Keti Mvutu Kele Mfunu?

“Mono vandaka ti bamvula kumi ntangu mono yantikaka kubasika ti bana babakala. Na luyantiku, beto vandaka kusimbana kaka na maboko mpi kupesana babeze. Kansi, mwa ntangu fyoti na nima, beto yantikaka kusimbana na nitu mpi kusala mansoni. Ntangu mono lungisaka bamvula 15, mono yantikaka kusala kisalu mpi babakala yina mono vandaka kusala ti bo vandaka kuzola nde beto vukisa nitu. Mono vandaka kuzola nde bo sepela ti mono mpi mono vandaka kuvukana ti bo na mambu yonso. Mono vandaka kuzola nde banduku na mono kundima mono, mpi dyambu yai kunataka mono na kudipesa mpenza na mambu ya metala kuvukisa nitu.”​—SARA, * AUSTRALIE.

KETI nge tayituka na kuzaba nde, Sara kuyelaka na dibuta ya Bukristu? Bibuti na yandi kusalaka bikesa na kulonga yandi bansiku ya Biblia ya bikalulu ya mbote. Kansi, Sara kuponaka nzila yankaka.

Bantu mingi tandima nde dyambu yina Sara kusalaka kuvandaka mbi ve. Bo kekwikilaka nde mambu yina Biblia ketuba na yina metala kuvukisa nitu memanaka ngala. Bankaka kemonaka mbi ve kana muntu yina kesambilaka kevukisa nitu ti konso muntu yina yandi mezola.

Keti yo kele mfunu nde nge zaba mpi nge lemfuka na dyambu yina Biblia kelongaka na yina metala kuvukisa nitu? Biblia ketubaka nde “bo sonikaka mukanda ya Nzambi yonso na ngolo na yandi; mambu yonso kele na kati yo kele mfunu sambu na kulonga.” (2 Timoteo 3:16) Kana nge kendima nde, Nzambi kugangaka bantu mpi nde Biblia kele Ndinga na yandi ya kupemama, yo kele mfunu na kuzaba mambu yina yo ketubaka na yina metala kuvukisa nitu.

Kansi, bantu mingi kezabaka ve mambu yina Biblia kelongaka na yina metala kuvukisa nitu. Bantwadisi ya mabundu yina ketubaka nde bo kezitisaka Biblia kelongaka mambu ya kuswaswana na yina metala kuvukisa nitu. Nkutu, dyambu yai mekabulaka mabundu mingi ya nene.

Na kisika ya kukwikila kaka na mambu yina bantu yankaka ketubaka, yo kele mbote na kusala bansosa sambu na kutadila dyambu yango nge mosi? Disolo yina kelanda tapesa bamvutu na bangyufula kumi yina bantu keyulaka mingi na mambu yina Biblia kelongaka na yina metala kuvukisa nitu. Na disolo yango, nge tazwa bamvutu ya kyeleka yina mekatuka na mambu yina Biblia kelongaka mpenza. Disolo ya nsuka na masolo yai ya kulandana tamonisa kikuma yina nsola yina beto tasala na dyambu yango kele mfunu.

[Noti na nsi ya lutiti]