Keti Bo Mekusaka Nge Dezia?

KANA nge mezaba nde, muntu yina nge ketudilaka ntima mekusa nge yo kepesaka mpasi. Nge lenda wa nsoni, makasi to nkutu kumona nde bo meyekula nge. Luvunu kefwaka kinduku, makwela mpi yo kesalaka nde bantu kuvidisa mbongo mingi.

Ntangu yai, yindula mutindu nge takudiwa kana nge mezaba nde bo mezabisaka nge mambu ya luvunu sambu na Nzambi. Kana nge kesambilaka, yo lenda pesa nge mpasi mingi, mutindu bantu yai ya kekwendaka na banzo-nzambi kudiwaka:

● “Mono monaka bonso nde dibundu kuyekulaka mono.”​—DEANNE.

● “Mono waka makasi. Mono monaka nde bo kusaka mono mpi nde bivuvu mpi balukanu na mono kuvandaka ya mpamba.”​—LUIS.

Ziku, nge lenda vanda ti keti-keti sambu na kundima nde bo mekusaka nge na mambu ya Nzambi. Ziku, nge zabaka mambu yango na muntu yina nge ketudilaka ntima mpi yina lenda kusa nge ve, mumbandu bibuti na nge, nganga-Nzambi, pastere to nduku na nge ya ntima. Yo lenda vanda nde, nge kekwikilaka malongi mosi buna tuka ntama na luzingu na nge. Kansi, keti nge lenda ndima ve nde ata dibanza yina meyalumukaka na ntoto ya mvimba lenda vanda luvunu? Franklin D. Roosevelt, prezida ya ntama ya États-Unis kundimaka dyambu yai, yo yina yandi tubaka nde: “kuvutukila dyambu mosi mbala na mbala kekumisaka yo ve dyambu ya kyeleka.”

Inki mutindu nge lenda zaba kana bo mekusaka nge to ve? Kilumbu mosi, Yezu kusambaka Nzambi nde: “Ndinga na nge kele kyeleka.” (Yoane 17:17, NW) Ya kyeleka, Ndinga ya Nzambi, Biblia kele ti mambu yonso yina beto kele na yo mfunu sambu na kuswaswanisa mambu ya kyeleka mpi ya luvunu.

Sambu na nki ve kubika nde, Biblia kumonisa pwelele baluvunu tanu na yina metala Nzambi? Nge tamona mutindu kyeleka lenda soba luzingu na nge.