1 Nzambi Kele Diswekamu​—Keti Yo Kele Kyeleka?

Mambu yina ziku nge mewaka: “Nzambi kesalaka mambu na mutindu yina beto lenda bakisa ve.”

“Beto lenda bakisa Tata ve, beto lenda bakisa Mwana ve, mpi beto lenda bakisa Mpeve Santu ve.”​—Mukanda mosi (The Athanasian Creed) kemonisa malongi ya butatu busantu yina mabundu mingi ya Kikristu kelongaka.

Mambu yina Biblia kelongaka: Yezu kutubaka nde, bantu yina ‘tazaba nge Nzambi mosi ya kieleka’ tabaka balusakumunu. (Yoane 17:3) Kansi, inki mutindu beto lenda zaba Nzambi kana yandi kele diswekamu? Nzambi kekudibumbaka ve, kansi yandi kezolaka nde bantu yonso kuzaba yandi.​—Yeremia 31:34.

Ya kyeleka, beto tazaba ve mambu yonso ya metala Nzambi. Dyambu yai kele kyeleka, sambu mabanza mpi banzila na yandi meluta ya beto.​—Longi 3:11; Yezaya 55:8, 9.

Mutindu kuzaba kyeleka lenda sadisa nge: Kana beto lenda bakisa Nzambi ve, sambu na nki beto fwete sala bikesa sambu na kuzaba yandi? Yandi kesadisaka beto kaka ve na kuzaba yandi kansi mpi, na kuvanda na bangwisana ya mbote ti yandi. Nzambi kubingaka Abrahami, muntu ya kwikama “nduku na mono,” mpi Ntotila Davidi kusonikaka nde: “Mfumu Nzambi ke songaka kinsweki na yandi na bantu yina ke lemfukaka na yandi.”​—Yezaya 41:8; Nkunga 25:14.

Keti nge keyindula nde kuvanda nduku ya Nzambi kele dyambu yina lenda salama ve? Ziku, nge keyindula mutindu yina, kansi tala mambu yina Bisalu 17:27 ketuba: “[Nzambi] kele ntama ve na konso muntu awa na kati na beto.” Na nki mutindu? Na nzila ya Biblia, Nzambi kezabisaka beto mambu yina beto fwete sala sambu na kuzaba yandi mbote-mbote. *

Yandi kezabisaka beto nde, zina na yandi kele Yehowa. (Yezaya 42:8, NW) Yandi mesonikisaka na Biblia, mambu yina yandi mesadilaka bantu sambu beto zaba Kimuntu na yandi. Dyaka, Nzambi kemonisaka na mawi yandi na beto. Yandi kele ‘Nzambi mosi ya mawa; yandi kewaka makasi nswalu ve, yandi kesongaka mambote na yandi mpi kesalaka mambu yonso ya yandi ketubaka.’ (Kubasika 34:6) Mambu yina beto kesalaka lenda pesa yandi kyese to mawa. Mumbandu, dikanda ya Izraele kupesaka yandi “mawa” ntangu bo kolamaka, kansi bayina kulemfukilaka yandi kupesaka yandi kyese.​—Nkunga 78:40; Bingana 27:11.

[Noti na nsi ya lutiti]

[Bangogo sambu na kubenda dikebi ya kele na lutiti 4]

Kana Nzambi kele diswekamu ya butatu busantu, inki mutindu beto lenda zaba yandi mpenza?

[Bangogo ya kemonisa kisina ya foto ya kele na lutiti 4]

The Trinity c.1500, Flemish School, (16th century)/H. Shickman Gallery, New York, USA/The Bridgeman Art Library International