Kyeleka Lenda Soba Luzingu na Nge

ZIKU, nge mewaka to bo melongaka nge dilongi mosi ya luvunu sambu na Nzambi, ya kele na kati ya malongi yai ya kulandana ya beto mekatuka kutubila. Kansi, nge lenda vanda ti keti-keti sambu na kusoba balukwikilu na nge, mingi-mingi kana nge kendimaka malongi yango tuka ntama.

Keti-keti ya mutindu yina kele mbi ve. Mabundu yankaka kezolaka ve nde, bantu na bo kufwanisa mambu yina bo kelongaka bo ti yina Biblia kelongaka. Mabundu yankaka kesalaka bikesa sambu na kunwanina malongi na bo ya luvunu na kutubaka nde Biblia kevandaka mpasi na kubakisa, mpi muntu yonso ve lenda bakisa yo. Kansi, balongoki mingi ya Yezu kuvandaka bantu ya mpamba, yina kotaka ve banzo-nkanda ya nda, kansi bo vandaka kubakisa malongi na yandi.—Bisalu 4:13.

Nge mpi lenda wa boma ya kutadila balukwikilu na nge sambu nge keyindula nde kusala buna tamonisa nde nge kele ve ti lukwikilu. Keti nge keyindula nde Nzambi tasepela ve kana nge sala bansosa na Biblia, nsangu yina yandi mepesaka bantu, sambu na kubakisa mambu yina yandi kelomba nge na kusala? Nkutu, Ndinga na yandi kesyamisa nge na kufimpa masonuku, na kutubaka nde: ‘Beno zaba mambu yina Nzambi ke zolaka: mambu ya mbote, mambu yina kepesaka yandi kiese mpi yina kele na kifu ve.’—Roma 12:2.

Kulonguka kyeleka ya Nzambi lenda sadisa nge na kuzaba dyambu mosi ya mpa mpi kutomisa luzingu na nge. (Yoane 8:32) Deanne, yina beto tubilaka na disolo ya ntete, mekumisaka ngolo lukwikilu na yandi na Ndinga ya Nzambi. Yandi ketuba nde: “Na ntwala ya kuyantika kulonguka Biblia, mono vandaka kuzaba ve nde yo ketubaka mambu na pwelele yonso. Kansi bubu yai, mono mezaba nde Yehowa kele kaka ve Nzambi mosi buna, kansi Tata na mono ya zola ya kele na zulu. Mono memonaka lukanu ya kyeleka ya luzingu.”

Ziku, nge melongukaka Biblia banda ntama kansi nge kemonaka bonso nde yo menatilaka nge ve mambote. Kana yo kele mpidina, kuyambula ve. Kusala bikesa sambu na kubakisa Biblia ntangu bo melongaka nge mambu ya luvunu sambu na Nzambi kele bonso kumeka kuyidika apareyi mosi na kusadilaka mukanda yina ketendula ve mbote mutindu ya kuyidika yo. Mbala yankaka nge lenda yidika kisika mosi mpi na nima nge lenda lemba nitu mpi kuyambula sambu nge kekuka ve kuyidika bisika yankaka. Sambu na kuyidika apareyi yango mbote nge fwete sadila mukanda ya mbote.

Keti nge tazola kusadila mukanda ya mbote mpi kulonguka kyeleka na yina metala Nzambi? Beto kelomba nge na kusolula ti Bambangi ya Yehowa yina kele na nzyunga na nge to na kusonikila beto na adresi ya mefwana yina kele na lutiti 4 ya zulunalu yai sambu muntu kwisa kulonguka ti nge Biblia na nzo kukonda kufuta mbongo.

[Bangogo sambu na kubenda dikebi ya kele na lutiti 9]

‘Beno zaba mambu yina Nzambi ke zolaka: mambu ya mbote, mambu yina kepesaka yandi kiese mpi yina kele na kifu ve.’—ROMA 12:2