Sambu na Nki Kubika nde Mpeve ya Nzambi Kutwadisa Beto?

“Nge kele Nzambi na mono.  . . . Mpeve na nge kuvandila mono mbote ti kunata mono.”​—NK. 143:10.

1. Tendula mutindu ngolo mosi ya kemonikaka ve lenda twadisa muntu.

KETI nge mesadilaka dezia busole sambu na kuzaba nzila? Busole kele apareyi mosi yina kesadisaka muntu na kuzaba nzila yina yandi kekwenda. Yo kevandaka ti ntunga mosi ya ema yina kesongaka ndambu ya Nordi. Ngolo mosi ya kemonikaka ve ya kebendaka bima (force magnétique) kenikisaka ntunga yango. Banda ntama, bantu kesadilaka busole sambu yo songisa bo nzila ntangu bo kesala banzyetelo na nzila ya ntoto to ya masa.

2, 3. (a) Yehowa kusadilaka nki ngolo bamvu-nkama mingi meluta? (b) Sambu na nki beto fwete vingila nde ngolo ya Nzambi yina kemonikaka ve kutwadisa luzingu na beto bubu yai?

² Kele ti ngolo yankaka yina kemonikaka ve, ya kele nkutu mfunu mingi sambu na kutwadisa beto. Inki kele ngolo yango? Yo kele ngolo yina bo metubila na baverse ya luyantiku ya Biblia. Mukanda ya Kuyantika kezabisa beto mambu yina Yehowa mesalaka bamvula mingi meluta: “Na luyantiku, . . .  Nzambi salaka zulu ti ntoto.” Beto mezaba nde, yandi sadilaka ngolo mosi ya nene sambu na kuganga, sambu Biblia keyika nde: “Mpeve ya Nzambi vandaka kuluta.” (Kuy. 1:1, 2) Nzambi vandaka kusadila inki ngolo? Mpeve santu, disongidila ngolo yina Nzambi kusadilaka sambu na kuganga. Beto kele na luzingu sambu Yehowa kusadilaka mpeve na yandi sambu na kuganga bima yonso.​—Yobi 33:4; Nk. 104:30.

³ Sambu Nzambi kusadilaka ngolo na yandi ya kisalu sambu na kuganga beto, keti beto fwete vingila nde ngolo yango kutwadisa luzingu na beto? Yezu, Mwana-Nzambi kuzabaka nde beto fwete vingila nde yo salama mpidina sambu yandi zabisaka balongoki na yandi nde: “Mpeve ya kieleka . . .  ta nata beno na nzila ya kieleka.” (Yoa. 16:13) Mpeve yango kele inki, mpi sambu na nki beto fwete bika nde yo twadisa beto?

Mpeve Santu Kele Inki?

4, 5. (a) Bantu yina kekwikilaka na Butatu keyindulaka nki na yina metala mpeve santu? (b) Inki mutindu nge lenda tendula mpeve santu?

⁴ Ntembe kele ve nde, bantu yankaka yina nge kekutanaka ti bo na kisalu ya kusamuna kevandaka ti dibanza ya mbi na yina metala mpeve santu. Bantu yina kekwikilaka na dilongi ya Butatu Busantu keyindulaka nde mpeve santu kele kigangwa ya mefwanana ti Nzambi Tata. (1 Kor. 8:6) Kansi, dilongi ya Butatu Busantu kewakanaka ve ti malongi yina kele na Biblia.

⁵ Yo yina, mpeve santu kele mpenza inki? Noti na nsi ya lutiti ya Kuyantika 1:2, na mbalula ya Les Saintes Écritures ​— Traduction du monde nouveau ketuba nde: “Katula kubalula yo ‘mpeve,’ ruʹach na [Kiebreo] bo kebalulaka yo mpi ‘mupepe’ mpi na bangogo yankaka yo ketendulaka ngolo yina kemonikaka ve mpi ya kesalaka kisalu.” (Fwanisa ti banoti na nsi ya lutiti ya kele na Kuyantika 3:8; 8:1.) Ata mupepe kemonikaka ve, ngolo na yo kemonikaka, mutindu mosi mpeve santu kemonanaka ve kansi bupusi na yo kemonanaka. Mpeve yango kele ngolo yina kekatukaka na Nzambi mpi yo kesalaka na kati ya bantu to bima sambu na kulungisa luzolo na yandi. Keti yo kele mpasi na kundima nde ngolo yai kekatukaka na Nzambi  Nkwa-Ngolo Yonso mpi Nto ya santu? Ata fyoti ve!​—Tanga Yezaya 40:12, 13.

6. Inki dyambu ya mfunu Davidi kulombaka Yehowa?

⁶ Keti Yehowa lenda landa kusadila mpeve na yandi sambu na kutwadisa luzingu na beto? Yandi silaka Davidi, muyimbi-bankunga nde: “Mono ta songa nge nzila ya nge fweti landa.” (Nk. 32:8) Keti Davidi kuzolaka dyambu yango? Ee, sambu yandi zabisaka Yehowa nde: “Nge kele Nzambi na mono, longa mono na kusala konso kima ya nge zola. Mpeve na nge kuvandila mono mbote ti kunata mono.” (Nk. 143:10) Beto mpi fwete bika nde mpeve ya Nzambi kutwadisa beto. Sambu na nki? Bika beto tadila bikuma iya.

Beto Mefwana Ve na Kuditwadisa

7, 8. (a) Sambu na nki beto lenda ve kuditwadisa? (b) Pesa mbandu yina kemonisa nde beto fwete sosa ve kuditwadisa na ngidika ya bima yai ya mbi.

⁷ Ya ntete, beto fwete bika nde mpeve ya Nzambi kutwadisa beto sambu beto kele ve ti makuki ya kuditwadisa. “Kutwadisa” muntu ketendula “kusongisa yandi nzila ya kulanda.” Kansi, Yehowa kugangaka beto ve ti makuki ya kuditwadisa, mingi-mingi sambu beto kele bantu ya kukonda kukuka. Mbikudi na yandi Yeremia kusonikaka nde: “Mfumu Nzambi, mono zaba nde ke na muntu ve lenda sola nzila na yandi mosi, ke na muntu ve lenda songa nzila na makulu na yandi ntangu yandi ke tambula.” (Yer. 10:23) Sambu na nki beto fwete kuditwadisa ve? Nzambi zabisaka Yeremia kikuma yina beto kesalaka bifu ntangu beto kesosaka kuditwadisa. Sambu na kutubila kimuntu na beto ya kati, Yehowa kutubaka nde: “Nani lenda zaba ntima ya muntu? Yo me fulukaka na luvunu; yo ke na maladi mingi, mpila ya kubelula yo kele ve.”​—Yer. 17:9; Mat. 15:19.

⁸ Keti yo tavanda ve buzoba sambu na muntu yina mezaba nzila ve na kutambula yandi mosi to kukota na mfinda mosi ya nene yina bantu mekotaka ntete ve, kukonda ntwadisi ya mayele to busole? Sambu yandi mezaba ve mutindu ya kutanina luzingu na yandi na kisika yina mpi nzila ya mbote yina yandi fwete landa, yandi tatula luzingu na yandi na kigonsa. Mutindu mosi mpi, muntu yina keyindula nde yandi lenda kuditwadisa na nsi-ntoto yai ya mbi kukonda kubika nde Nzambi kusonga yandi nzila ya mbote, yandi ketula luzingu na yandi na kigonsa ya nene. Sambu na kuguluka na ngidika yai ya mbi, beto fwete samba Yehowa bonso Davidi yina kusambaka nde: ‘Bika nde makulu na mono kulanda nzila na nge, mono tabikisa yo ve ata fioti.’ (Nk. 17:5; 23:3) Inki mutindu beto lenda baka lutwadisu yina?

9. Mutindu kifwanisu ya lutiti 19 kemonisa yo, inki mutindu mpeve ya Nzambi lenda twadisa beto?

⁹ Kana beto kekudikulumusa mpi kendima lutwadisu ya Yehowa, yandi tapesa beto mpeve santu na yandi sambu yo twadisa beto. Inki mutindu ngolo yango lenda sadisa beto? Yezu kutendudilaka balongoki na yandi nde: ‘Mpeve-santu yina ya Tata Nzambi tatinda na zina na mono; yo talongaka beno mambu yonso, yo tasonga beno diaka mambu yai yonso ya mono metubila beno.’ (Yoa. 14:26) Ntangu beto kesamba mpi kelonguka mbala na mbala Ndinga ya Nzambi, yika mpi malongi ya Yezu, mpeve santu  tasadisa beto na kubakisa mbote-mbote mayele ya Yehowa, sambu beto landa kusala luzolo na yandi. (1 Kor. 2:10) Dyaka, kana beto mekutana ti mambu ya kukonda kukana, mpeve santu tasonga beto nzila ya kulanda. Yo tayibusa beto minsiku ya Biblia yina beto melongukaka dezia mpi yo tasadisa beto na kuzaba mutindu beto lenda sadila yo sambu na kubaka balukanu ya mbote.

Mpeve ya Nzambi Kutwadisaka Yezu

10, 11. Yezu kuzabaka inki na yina metala mpeve santu, mpi inki mutindu yo sadisaka yandi?

¹⁰ Ya zole, beto fwete bika nde mpeve santu kutwadisa beto sambu Nzambi kutwadisaka Mwana na yandi mosi na mpeve yango. Na ntwala ya kukwisa na ntoto, Mwana mosi kaka ya kubutuka ya Nzambi kuzabaka mbikudulu yai: “Ntotila yango ta fulukaka na mpeve ya Mfumu Nzambi: Mpeve ya Nzambi ta pesaka yandi mayele ti ngangu, yandi ta pesaka yandi mpila ya kuzaba kuyala bantu na yandi. Ntotila yango ta zabaka luzolo ya Mfumu Nzambi, yandi ta zitisaka yandi.” (Yez. 11:2) Yindula mpusa ya ngolo yina Yezu kuvandaka ti yo ya kumona lusadisu ya mpeve ya Nzambi na mambu yina yandi kutanaka ti yo awa na ntoto!

¹¹ Bangogo ya Yehowa kulunganaka. Evanzile ya Luka kemonisa mambu yina kusalamaka kukonda kusukinina na nima ya mbotika ya Yezu: “Ntangu Yesu katukaka na nzadi ya Yordani sambu na kwisa kuvutuka, yandi vandaka ya kufuluka na mpeve ya Nzambi. Ebuna mpeve nataka yandi na ntoto ya zelo na zelo.” (Luka 4:1) Ntembe kele ve nde, kuna ntangu Yezu vandaka kusamba, kuyindulula mpi kubuyaka madya, Yehowa kupesaka Mwana na yandi bantuma mpi kuzabisaka yandi mambu yina yandi takutana ti yo. Ngolo ya Nzambi yina kesalaka kisalu kuvandaka ti bupusi na mabanza mpi na ntima ya Yezu, mpi yo twadisaka bangindu ti balukanu na yandi. Yo yina, Yezu kuzabaka mambu yina yandi fwete sala na ntwala ya konso dyambu yina mpi yandi salaka mambu yonso yina Tata na yandi zolaka nde yandi sala.

12. Sambu na nki yo kele mfunu nde beto lomba mpeve ya Nzambi na kutwadisa beto?

¹² Sambu Yezu kuzabaka nde mpeve ya Nzambi kusadisaka yandi mingi na luzingu na yandi, yandi sadisaka balongoki na yandi na kuzaba mfunu ya kulomba mpeve yango mpi kubika nde yo twadisa bo. (Tanga Luka 11:9-13.) Sambu na nki mpeve yai kele mpenza mfunu sambu na beto? Sambu yo lenda soba mabanza na beto na mpila nde yo fwanana ti mabanza ya Kristu. (Roma 12:2; 1 Kor. 2:16) Kana beto bika nde mpeve ya Nzambi kutwadisa luzingu na beto, beto lenda yantika kuyindula bonso Kristu mpi kulanda mbandu na yandi.​—1 Pie. 2:21.

Mpeve ya Nsi-Ntoto Lenda Vidisa Beto Nzila

13. Mpeve ya nsi-ntoto kele inki, mpi yo kevandaka ti nki bupusi?

¹³ Ya tatu, beto fwete bika nde mpeve ya Nzambi kutwadisa beto sambu kukonda yo, mpeve ya nsi-ntoto yina ketwadisa luzingu ya bantu mingi bubu yai lenda vidisa beto nzila. Mpeve ya nsi-ntoto kele ti ngolo yina kepusaka bantu na kusala mambu yina meswaswana ti yina mpeve santu kesyamisaka bantu na kusala. Na kisika ya kusyamisa bantu  na kuvanda ti mabanza ya Kristu, mpeve ya nsi-ntoto kepusaka bo na kuyindula mpi kusala mambu bonso Satana, mfumu ya nsi-ntoto. (Tanga Efezo 2:1-3; Tito 3:3.) Ntangu muntu mebika nde mpeve ya nsi-ntoto kutwadisa yandi mpi kesala mambu ya kimuntu, yo tanatila yandi bigonsa ya nene mpi yo takanga yandi nzila ya kukota na Kimfumu ya Nzambi.​—Gal. 5:19-21.

14, 15. Inki mutindu beto lenda telamina mpeve ya nsi-ntoto?

¹⁴ Yehowa mepesaka beto bima yonso yina beto kele na yo mfunu sambu na kutelamina mpeve ya nsi-ntoto. Ntumwa Polo kutuba nde: ‘Beno vanda ngolo sambu na kimvuka na beno ti Mfumu mpi sambu na ngolo na yandi ya nene ebuna bambeni na beno tabedisa beno ve.’ (Ef. 6:10, 13) Na nzila ya mpeve na yandi, Yehowa kepesaka beto ngolo sambu na kutelamina bikesa yina Satana kesalaka sambu na kuvidisa beto nzila. (Kus. 12:9) Mpeve ya nsi-ntoto kele ngolo mpi beto lenda nunga yo ve na mambu yonso. Kansi, beto lenda telamina yo. Mpeve santu kele ngolo kuluta mpeve ya nsi-ntoto mpi yo lenda sadisa beto!

¹⁵ Sambu na bantu yina kuyambulaka Bukristu na mvu-nkama ya ntete, ntumwa Piere kutubaka nde: “Bo me katukaka na nzila ya mbote, ebuna bo me vilaka nzila.” (2 Pie. 2:15) Beto kele mpenza na kyese sambu beto mebakaka “ve mpeve ya [nsi-ntoto] yai, kansi beto me bakaka mpeve yina ya Nzambi”! (1 Kor. 2:12) Kana beto kebika nde mpeve yango kutwadisa beto mpi kesadila bangidika yina Yehowa mebakaka sambu na kutanina kimpeve na beto, beto lenda telamina mpeve ya nsi-ntoto yai ya kekatukaka na Satana.​—Gal. 5:16.

Mpeve Santu Kebutaka Mbuma ya Mbote

16. Mpeve santu lenda buta nki mbuma na kati na beto?

¹⁶ Ya iya, beto fwete bika nde mpeve ya Nzambi kutwadisa beto sambu yo kebutaka mbuma ya mbote na luzingu ya bantu yina kebikaka nde yo twadisa bo. (Tanga Galatia 5:22, 23.) Nani na kati na beto tasepela ve nde bantu kuzola yandi, yandi vanda na kyese mpi na ngemba? Nani na kati na Beto tazola ve kuvanda ntima-nda mpi kumonisila bankaka bumbote ? Keti yo tavanda ve mbote kana beto mekuma ti lukwikilu ya ngolo, mawete mpi kudiyala? Mpeve ya Nzambi kesadisaka beto na kukuma ti bikalulu ya mbote yina tanatila beto mambote yika mpi bantu ya dibuta na beto mpi ya dibundu. Beto fwete landa kusala bikesa sambu na kukuna mbuma ya mpeve sambu yo kele ve ti bandilu na yina metala kuyedisa mbuma ya mpeve mpi kumonisa yo.

17. Inki mutindu beto lenda kuna kikalulu mosi ya mbuma ya mpeve na kiteso ya kufwana?

¹⁷ Yo tavanda mayele nde beto kuditadila sambu na kuzikisa kana bangogo mpi bisalu na beto kemonisa nde beto ketwadisamaka na mpeve santu mpi kebutaka mbuma na yo. (2 Kor. 13:5a; Gal. 5:25) Kana beto memona nde beto fwete kuna bikalulu yankaka ya mbuma ya mpeve, beto lenda sala mambu na kuwakana ti mpeve yango sambu yo twadisa beto na kumonisa mpenza bikalulu yango. Beto lenda sala yo na kulongukaka konso kikalulu ya mbuma yango mutindu Biblia ti mikanda na beto ya Bukristu kemonisa yo. Yo yina beto lenda bakisa mutindu beto fwete monisa mbuma yango na luzingu na beto ya konso kilumbu mpi na nima kusala bikesa sambu na kumonisa bikalulu yango na kiteso ya kufwana. * Ntangu beto kemonaka lutwadisu ya mpeve ya Nzambi na luzingu na beto mpi ya bampangi na beto, beto kebakisaka pwelele bikuma yina beto fwete bika nde yo twadisa beto.

Keti Nge Kebikaka nde Mpeve ya Nzambi Kutwadisa Nge?

18. Inki beto lenda longuka na mbandu ya Yezu na mutindu yandi bikaka nde mpeve ya Nzambi kutwadisa yandi?

¹⁸ Ntangu Nzambi kugangaka luyalanganu, Yezu vandaka ‘kapita na yandi ya kisalu.’ Yo yina, Yezu zabaka mambu yonso ya metala ngolo yina kebendaka bima na ndambu na yo (champ magnétique terrestre) yina bantu kesadilaka  ntangu bo kesadilaka busole. (Bing. 8:30; Yoa. 1:3) Kansi, Biblia ketubaka ve nde, Yezu vandaka kusadila ntangu yonso ngolo yina sambu na kutwadisa luzingu na yandi ntangu yandi vandaka na ntoto. Biblia kemonisa nde ntangu Yezu vandaka na ntoto, mpeve santu ya Nzambi vandaka ti bupusi ya ngolo na luzingu na yandi. Yandi ndimaka bupusi na yo, mpi ntangu mpeve yango vandaka kutwadisa yandi, yandi ndimaka lutwadisu na yo mpi kusalaka mambu na kuwakana ti yo. (Mar. 1:12, 13; Luka 4:14) Keti nge mpi kesalaka mutindu yina?

19. Inki beto fwete sala sambu mpeve santu kutwadisa luzingu na beto?

¹⁹ Bubu yai, ngolo ya Nzambi yina kesalaka kisalu ketwadisa bantu yina kebika nde yo twadisa ntima mpi mabanza na bo. Inki mutindu nge lenda bika nde yo twadisa nge na nzila ya mbote? Samba Yehowa ntangu yonso sambu yandi tindila nge mpeve santu na yandi mpi yo sadisa nge na kundima lutwadisu na yo. (Tanga Efezo 3:14-16.) Sala mambu na kuwakana ti bisambu na nge mpi sosa bandongisila ya kele na Ndinga ya Nzambi ya kusonika, Biblia​—yina mesalamaka na ngolo ya mpeve santu. (2 Tim. 3:16, 17) Lemfuka na bantuma ya mayele yina mpeve yango kepesa mpi ndima na luzolo yonso lutwadisu na yo. Monisa lukwikilu na makuki yina Yehowa kele ti yo ya kutwadisa mbote-mbote luzingu na nge ya mvimba na nsi-ntoto yai ya mbi.

[Noti na nsi ya lutiti]

Keti Nge Keyibuka?

• Inki mutindu mpeve santu lenda twadisa luzingu na beto?

• Tanga bikuma iya yina beto fwete bika nde mpeve ya Nzambi kutwadisa beto.

• Inki beto fwete sala sambu na kubaka mpenza mambote ya lutwadisu ya mpeve santu?

[Bangyufula ya disolo ya kulonguka]

[Kifwanisu ya kele na lutiti 17]

Mpeve ya Nzambi kuvandaka ti bupusi ya ngolo na luzingu ya Yezu

[Kifwanisu ya kele na lutiti 19]

Mpeve ya Nzambi kevandaka ti bupusi na mabanza mpi na ntima ya bantu sambu yo twadisa bo