Landa Mbandu ya Yezu na Yina Metala Kukangula Meso
Landa Mbandu ya Yezu na Yina Metala Kukangula Meso
“Beno kengila mpi beno samba.”—MAT. 26:41, NW.
INKI MVUTU NGE TAPESA?
Inki mutindu bisambu na beto lenda monisa nde beto kekangula meso?
Na nki mitindu beto lenda monisa nde beto kekangula meso na kisalu na beto ya kusamuna?․
Sambu na nki yo kele mfunu nde beto landa kukangula meso na ntangu ya mpasi mpi inki mutindu beto lenda sala yo?
1, 2. (a) Inki bangyufula lenda basika na mbandu ya Yezu na yina metela kukangula meso? (b) Keti mbandu ya kukuka ya Yezu kele mfunu sambu na bantu ya masumu? Pesa mbandu.
NGE lenda kudiyula nde: ‘Keti beto lenda landa mpenza mbandu ya Yezu na yina metala kukangula meso? Nkutu, Yezu vandaka muntu ya kukuka! Dyaka, Yezu vandaka ti makuki ya kubakisa mambu yina tasalama na makwisa—yo vanda mafunda mingi ya bamvula na ntwala! Keti yo vandaka mpenza mfunu nde yandi kangula meso?’ (Mat. 24:37-39; Baeb. 4:15) Bika beto tadila ntete bangyufula yina sambu na kumona mutindu dyambu yai kele mfunu mpenza.
2 Keti bantu ya masumu lenda longuka na mbandu ya muntu ya kukuka? Ee, sambu bantu lenda longuka na longi ya nene mpi na mbandu na yandi. Mumbandu, yindula muntu yina kelonguka mutindu ya kuta tolo-tolo. Yandi lenda ta ve tolo-tolo mbote-mbote sambu yo simba kima yina yandi mekana. Sambu na kutomisa makuki na yandi, yandi fwete landa mbote-mbote mbandu ya longi na yandi, yina kezabaka mbote-mbote kuta tolo-tolo. Longoki ketulaka dikebi na mutindu longi na yandi ketelamaka, mutindu yandi kesimbaka tolo-tolo, mpi mutindu misapi na yandi kesimbaka nsinga ya munduki ya tolo-tolo. Malembe-malembe, longoki yina kele ti lukanu kelongukaka kiteso ya ngolo yina yandi fwete basisa sambu na kubenda nsinga ya buta, yandi ketadilaka mupepe mpi kelandaka kusala kikesa. Kana yandi landa mambu yina longi na yandi kesala, yandi ta taka tolo-tolo na mpila nde yo simba kima yina yandi mekana. Kiteso mosi, beto kesalaka bikesa sambu na kutomisa bikalulu ya Bukristu ntangu beto kelandaka bantuma mpi mbandu ya kukuka ya Yezu.
3. (a) Inki mutindu Yezu monisaka nde yandi vandaka ti mfunu ya kikalulu ya kukangula meso? (b) Inki beto tatadila na disolo yai?
3 Kansi, inki beto lenda tuba na yina metala kukangula meso? Keti Yezu vandaka mpenza ti mfunu ya kukangula meso? Ya kyeleka, yandi vandaka ti mfunu na yo. Mumbandu, na mpimpa ya nsuka ya luzingu na yandi na ntoto, Yezu syamisaka bantumwa na yandi ya kwikama nde: “Beno kulala ve, sambu mono mpi ke lala ve.” Yandi yikaka nde: “Beno lala ve. Beno samba Nzambi sambu beno kubwa ve na ntangu yai ya mpasi.” (Mat. 26:38, 41) Ata yandi monisaka kikalulu ya kukangula meso na luzingu na yandi mingi-mingi na bantangu yina ya mpasi, yo vandaka mfunu nde Yezu kukangula meso mpi kuvanda ti bangwisana ya mbote ti Tata na yandi ya zulu. Yandi zabaka nde balongoki na yandi fwete kangula meso—na ntangu yina mpamba ve kansi mpi na makwisa. Yo yina, bika beto tadila kikuma yina Yezu kezola nde beto kangula meso. Na nima, beto tatadila mitindu tatu yina lenda sadisa beto na kulanda mbandu ya Yezu na yina metala kukangula meso na luzingu na beto ya konso kilumbu.
KIKUMA YINA YEZU KEZOLA NDE BETO KANGULA MESO
4. Inki kuwakana kele na kati ya mambu yina beto kezabaka ve ti mpusa na beto ya kukangula meso?
4 Na bunkufi, Yezu kezola nde beto landa na kukangula meso sambu na mambu yina beto kezaba mpi yina beto kezaba ve. Ntangu Yezu vandaka awa na ntoto, keti yandi zabaka mambu yonso yina zolaka kusalama na makwisa? Ve, na kudikulumusa yonso yandi ndimaka nde: “Ata muntu mosi kuzaba ve kana nki kilumbu to nki ntangu mambu yina ta bwa, ata bawanzio ya zulu ata Mwana mpi kuzaba yo ve, kansi kaka Tata mpamba muntu kuzaba yo.” (Mat. 24:36) Na ntangu yina, Yezu yina Biblia kebinga “Mwana” kuzabaka ve mbote-mbote ntangu yina nsuka ya nsi-ntoto yai ya mbi takwisa. Inki beto lenda tuba sambu na beto bubu yai? Keti nzayilu na beto sambu na makwisa kele ti ndilu? Ee! Beto kezabaka ve ntangu yina Yehowa tatinda Mwana na yandi sambu na kufwa ngidika ya bima yai ya mbi. Kana beto zabaka yo, keti yo zolaka kuvanda mfunu nde beto kangula meso? Mutindu Yezu tendulaka yo, nsuka takwisa na kintulumukina, na ntangu yina beto kezaba ve. Yo yina, beto fwete landa na kukangula meso.—Tanga Matayo 24:43.
5, 6. (a) Inki mutindu nzayilu na beto sambu na makwisa mpi balukanu ya Nzambi kepusaka beto na kukangula meso? (b) Sambu na nki nzayilu na beto na yina metala Satana fwete pusa beto na kubaka lukanu ya kukangula meso?
5 Na ndambu yankaka, Yezu zabaka mambu mingi ya mbote sambu na makwisa—bakyeleka yina bantu mingi ya zingaka na ntangu na yandi zabaka ve ata fyoti. Nzayilu na beto kele ve kiteso mosi ti ya Yezu, kansi na nsadisa na yandi, beto kezaba mambu mingi na yina metala Kimfumu ya Nzambi mpi mambu yina yo talungisa ntama mingi ve. Ntangu beto ketalaka na nzyunga na beto, yo vanda na nzo-nkanda, na kisalu, na kisika yina beto kesamunaka, keti beto kebakisaka ve nde bantu mingi kezingaka na mudidi ya ngolo na yina metala bakyeleka yai ya mbote? Beto kemona kikuma yankaka ya kukangula meso. Bonso Yezu, beto fwete kangula meso ntangu yonso mpi kusosa mabaku sambu na kulonga mambu yina beto kezaba na yina metala Kimfumu ya Nzambi. Mabaku yonso ya mutindu yina kele mbote mpi beto kesalaka bikesa sambu na kulutisa yo ve. Luzingu ya bantu kele mpenza na kigonsa!—1 Tim. 4:16.
6 Yezu zabaka kikuma yankaka yina pusaka yandi na kulanda kukangula meso. Yandi zabaka nde Satana vandaka ti lukanu ya kumeka yandi, ya kubangika yandi, mpi ya kubebisa kwikama na yandi. Mbeni yai ya nku vandaka ntangu yonso ya kuyilama sambu na kumeka Yezu na ntangu yankaka ya mbote. (Luka 4:13) Yezu yambulaka ve na kukangula meso. Yandi vandaka ya kuyilama sambu na kutelamina konso mumekamu yina, yo vanda mpukumuna, luteleminu, to mbangika. Keti bo lenda tuba ve mambu ya kiteso mosi sambu na beto? Beto kezaba nde Satana kele “bonso ntambu yina ke dila; yandi ke sosa muntu ya kudia.” Yo yina, Ndinga ya Nzambi kesyamisa Bakristu yonso nde: “Beno fweti kudiyala, beno fweti kangula meso na beno.” (1 Pie. 5:8) Kansi, inki mutindu beto lenda sala yo?
MUTINDU KISAMBU LENDA SADISA BETO NA KUKANGULA MESO
7, 8. Inki ndongisila Yezu kupesaka na yina metala kisambu, mpi yandi pesaka mbandu ya nki mutindu?
7 Biblia kemonisa kuwakana ya ngolo na kati ya kukangula meso na kimpeve mpi kisambu. (Kol. 4:2; 1 Pie. 4:7) Ntangu fyoti na nima ya kulomba balongoki na yandi na kukangula meso, Yezu zabisaka bo nde: “Beno lala ve. Beno samba Nzambi sambu beno kubwa ve na ntangu yai ya mpasi.” (Mat. 26:41, NW) Keti yandi zolaka kutuba nde ndongisila yina vandaka mfunu kaka na dyambu ya mpasi yina bo vandaka kukutana ti yo na ntangu yina? Ve, ndongisila na yandi kele munsiku yina beto fwete sadila konso kilumbu.
8 Yezu pesaka mbandu ya mbote na yina metala kisambu. Nge lenda yibuka nde na dibaku mosi buna, yandi lutisaka mpimpa ya mvimba na kusambila Tata na yandi. Bika beto meka kutadila mutindu dyambu yango kusalamaka. (Tanga Luka 6:12, 13.) Yezu vandaka kuzinga na Galilea, penepene ya mbanza Kapernaumi yina zabanaka sambu na kisalu ya kuloba bambisi. Na nkokila, Yezu kwendaka na zulu ya ngumba yina vandaka kutala na Nzadi ya Galilea. Ntangu yandi vandaka kutala nseke na mpimpa, ziku yandi monaka na kintama nsemo ya bamwinda ya mafuta na Kapernaumi mpi na babwala yankaka ya nzyunga. Kansi, ntangu Yezu vandaka kusala kisambu na Yehowa, yandi tulaka mpenza dikebi na kisambu na yandi. Yandi lutisaka bangunga mingi. Yandi tulaka ve dikebi na ntangu bansemo ya bamwinda yina yantikaka kufwa mosi-mosi, ntangu ngonda kudindaka to ntangu bambisi ya mfinda yina ketambulaka na mpimpa vandaka kutula makelele na nseke. Kisambu na yandi vandaka kutadila lukanu ya nene yina yandi vandaka ti yo, disongidila yina ya kupona bantumwa na yandi 12. Beto lenda yindula mpusa yina Yezu vandaka ti yo ya kuzabisa Tata na yandi bangindu mpi basusi na yandi yonso na yina metala konso longoki na kulombaka lutwadisu mpi mayele.
9. Mutindu Yezu sambaka mpimpa ya mvimba kelonga beto inki?
9 Inki mambu beto lenda longuka na mbandu ya Yezu? Keti beto fwete lutisa bangunga mingi ntangu beto kesamba? Ve, sambu yandi zabisaka balongoki na yandi na mawete yonso nde mpeve kele ngolo kansi nitu kele koikoi. (Mat. 26:41) Ata mpidina, beto lenda landa mbandu ya Yezu. Mumbandu, na ntwala ya kubaka konso lukanu yina lenda vanda ti bupusi na zulu na beto, na dibuta na beto, to na kimpeve ya bampangi na beto Bakristu, keti beto keyulaka Tata na beto ya zulu? Keti beto ketubilaka mpi na bisambu na beto mambu ya mpasi yina bampangi na beto ya bankento mpi ya babakala kekutanaka ti yo? Keti bisambu na beto kekatukaka na ntima na kisika ya kuvutukila bangogo ya mutindu mosi? Yibuka nde, Yezu vandaka kubaka na mbalu bangwisana mpi masolo ya kinsweki ti Tata na yandi. Na nsi-ntoto yai ya kufwa, yina bantu kekudipesa mingi na bisalu na bo, yo kele mpasi ve na kudipesa na mambu ya luzingu mpi kuvilana mambu yina kele mfunu. Kana beto kebaka ntangu ya kusamba beto mosi na mudindu, beto takangula mpenza meso na kimpeve. (Mat. 6:6, 7) Beto tapusana penepene na Yehowa, ti mpusa ya kukumisa ngolo bangwisana na beto ti yandi mpi kubuya kusala konso dyambu yina lenda bebisa yo.—Nk. 25:14.
MUTINDU YA KUKANGULA MESO NA KISALU YA KUSAMUNA
10. Inki mbandu beto kebaka na mutindu Yezu landaka kukangula meso na mabaku ya kuta kimbangi?
10 Yezu kangulaka meso na kisalu yina Yehowa pesaka yandi. Yo lenda vanda ti bisalu yankaka yina kepusaka muntu ya kesala yo na kukonda kudiyula malanda ya mpasi yina yo tanata. Kansi, bisalu mingi kelombaka dikebi ya mingi mpi kukangula meso. Kisalu ya kusamuna kele mpenza mutindu yina. Yezu kangulaka meso na kisalu na yandi, yandi vandaka kusosa mabaku sambu na kulonga nsangu ya mbote. Mumbandu, ntangu yandi ti balongoki na yandi kumaka na mbanza Sikare na nima ya kusala kitamina ya nda na suka, balongoki kwendaka kusosa madya. Yezu bikalaka penepene ya dibulu ya masa yina vandaka ntama mingi ve ti mbanza yango sambu na kupema, kansi yandi landaka kukangula meso mpi yandi sosaka dibaku ya kuta kimbangi. Nkento mosi ya bwala Samaria kwisaka kubaka masa. Yezu lendaka kupema. Yandi lendaka kuyindula bikuma yina yandi vandaka ti yo ya kubuya kusolula ti bantu. Kansi, yandi solulaka ti nkento yina mpi taka kimbangi ya ngolo yina vandaka ti bupusi na luzingu ya bantu mingi na mbanza yina. (Yoa. 4:4-26, 39-42) Keti beto lenda landa mbote-mbote mbandu ya Yezu na yina metala kukangula meso, ziku ntangu beto kesala kikesa ya kukangula mpenza meso na mabaku ya kuzabisa nsangu ya mbote na bantu yina beto kekutanaka ti bo konso kilumbu?
11, 12. (a) Inki mutindu Yezu salaka mambu ntangu bantu zolaka kukatula dikebi na kisalu na yandi? (b) Inki mutindu Yezu kumonisaka bukati-kati na yina metala kisalu na yandi?
11 Na ntangu mosi buna, bantu yina vandaka ti mabanza ya mbote sosaka kukatula dikebi ya Yezu na kisalu na yandi. Na Kapernaumi, kibuka ya bantu monaka bimangu yina Yezu salaka mpi zolaka nde yandi bikala ti bo. Dyambu yai vandaka mbi ve. Kansi, Yezu vandaka ti mukumba ya kulonga bantu yonso ya Izraele yina vandaka bonso “mameme yina me vilaka,” kansi kaka ve bantu ya mbanza mosi. (Mat. 15:24) Yo yina, yandi zabisaka bantu yina nde: “Mono fweti zabisa Nsangu ya Mbote ya Kimfumu ya Nzambi na babwala ya nkaka mpi, sambu yina kele kisina ya mambu ya Nzambi tindilaka mono.” (Luka 4:40-44) Ya kyeleka, Yezu tulaka dikebi na kisalu ya kusamuna na luzingu na yandi ya mvimba. Yandi pesaka ve nzila ata na kima mosi na kukatula dikebi na yandi.
12 Keti Yezu kudipesaka mingi na kisalu na yandi na mpila nde yandi kondaka ntangu sambu na mambu yankaka ya luzingu? Keti yandi kudipesaka mingi na kisalu ya kusamuna na mpila nde yandi vandaka kutula ve dikebi na bampusa ya mabuta? Ve, Yezu kupesaka mbandu ya mbote na yina metala bukati-kati. Yandi vandaka kusepela na luzingu, vandaka kusepela mpi na bantangu ya kyese ti banduku na yandi. Yandi vandaka kubaka mabuta na mbalu, mpi vandaka kutula dikebi ya mingi na bampusa mpi na mambu na bo, mpi na luzolo yonso yandi monisaka zola sambu na bana.—Tanga Marko 10:13-16.
13. Inki mutindu beto lenda landa mbandu ya Yezu na yina metala kukangula meso mpi kuvanda ti bukati-kati na kisalu na beto ya kusamuna Kimfumu?
13 Ntangu beto kelanda mbandu ya Yezu na yina metala kukangula meso, inki mutindu beto lenda sala kikesa sambu na kumonisa bukati-kati ya kiteso mosi? Beto keyambulaka ve nde nsi-ntoto yai kukatula dikebi na beto na kisalu na beto. Yo vanda banduku to bampangi yina kele ti mabanza ya mbote lenda pusa beto na kuyambula kisalu na beto to na kusosa mambu yina bo kemona bonso luzingu ya mbote. Kansi, kana beto landa mbandu ya Yezu, beto tamona nde kisalu na beto kele bonso madya. (Yoa. 4:34) Kisalu na beto kedisaka beto na kimpeve mpi kenatilaka beto kyese. Kansi, beto kezolaka ve kuvanda bantu ya makambu ngolo to ya lulendo, ya keyindulaka nde bo meluta bantu yankaka. Bonso Yezu, beto kezolaka kuvanda na kyese mpi bukati-kati sambu beto kele bansadi ya “Nzambi ya kiese.”—1 Tim. 1:11.
MUTINDU YA KUKANGULA MESO NA NTANGU YA BAMPASI
14. Na bantangu ya mpasi, inki bupusi beto fwete telamina mpi sambu na nki?
14 Mutindu beto mekatuka kumona yo, Yezu pesaka bandongisila yankaka na yina metala kulanda na kukangula meso ntangu yandi vandaka kukutana ti bampasi ya ngolo. (Tanga Marko 14:37.) Ntangu beto kekutanaka ti mambu ya mpasi, beto fwete yibuka mbandu ya Yezu. Na ntangu ya mpasi, bantu mingi kevilanaka kyeleka mosi ya mfunu, yina kele mfunu mingi sambu mukanda ya Bingana ketuba mbala zole nde: “Nzila ya nge ke yindula nde yo kele nzila ya mbote, yo lenda vanda nzila ya lufwa.” (Bing. 14:12; 16:25) Kana beto ketula ntima na bangindu na beto mosi, mingi-mingi ntangu beto kekutana ti mambu ya mpasi, beto lenda kuditula mpi kutula bantu yina beto kezolaka na kigonsa.
15. Inki mpukumuna lenda kumina mfumu ya dibuta ntangu mambu ya mbongo kekuma mpasi?
15 Mumbandu, mfumu mosi ya dibuta lenda kutana ti bupusi ya ngolo sambu na kulungisa bampusa ya kinsuni ya bantu ya dibuta na yandi. (1 Tim. 5:8) Yandi lenda bwa na mpukumuna ya kundima kisalu yina tasala nde yandi konda mbala na mbala na balukutakanu ya Bukristu, kutwadisa lusambu ya dibuta mpi kusala kisalu ya kusamuna. Kana yandi ketula ntima na mabanza ya bantu, dyambu ya mutindu yina lenda monana bonso nde yo kele ti kikuma, to nkutu ya mbote. Kansi, yo lenda bedisa to kufwa yandi na kimpeve. Yo tavanda mpenza mbote kana beto landa ndongisila yina kele na Bingana 3:5, 6! Salomo kutubaka nde: “Tula ntima na nge yonso na Mfumu Nzambi; kutula ntima ve na mambu ya nge mosi ke yindulaka nde nge zaba. Yindula Mfumu Nzambi na mambu yonso ya nge ke salaka, yandi ta songa nge nzila ya mbote.”
16. (a) Inki mbandu Yezu pesaka na yina metala kutula ntima na mayele ya Yehowa na kisika ya kutula ntima na mayele na yandi mosi? (b) Inki mutindu bamfumu mingi ya mabuta kelandaka mbandu ya Yezu na yina metala kutudila Yehowa ntima na bantangu ya mpasi?
16 Ntangu Yezu kutanaka ti bampasi, yandi bakaka lukanu ya kubuya kutula ntima na mayele na yandi mosi. Yindula dyambu yina! Muntu ya kuluta mayele yina mezingaka ntete ve awa na nsi-ntoto buyaka kupesa bamvutu na mayele na yandi mosi. Mumbandu ntangu Satana mekaka yandi, Yezu vandaka kupesa mvutu na kuvutukilaka bangogo yai: “Bo sonikaka na Mukanda ya Nzambi.” (Mat. 4:4, 7, 10) Yandi vandaka kutula ntima na mayele ya Tata na yandi sambu na kutelamina mpukumuna, kumonisa kudikulumusa, kikalulu yina Satana kemengaka mpi kevandaka ve ti yo ata fyoti. Keti beto kesalaka mambu kiteso mosi? Mfumu ya dibuta yina kelanda mbandu ya Yezu na yina metala kukangula meso kebikaka nde Ndinga ya Nzambi kutwadisa yandi, mingi-mingi na bantangu ya mpasi. Na nsi-ntoto ya mvimba, mafunda ya bamfumu ya mabuta kesalaka yo. Na kwikama yonso, bo ketulaka Kimfumu ya Nzambi mpi lusambu ya kyeleka na kisika ya ntete na luzingu na bo, ata na ntwala ya mambu ya kinsuni. Na kusalaka mpidina, bo ketaninaka mbote-mbote mabuta na bo. Yehowa kesakumunaka bikesa yina bo kesalaka sambu na kulungisa bampusa ya kinsuni ya mabuta na bo, kaka mutindu Ndinga na yandi kesilaka yo.—Mat. 6:33.
17. Inki kepusa nge na kulanda mbandu ya Yezu na yina metala kukangula meso?
17 Ntembe kele ve nde, Yezu pesaka mbandu ya kuluta mbote na yina metala kukangula meso. Mbandu na yandi kele mfunu, kenataka mambote, nkutu yo kegulusaka luzingu. Kuvila ve nde, Satana kele ti lukanu ya kubwisa nge na mpongi ya kimpeve disongidila kulembisa lukwikilu na nge, kukatula dikebi na nge mambu ya lusambu, mpi kupusa nge na kuyambula kwikama. (1 Tes. 5:6) Kubika ve nde yandi nunga! Landa na kukangula meso mutindu Yezu salaka—kangula meso na bisambu na nge, na kisalu na nge ya kusamuna, mpi ntangu nge kekutana ti bampasi. Kana nge kesala mutindu yina, nge tavanda ti luzingu ya mbote, ya kyese, mpi ya ngemba yo vanda na nsuka ya ngidika yai ya bima. Kukangula meso tandimisa nge mpi nde ntangu Mfumu na nge takwisa kufwa ngidika yai ya bima, yandi takuta nge ya kutelama mpi kelanda kaka kusala luzolo ya Tata na yandi. Yehowa tavanda mpenza na kyese ya kupesa nge matabisi sambu na luzingu na nge ya kwikama!—Kus. 16:15.
[Bangyufula ya disolo ya kulonguka]
[Kifwanisu ya kele na lutiti 16]
Yezu longaka nkento yina na dibulu ya masa. Inki mabaku nge kesosaka sambu na kusamuna konso kilumbu?
[Kifwanisu ya kele na lutiti 17]
Kutanina dibuta na nge na mpila nde yo vanda ti kimpeve ya mbote kemonisa nde nge kekangula meso
