “Kupesa lusadisu” ketendula kulembika muntu yina kele na mpasi to na mawa. Yo ketendula mpi kusadisa yandi sambu na kufyotuna mpasi mpi mawa na yandi. Yehowa kesalaka mpenza mutindu yai. (Tanga 2 Korinto 1:3, 4.) Ata kima mosi ve to muntu mosi ve, lenda kanga Tata na beto ya zulu nzila ya kusala dyambu mosi buna. Yo yina, yandi kevandaka ti makuki ya kusala mambu yonso yina yandi kele na yo mfunu sambu na kupesa lusadisu na bantu yina kezolaka yandi. Beto mpi lenda pesa bampangi na beto lusadisu “na bampasi na bo ya mutindu na mutindu.” Beto lenda sala yo na nsadisa ya “lusadisu yina ya Nzambi [ke] pesaka beto.” Dyambu yai kemonisa pwelele nde, ata muntu mosi ve lenda pesa lusadisu na bantu yina kenyokwama kuluta Yehowa!
Kisina ya Bampasi
6. Tanga mambu yina lenda vanda na kisina ya bampasi na beto.
6 Beto kevandaka na mfunu ya lusadisu na mambu mingi ya luzingu. Dyambu mosi yina kevandaka na kisina ya bampasi na beto kele lufwa ya muntu yina beto vandaka kuzola mingi, mingi-mingi nkwelani to mwana. Muntu yankaka lenda vanda na mfunu ya lusadisu ntangu yandi kenyokwama sambu bantu yankaka kebakila yandi bangindu ya mbi to kemenga yandi. Dyaka, bantu yankaka lenda vanda na mfunu ya lusadisu sambu bo kebela, mekuma bambuta, kele bansukami, kekutana ti bampasi na makwela, to kenyokwama na bampasi ya nsi-ntoto yai ya mavwanga.
7. (a) Na bantangu ya mpasi, beto kevandaka na mfunu ya lusadisu ya nki mutindu? (b) Yehowa lenda sala inki sambu na kulembika ntima yina ‘mepasuka mpi mebukana’?
7 Na bantangu ya mpasi, beto lenda vanda na mfunu ya lusadisu yina lenda lembika ntima na beto, mabanza na beto, mawi na beto, nitu na beto mpi mavimpi na beto ya kimpeve. Mu mbandu, beto tadila ntima. Ndinga ya Nzambi ketuba nde, ntima na beto lenda “pasuka mpi kubukana.” (Nk. 51:17, NW) Na ntangu yina, Yehowa lenda sadisa beto sambu Biblia ketuba nde: “Bantu yina ke na mawa na ntima, yandi ke katulaka bo mawa, yandi ke sansaka bamputa na bo.” (Nk. 147:3) Ata na bampasi ya ngolo, Nzambi lenda pesa beto lusadisu yina lenda lembika ntima na beto yina kenyokwama kana beto samba yandi na lukwikilu yonso mpi kuzitisa bantuma na yandi.—Tanga 1 Yoane 3:19-22; 5:14, 15.
8. Ntangu beto kenyokwamaka na mabanza, inki mutindu Yehowa kepesaka beto lusadisu?
8 Mabanza na beto lenda vanda na mfunu ya lusadisu sambu bampasi yina beto kekutanaka ti yo lenda nyokula bangindu na beto. Na ngolo na beto mosi, beto lenda telamina ve mambu yai ya kemekaka lukwikilu na beto. Kansi, muyimbi-bankunga kuyimbaka nde: ‘Ntangu mabanza na mono kevandaka na mpasi mingi, nge kelembikaka mono ntima, nge kepesaka mono kiese.’ (Nk. 94:19) Dyaka, Polo kusonikaka nde: “Beno kumona mpasi ve na ntima sambu na konso mambu yina; kansi konso ntangu ya beno ke samba Nzambi, beno lomba yandi konso mambu yina ya beno ke na yo mfunu; ntangu beno ke lomba yandi yo, beno pesa yandi mersi. Ebuna ngemba ya Nzambi, ngemba yina me luta mambu yonso ya bantu ke yindulaka, yo ta keba ntima na beno ti mabanza na beno sambu na kimvuka yina ya beno kele ti Yesu Kristo.” (Filp. 4:6, 7) Kutanga Masonuku mpi kuyindulula yo, lenda sadisa beto mingi ntangu beto kenyokwama na mabanza.—2 Tim. 3:15-17.
9. Inki lenda sadisa beto na kununga mawi ya mbi?
9 Bantangu yankaka, beto lenda lemba nitu mpi kukuma ti mawi ya mbi. Ziku, beto lenda mona nde beto takuka ve kulungisa mukumba mosi yina Masonuku to dibundu kelomba beto na kulungisa. Na dibaku yai mpi, Yehowa lenda pesa beto kikesa mpi lusadisu. Beto tadila mbandu yai: Ntangu Yehowa kupesaka Yozue mukumba ya kutwadisa bantu ya Izraele sambu na kunwana ti makanda ya bambeni yina kuvandaka ngolo, Moize kuzabisaka bantu nde: “Beno vanda ngolo ti kikesa. Beno tina bantu yina boma ve. Mfumu Nzambi, Nzambi na beno, yandi mosi ta vanda ti beno, yandi ta bikisa beno ve ata fioti.” (Kul. 31:6) Na lusadisu ya Yehowa, Yozue kukotisaka bantu ya Nzambi na Ntoto ya Lusilu mpi kunungaka bambeni na yandi yonso. Na Nzadi-Mungwa ya Mbwaki, Yehowa kupesaka mpi Moize lusadisu ya mutindu mosi.—Kub. 14:13, 14, 29-31.
10. Kana bampasi kenyokula nitu na beto, inki lenda sadisa beto?
10 Mambu ya mpasi lenda pesa beto mpi mpasi na nitu. Ya kyeleka, kudya mbote, kupema mingi, kusala bangalasisi, mpi kuvanda bunkete lenda sadisa beto na kuvanda ti mavimpi ya mbote. Kuyindulula mambu yina Biblia ketubaka na yina metala makwisa, lenda sadisa beto na kuvanda ti mavimpi ya mbote. Yo yina, ntangu beto kenyokwama na dyambu mosi, yo kele mbote na kuyibuka mambu yina kukuminaka Polo mpi bangogo na yandi yai ya kikesa: “Na mambu yonso, bo ke yangisaka beto, kansi bo ke fwaka beto ve; ntima ke salaka beto mpasi, kansi beto ke tulaka ntima kaka; beto ke na bambeni mingi, kansi Nzambi ke bikisaka beto ve; bo ke monisaka beto mpasi, kansi bo ke fwaka beto ve.”—2 Kor. 4:8, 9.
11. Inki beto lenda sala kana beto kebela na kimpeve?
11 Bampasi yankaka lenda vanda ti bupusi ya mbi na mavimpi na beto ya kimpeve. Na dibaku yai mpi, Yehowa lenda sadisa beto. Ndinga na yandi kendimisa beto nde: “Yandi ke sadisaka bantu yonso yina ke zola kubwa, bantu yina me lemba yandi ke pesaka bo ngolo.” (Nk. 145:14) Sambu na kubaka lusadisu na maladi na beto ya kimpeve, beto fwete sosa lusadisu ya bankuluntu. (Yak. 5:14, 15) Dyaka, kuyindulula ntangu yonso kivuvu ya luzingu ya mvula na mvula yina Biblia mesilaka beto, lenda sadisa beto ntangu beto kenyokwama na mambu yina kemekaka lukwikilu na beto.—Yoa. 17:3.
Bambandu ya Lusadisu Yina Nzambi Kepesaka
12. Tubila mutindu Yehowa kupesaka Abrahami lusadisu.
12 Muyimbi-bankunga mosi ya kupemama na mpeve kuzabisaka Yehowa nde: “Kuvila ve mambu ya nge silaka mono muntu na nge, mambu ya mono tulaka ntima. Kusila ya nge me silaka mono, yo ke pesaka mono moyo; yo yina ke katulaka mono mawa na bampasi na mono.” (Nk. 119:49, 50) Bubu yai, beto kele ti Ndinga ya Yehowa ya kusonika, yina kele ti bambandu ya bantu yina Nzambi kupesaka lusadisu. Mu mbandu, yo lenda vanda nde Abrahami kudiyangisaka ntangu yandi waka nde Yehowa zolaka kufwa Sodome mpi Gomore. Yandi yulaka Nzambi nde: “Ya kieleka, nge ta fwa bantu ya mbote nzila mosi na bantu ya mbi?” Yehowa kupesaka Abrahami lusadisu na mutindu yandi zabisaka yandi nde, kana yandi mona bantu ya mbote ata 50, yandi tafwa ve mbanza ya Sodome. Kansi, Abrahami kuyulaka dyaka Yehowa mbala tanu ya mvimba nde: Ebuna kana bwala yango kele kaka ti bantu ya mbote 45? 40? 30? 20? 10? Na bambala yina yonso, Yehowa kumonisilaka Abrahami ntima-nda mpi kuzabisaka yandi nde, yandi tafwa Sodome ve. Ata mbanza yango kuvandaka ve ti bantu ya mbote ata kumi ya mpamba, Yehowa kugulusaka Loti mpi bana na yandi ya bankento.—Kuy. 18:22-32; 19:15, 16, 26.
13. Inki mutindu Ana kumonisaka nde yandi vandaka kutudila Yehowa ntima?
13 Ana, nkento ya Elkana vandaka mpenza ti mpusa ya mwana. Kansi, yandi vandaka mukobo mpi dyambu yai vandaka kupesa yandi mpasi. Yandi sambaka Yehowa sambu na dyambu yango, mpi Eli, Nganga-Nzambi ya Nene kuzabisaka yandi nde: “Nzambi ya Israele kupesa nge kima ya nge me lomba yandi.” Dyambu yai kupesaka Ana kikesa, ebuna ‘yandi yantikaka kudia mpi mawa na yandi kumanaka.’ (1 Sam. 1:8, 17, 18) Ana kutulaka ntima na Yehowa, mpi na kivuvu yonso yandi yambulaka mambu na maboko ya Yehowa. Ata yandi zabaka ve mutindu mambu zolaka kusuka, yandi kumaka ti ngemba na ntima. Na nima ya bilumbu, Yehowa kupesaka mvutu na kisambu na yandi. Yandi bakaka divumu, kubutaka mwana-bakala mpi kupesaka yandi zina Samuele.—1 Sam. 1:20.
14. Sambu na nki Davidi kuvandaka na mfunu ya lusadisu, mpi na nani yandi sosaka lusadisu yango?
14 Ntotila Davidi mpi kubakaka lusadisu na Nzambi. Sambu Yehowa “ke talaka ntima,” ntangu yandi ponaka Davidi sambu na kukuma ntotila na Izraele, yandi zabaka nde Davidi kuvandaka muntu ya masonga mpi yina kudipesaka ya mvimba na lusambu ya kyeleka. (1 Sam. 16:7; 2 Sam. 5:10) Kansi na nima, Davidi kusalaka bizumba ti Batsheba mpi kufwisaka bakala na yandi sambu na kubumba disumu yina. Ntangu Davidi kubakisaka bunene ya disumu na yandi, yandi sambaka Yehowa nde: “Nzambi, sambu na kuzola na nge ya nene, wila mono mawa; katula masumu na mono sambu nge kele mawa mingi. Mono ya mvimba ke na mvindu sambu na mbi na mono yonso; sukula mono, masumu na mono kumana. Mono me zaba mbi na mono, mono ke vilaka ve masumu na mono konso ntangu.” (Nk. 51:3-5) Davidi kubalulaka mpenza ntima mpi Yehowa kulolulaka yandi. Kansi, yo lombaka nde Davidi kunyokwama na malanda ya disumu na yandi. (2 Sam. 12:9-12) Ata mpidina, ntima-mawa ya Yehowa kusadisaka nsadi na yandi ya kudikulumusa.
15. Inki lusadisu Yehowa kupesaka Yezu na ntwala ya lufwa na yandi?
15 Ntangu Yezu kuvandaka na ntoto, yandi kutanaka ti mambu mingi ya mpasi. Nzambi kubikaka nde lukwikilu na yandi kumekama na bampasi yina, mpi Yezu kutaninaka kwikama na yandi bonso muntu ya kukuka yina vandaka kutudila Nzambi ntima mpi kulemfukila luyalu na yandi. Na ntwala ya kuyekula yandi mpi kufwa yandi, Yezu kusambaka Yehowa nde: “Kulanda luzolo na mono ve, kansi luzolo na nge.” Na nima, wanzyo mosi kubasikilaka Yezu mpi kupesaka yandi kikesa. (Luka 22:42, 43) Nzambi kupesaka Yezu kikesa, ngolo mpi lusadisu yina yandi vandaka na yo mfunu.
16. Inki mutindu Nzambi lenda sadisa beto kana bantu kezola kufwa beto sambu na kwikama na beto?
16 Ata bantu kezola kufwa beto sambu na lukwikilu na beto, Yehowa tasadisa beto na kubikala ya kwikama na yandi. Dyaka, beto kebakaka lusadisu na kivuvu ya lufutumuku. Mpi beto kevingilaka ti kivuvu yonso kilumbu yina lufwa, yina kele mbeni na beto ya nsuka “ta fwa.” (1 Kor. 15:26) Yehowa tafutumuna bansadi na yandi ya kwikama yina mefwaka, yika mpi bantu yankaka yina kele na mabanza na yandi. (Yoa. 5:28, 29; Bis. 24:15) Kutula ntima na lusilu ya Yehowa na yina metala lufutumuku, kepesaka beto lusadisu mpi kivuvu ya kyeleka na bantangu ya mbangika.
17. Inki mutindu Yehowa lenda pesa beto lusadisu ntangu muntu yina beto kezolaka mefwa?
17 Yo kepesa beto kikesa mpenza na kuzaba nde, bampangi yina beto vandaka kuzola ya mefwaka tafutumuka sambu na kuzinga na nsi-ntoto ya mpa mpi ya kitoko yina tavanda ve ti bampasi yina beto kemona bubu yai! Mpi ‘kibuka ya nene’ ya bansadi ya Yehowa yina taguluka na nsuka ya ngidika ya bima yai ya mbi tavanda ti dibaku ya mbote ya kuyamba mpi kulonga bantu yina tafutumuka sambu na kuzinga na nsi-ntoto!—Kus. 7:9, 10.
Nzambi Kenataka Beto na Maboko na Yandi
18, 19. Inki mutindu bansadi ya Nzambi mebakaka lusadisu na bantangu ya mbangika?
18 Moize kusonikilaka bantu ya Izraele nkunga yai ya kepesa kikesa: “Ntangu yonso Nzambi kele kisika na beno ya kutinina, yandi ke nataka beno na maboko na yandi tii kuna.” (Kul. 33:27) Na nima, mbikudi Samuele kuzabisaka bantu ya Izraele nde: ‘Beno bikisa Mfumu Nzambi ve, beno sadila yandi na ntima na beno yonso. Mfumu Nzambi tabika beno ve ata fioti mpi yandi tabebisa lukumu ya zina na yandi ve.’ (1 Sam. 12:20-22) Ntangu yonso yina beto tasadilaka Yehowa na kwikama, yandi tavila beto ve ata fyoti. Yandi tapesaka beto ntangu yonso lusadisu yina beto kele na yo mfunu.
19 Nzambi kepesaka kikesa mpi lusadisu na bantu na yandi na bilumbu yai ya nsuka mpi ya mpasi. Bamvu-nkama meluta, bampangi na beto mingi na nsi-ntoto ya mvimba kunyokwamaka mpi kukotaka baboloko kaka sambu bo vandaka kusadila Yehowa. Mbandu na bo kemonisa nde, na bantangu ya mpasi Yehowa kepesaka bansadi na yandi lusadisu. Mu mbandu, bo zengilaka mpangi-bakala mosi na Union soviétique boloko ya bamvula 23, sambu na lukwikilu na yandi. Kansi ata na boloko, yandi vandaka kubaka mikanda yina ketendulaka Biblia sambu na kupesa yandi kikesa mpi lusadisu. Yandi tubaka nde: “Na nsungi ya bamvula yina, mono longukaka kutudila Yehowa ntima mpi yandi pesaka mono kikesa.”—Tanga 1 Piere 5:6, 7.
20. Sambu na nki beto lenda ndima nde Yehowa tayambula beto ve?
20 Yo vanda beto kekutana ti bampasi ya nki mutindu, yo tavanda mbote nde beto yibuka bangogo yai ya kepesa kikesa ya muyimbi-bankunga: “Mfumu Nzambi, nge ta buya bantu na nge ve, nge ta losa bo ve.” (Nk. 94:14) Ata beto mosi kevandaka na mfunu ya lusadisu, beto mpi kele ti dibaku ya mbote ya kupesa bantu yankaka lusadisu. Mutindu beto tamona yo na disolo yina kelanda, beto lenda pesa lusadisu na bantu yina kele na mafwa na nsi-ntoto yai ya mavwanga.
Inki Mvutu Nge Tapesa?
• Tanga mwa mambu yina kele na kisina ya bampasi.
• Inki mutindu Yehowa kepesaka bansadi na yandi lusadisu?
• Kana bantu kezola kufwa beto, inki lenda pesa beto lusadisu?
[Bangyufula ya disolo ya kulonguka]
[Lupangu/Bifwanisu ya kele na lutiti 23]
MUTINDU YA KUNUNGA MAMBU YINA LENDA YANGISA . . .
▪ ntima na beto Nk. 147:3; 1 Yoa. 3:19-22; 5:14, 15
▪ mabanza na beto Nk. 94:19; Filp. 4:6, 7
▪ mawi na beto Kub. 14:13, 14; Kul. 31:6
▪ nitu na beto 2 Kor. 4:8, 9
▪ mavimpi na beto ya kimpeve Nk. 145:14; Yak. 5:14, 15
