Longuka na Ndinga ya Nzambi

Inki Mutindu Beto Fwete Yibuka Lufwa ya Yezu?

Disolo yai kepesaka bamvutu na bangyufula yina ziku nge mekudiyulaka mpi yo kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Inki mutindu bantu fwete yibuka lufwa ya Yezu?

Yezu zabisaka balongoki na yandi na kuyibuka lufwa na yandi na nsadisa ya madya mosi ya kifwani na kusadilaka mampa mpi vinu. Dimpa kemonisa nitu ya Yezu mpi vinu kemonisa menga na yandi.—Tanga Luka 22:19, 20.

Dimpa yina Yezu sadilaka vandaka ve ti nkisi ya mampa. Na Biblia nkisi ya mampa ketendulaka mbala mingi masumu. Yo yina, dimpa ya kukonda nkisi vandaka kidimbu ya kufwana sambu na kumonisa nitu ya kukuka ya Yezu. Yandi pesaka nitu na yandi bonso kimenga, yina yingaka bimenga ya bambisi yina bantu vandaka kupesa na nsi ya Nsiku ya Moize. (Baebreo 10:5, 9, 10) Vinu vandaka kidimbu ya menga ya kuluta mbalu ya Yezu yina tyamukaka bonso kimenga sambu na masumu na beto.​—Tanga 1 Piere 1:19; 2:24; 3:18.

2. Inki ntangu beto fwete sungimina lufwa ya Yezu?

Yezu fwaka na Paki ya Nisani 14. Kilumbu ya Bayuda vandaka kuyantika na kudinda ya ntangu. Na nkokila na ntwala ya lufwa na yandi, Yezu kudyaka madya ya Paki ti bantumwa na yandi mpi na nima yandi yantikisaka madya ya mpa ya lusungiminu sambu na kusungimina lufwa na yandi.​—Tanga Luka 22:14, 15.

Bubu yai, bantu ya Nzambi kesungiminaka mambu yina Nzambi salaka na nsadisa ya Yezu sambu na kukatula ntoto ya mvimba na kimpika ya masumu mpi ya lufwa. (Kubasika 12:5-7, 13, 17) Kaka mutindu Paki vandaka kusalama mbala mosi na mvula, Lusungiminu ya lufwa ya Yezu kesalamaka mpi mbala mosi na mvula na nima ya kudinda ya ntangu na Nisani 14 na kuwakana ti manaka ya bangonda ya Biblia.​—Tanga Yoane 1:29.

  3. Banani fwete dya dimpa mpi kunwa vinu?

Ntangu Yezu pesaka balongoki na yandi vinu, yandi tubaka nde: “Dikopa yai ke songa kuwakana ya mpa.” (1 Korinto 11:25) Kuwakana ya mpa yingaka Nsiku ya kuwakana ya Moize, yina Nzambi silaka bantu ya Izraele nde kana bo lemfukila yandi mbote-mbote bo takuma bantu na yandi kibeni. (Kubasika 19:5, 6) Kansi, bantu ya Izraele lemfukaka ve na ndinga ya Nzambi. Yo yina, Yehowa salaka kuwakana ya mpa.​—Tanga Yeremia 31:31.

Na nsadisa ya kuwakana ya mpa, Yehowa sakumunaka bantu mingi na nzila ya bantu fyoti. Bantu yina kele na kuwakana ya mpa kele mingi ve, bo kele kaka 144 000. Na nzila na bo, bamilio ya bantu na makanda yonso tabaka lusakumunu ya luzingu ya mvula na mvula na ntoto yina takituka paladisu. Bankaka yina kele na kati ya kuwakana ya mpa kesadila Yehowa na ntoto tii bubu yai. Kaka bo mpamba fwete dya dimpa mpi kunwa vinu sambu dikopa “ke songa kuwakana ya mpa.”​—Tanga Luka 12:32; Kusonga 14:1, 3.

4. Inki mutindu Lusungiminu kenatilaka beto mambote?

Lusungiminu ya lufwa ya Yezu yina kesalamaka konso mvula keyedisaka ntonda na beto sambu na zola ya Yehowa ya kuluta nene. Yandi tindaka Mwana na yandi na kufwa sambu na masumu na beto. Yo yina, ntangu beto kekwendaka na Lusungiminu, beto fwete yindululaka mambu yina lufwa ya Yezu ketendula sambu na beto. Beto fwete tadila mutindu beto lenda monisa ntonda na mambu yina Yehowa mpi Yezu mesalaka sambu na beto.​—Tanga Yoane 3:16; 2 Korinto 5:14, 15.

Sambu na kuzaba mambu mingi, tala balutiti 206-208 ya mukanda yai, Inki Biblia Kelongaka Mpenza?, yina Bambangi ya Yehowa mebasisaka.