“Lukumu ya [Yehowa] ke monikaka na ilungi na beto bonso na tala-tala.”​—2 KOR. 3:18.

INKI MVUTU NGE TAPESA?

Ata beto kele bantu ya masumu, inki mutindu beto lenda kumisa Yehowa?

Inki mutindu bisambu mpi kukwenda na balukutakanu ya Bukristu kesadisaka beto na kumonisa lukumu ya Nzambi?

Inki lenda sadisa beto na kulanda kupesa Yehowa lukumu?

1, 2. Sambu na nki yo mefwana nde beto landa mbandu ya bikalulu ya Yehowa?

 NA MUTINDU mosi buna, beto yonso kefwananaka ti bibuti na beto. Yo yina, yo tayitukisa beto ve kana beto wa muntu mosi buna kezabisa mwana mosi ya bakala nde: ‘Nge kele kaka bonso tata na nge.’ Muntu yankaka lenda zabisa mwana mosi ya nkento nde: ‘Nge kele bonso mama na nge.’ Mbala mingi, bana kelandaka mbandu ya bibuti na bo. Kansi, inki bantu lenda tuba sambu na beto? Keti beto lenda landa mbandu ya Yehowa Tata na beto ya zulu? Ata beto memonaka yandi ve, beto lenda zaba bikalulu na yandi ya kitoko na kulongukaka Ndinga na yandi, na kutalaka bima yina yandi megangaka mpi na kuyindululaka na mambu yina kele na Masonuku, mingi-mingi na bangogo mpi bisalu ya mwana na yandi Yezu Kristu. (Yoa. 1:18; Roma 1:20) Beto lenda monisa lukumu ya Yehowa.

² Na ntwala ya kuganga Adami ti Eva, Nzambi tulaka ntima nde bantu talungisa lukanu na yandi sambu na ntoto, tamonisa bikalulu na yandi mpi takumisa yandi. (Tanga Kuyantika 1:26, 27.) Ntangu beto kekudipesa na Nzambi, beto fwete monisa bikalulu ya Muntu yina gangaka beto. Kana beto sala buna, beto tavanda ti dibaku ya mbote ya kumonisa lukumu ya Nzambi, yo vanda nsi yina beto kele, banzo-nkanda yina beto mesalaka, to binkulu yina beto meyelaka ti yo. Sambu na nki? Sambu “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.”​—Bis. 10:34, 35.

3. Inki mawi Bakristu lenda vanda ti yo ntangu bo kesadila Yehowa?

³ Bakristu bapakulami kemonisaka lukumu ya Yehowa. Ntumwa Polo yina pakulamaka na mpeve sonikaka nde: “Beto bantu yonso yina ke na lele ve na meso, lukumu ya Mfumu ke monikaka na ilungi na beto bonso na tala-tala. . . . Mpidina Mfumu ke kumisaka  beto bonso yandi mpenza.” (2 Kor. 3:18) Ntangu mbikudi Moize kulumukaka na Ngumba ya Sinai ti matadi yina vandaka ti Bansiku Kumi, ilungi na yandi vandaka kusema bonso ntangu sambu yandi solulaka ti Yehowa. (Kub. 34:29, 30) Ata Bakristu kemonaka ve mambu ya mutindu yina mpi ilungi na bo kesemaka ve, bo kevandaka na kyese ntangu bo kezabisaka bantu yankaka mambu ya metala Yehowa, bikalulu na yandi mpi lukanu na yandi ya mbote sambu na bantu. Yo vanda beto kele Bakristu bapakulami to mameme yankaka, beto yonso kele bonso ba-talatala na mutindu beto kemonisaka lukumu ya Yehowa na luzingu mpi na kisalu na beto ya kusamuna. (2 Kor. 4:1) Keti nge kemonisaka lukumu ya Yehowa na bikalulu na nge ya mbote mpi na kusamunaka nsangu ya Kimfumu mbala na mbala?

BETO FWETE MONISA LUKUMU YA YEHOWA

4, 5. (a) Bonso Polo, inki mvita beto kenwanaka? (b) Inki mutindu disumu kevandaka ti bupusi na luzingu na beto?

⁴ Sambu beto kele bansadi ya Yehowa, beto kezolaka kupesa yandi lukumu mpi kukumisa Ngangi na beto na mambu yonso. Kansi, mbala mingi beto kesalaka ve mambu yina beto kezolaka kusala. Polo mpi nwanaka ti dyambu yai na luzingu na yandi. (Tanga Roma 7:21-25.) Sambu na kutendula kikuma ya mvita yina, Polo sonikaka nde: “Bantu yonso me salaka masumu, bo ke na lukumu ya Nzambi mpi ve.” (Roma 3:23) Ya kyeleka, sambu bo bakaka masumu na Adami, bantu yonso mekumaka bampika ya “Masumu.”​—Roma 5:12; 6:12.

⁵ Disumu kele nki? Disumu kele mambu yonso ya kewakana ve ti kimuntu, banzila, minsiku mpi luzolo ya Yehowa. Disumu kebebisaka bangwisana ya muntu ti Nzambi. Bonso muntu ya keta tolotolo kansi yo kesimba ve kima yina yandi kekana, disumu kesalaka nde beto lungisa ve lukanu na beto. Beto lenda sala disumu kukonda kuzaba to na luzolo. (Kut. 15:27-31) Disumu mekotilaka mpenza bantu mpi yo kesalaka nde bo kabwana ti Ngangi na bo. (Nk. 51:7; Yez. 59:2; Kol. 1:21) Kansi, bantu yonso kezingaka dyaka ve na kuwakana ti Yehowa mpi kevandaka ve ti dibaku ya mbalu ya kumonisa lukumu ya Nzambi. Ntembe kele ve nde, disumu kele kimbefo ya nene ya kenyokulaka bantu.

6. Ata beto kele bantu ya masumu, inki mutindu beto lenda monisa lukumu ya Nzambi?

⁶ Ata beto kele bantu ya masumu, Yehowa memonanaka Nzambi yina kepesaka kivuvu. (Roma 15:13) Yandi monisaka mutindu ya kukatula disumu​—kimenga ya nkudulu ya Yezu Kristu. Ntangu beto ketulaka lukwikilu na kimenga yina, beto kevandaka dyaka ve “bampika ya masumu,” kansi beto kele ti makuki ya kumonisa lukumu ya Nzambi. (Roma 5:19; 6:6; Yoa. 3:16) Mutindu beto ketaninaka bangwisana ya mbote ti Yehowa kesalaka nde yandi sakumuna beto bubu yai mpi na makwisa beto tabaka luzingu ya mvula na mvula na nitu ya kukuka. Ata beto kele kaka bantu ya masumu, yo kele mpenza lusakumunu na kuzaba nde Nzambi kebakaka beto bonso bantu yina lenda monisa lukumu na yandi!

MONISA LUKUMU YA YEHOWA

7. Inki beto fwete zaba na yina metala kimuntu na beto sambu na kumonisa lukumu ya Nzambi?

⁷ Sambu na kumonisa mbote-mbote lukumu ya Nzambi, beto fwete bakisa nde beto kele bantu ya masumu. (2 Bans. 6:36) Beto fwete ndima nde beto kele bantu yina kesalaka bifu mpi beto fwete sala kikesa sambu na kuyala yo na mpila nde beto yela mpi kumonisa mpenza lukumu ya Nzambi. Mumbandu, kana beto salaka masumu ya kutala bifwanisu ya kemonisa bantu kinkonga, beto fwete ndima lusadisu ya kimpeve​—kusala bikesa sambu na kubaka lusadisu yina. (Yak. 5:14, 15) Kusala buna tavanda kitambi ya ntete sambu na kuvanda ti luzingu yina kepesa mpenza Nzambi lukumu. Sambu beto  kele bansambidi ya Yehowa, beto fwete landa na kuditadila mbote-mbote sambu na kuzaba kana beto kesadila mbote bansiku na yandi ya lunungu. (Bing. 28:18; 1 Kor. 10:12) Yo vanda disumu na beto kele ya nki mutindu, beto fwete bumba yo ve sambu beto monisa lukumu ya Nzambi.

8. Ata beto kele bantu ya kukonda kukuka, inki beto fwete sala?

⁸ Kaka Yezu muntu mezingaka mpi mefwaka na kumonisaka ntangu yonso mpusa ya kusepedisa Nzambi mpi kumonisa lukumu na yandi. Ata beto kele ve bantu ya kukuka bonso Yezu, beto fwete sala bikesa sambu na kulanda mbandu na yandi. (1 Pie. 2:21) Yehowa ketulaka dikebi na bikesa na beto ntangu beto kekwendaka na ntwala, mpi yandi kesakumunaka bikesa yina beto kesalaka sambu na kupesa yandi lukumu.

9. Inki kele mfunu ya Biblia na luzingu na beto Bakristu ya kezola kuzitisa bansiku ya Nzambi?

⁹ Biblia Ndinga ya Yehowa lenda sadisa beto na kubakisa mutindu beto lenda monisa mbote-mbote lukumu ya Nzambi. Kulonguka mbote-mbote Masonuku mpi kuyindulula mambu yina beto ketangaka na Biblia kele mfunu. (Nk. 1:1-3) Kutanga Masonuku konso kilumbu tasadisa beto na kusala bansoba. (Tanga Yakobo 1:22-25.) Nzayilu ya Biblia kele kisina ya lukwikilu na beto mpi nzila yina kekumisa ngolo lukanu na beto ya kubuya masumu mpi kusepedisa Yehowa.​—Nk. 119:11, 47, 48.

10. Inki mutindu kisambu lenda sadisa beto na kusadila Yehowa mbote-mbote?

¹⁰ Sambu na kumonisa lukumu ya Nzambi, beto fwete “samba Nzambi konso ntangu.” (Roma 12:12) Beto fwete samba Yehowa sambu yandi sadisa beto na kusadila yandi na mutindu ya mbote. Yo yina, yo mefwana nde beto lomba mpeve santu na yandi sambu yo pesa beto lukwikilu, ngolo ya kutelamina mpukumuna mpi makuki ya ‘kuzabisa nsangu ya kieleka mbote-mbote.’ (2 Tim. 2:15; Mat. 6:13; Luka 11:13; 17:5) Mutindu mwana ketulaka ntima na tata na yandi, beto mpi fwete tula ntima na Yehowa Tata na beto ya zulu. Kana beto lomba yandi lusadisu sambu na kusadila yandi mbote-mbote, beto lenda tula kivuvu nde yandi tasadisa beto. Beto yindula ata fyoti ve nde beto keyangisa yandi! Kansi, bika beto kumisa yandi na bisambu na beto, beto monisila yandi ntonda, beto sosa lutwadisu na yandi mingi-mingi na ntangu ya mpasi mpi kulomba nde yandi sadisa beto na kusadila yandi na mutindu yina tapesa zina na yandi ya lukumu.​—Nk. 86:12; Yak. 1:5-7.

11. Inki mutindu balukutakanu kesadisaka beto na kumonisa lukumu ya Nzambi?

¹¹ Nzambi mepesaka ‘mpika ya kwikama mpi ya mayele’ mukumba ya kukeba mameme na yandi ya mbalu mingi. (Mat. 24:45-47; Nk. 100:3) Kimvuka ya mpika ketulaka dikebi na mutindu bampangi Bakristu kele na kumonisa lukumu ya Yehowa. Balukutakanu na beto ketungaka kimuntu na beto bansadi ya Nzambi, kaka mutindu beto kezolaka nde bo tunga lele na beto na mpila nde beto basika mbote. (Baeb. 10:24, 25) Kansi, bika beto vanda ti kikalulu ya kukwenda na balukutakanu na ntangu ya mbote sambu kana beto kele ti kikalulu ya kukwenda na nsukinina, beto kevidisa madya yankaka ya kimpeve yina kele mfunu sambu na ‘kutunga’ kimuntu na beto mutindu beto kele bansadi ya Yehowa.

BIKA BETO LANDA MBANDU YA NZAMBI

12. Inki mutindu beto lenda landa mbandu ya Nzambi?

¹² Kana beto kezola kumonisa lukumu ya Yehowa, beto fwete ‘sala bonso yandi.’ (Ef. 5:1) Mutindu mosi ya kulanda mbandu ya Yehowa kele ya kutadila mambu mutindu yandi ketadilaka yo. Kusala mambu na mutindu yankaka kepesaka yandi nsoni mpi kenatilaka beto mpasi. Sambu nsi-ntoto yai ya beto kezinga kele na nsi ya kiyeka ya muntu ya mbi disongidila Satana Dyabulu, beto fwete sala bikesa sambu na kumenga mambu yina Nzambi kemengaka mpi kuzola mambu yina yandi kezolaka. (Nk. 97:10; 1 Yoa. 5:19) Beto fwete vanda ti kivuvu ya ngolo nde kusala mambu yonso sambu na kupesa yandi lukumu  kele mutindu mosi kaka ya mbote ya kusadila yandi.​—Tanga 1 Korinto 10:31.

13. Sambu na nki beto fwete menga masumu mpi kumenga masumu fwete pusa beto na kusala nki?

¹³ Yehowa kemengaka masumu, beto mpi fwete menga yo. Ya kyeleka, beto fwete buya mambu yina Nzambi kebuyaka mpi kubuya mambu yonso yina lenda pusa beto na kusala masumu. Mumbandu, beto fwete bwa ve na mutambu ya baaposta yina kele disumu ya tasala nde beto pesa ve Nzambi lukumu. (Kul. 13:6-9) Kansi, bika beto vanda ve ti bangwisana ti baaposta to konso muntu yina ketuba nde yandi kele nsadi ya Nzambi kansi ya kesalaka mambu ya mbi. Beto fwete sala mutindu yina ata muntu yango kele mpangi na beto ya dibuta. (1 Kor. 5:11) Beto tabaka ve mambote ntangu beto kepesa bantendula na bantembe ya baaposta to ya bantu yina ketubilaka organizasio ya Yehowa na mutindu ya mbi. Ya kyeleka, kutanga mambu na bo yo vanda na mukanda mosi buna to na nzila ya Internet kele mpenza kigonsa mpi mbi sambu na kimpeve na beto.​—Tanga Yezaya 5:20; Matayo 7:6.

14. Ntangu beto kezola kumonisa lukumu ya Nzambi, inki kikalulu lenda monana na kati na beto mpi sambu na nki?

¹⁴ Kumonisa zola kele mutindu ya mbote ya kulanda mbandu ya Tata na beto ya zulu. Ya kyeleka, beto fwete zolanaka bonso yandi. (1 Yoa. 4:16-19) Yo yina, zola yina beto kevandaka ti yo na kati na beto kemonisaka nde beto kele balongoki ya Yezu mpi bansadi ya Yehowa. (Yoa. 13:34, 35) Ata nkadilu na beto ya masumu lenda pusa beto na kumenga bantu yankaka, beto fwete telamina yo mpi kumonisa zola ntangu yonso. Kuyedisa zola mpi bikalulu yankaka ya mbote tasadisa beto na kusala ve masumu.​—2 Pie. 1:5-7.

15. Inki mutindu zola kevandaka ti bupusi na bangwisana na beto ti bankaka?

¹⁵ Zola kepusaka beto na kusadila bankaka mambu ya mbote. (Roma 13:8-10) Mumbandu, zola sambu na nkento na yandi tasala nde bakala kuzola ve nkento yankaka. Zola sambu na bankuluntu mpi luzitu sambu na kisalu yina bo kesalaka tasadisa beto na kulemfuka mpi kundima lutwadisu na bo. Bana yina kezolaka bibuti na bo, kelemfukaka, kepesaka bo lukumu mpi ketubaka ve mambu ya mbi sambu na bo. Kana beto kezola bantu yonso, beto tatadila bo ve bonso bantu ya kukonda mfunu to tatubila bo ve ti kukonda luzitu. (Yak. 3:9) Bankuluntu yina kezolaka mameme ya Nzambi tasadila bo mambu na mawete.​—Bis. 20:28, 29.

16. Inki mutindu kumonisa zola kesadisaka beto na kisalu ya kusamuna?

¹⁶ Zola na beto fwete monana mpi na kisalu ya kusamuna. Sambu na zola ya nene yina beto kevandaka ti yo sambu na Yehowa, beto tapesa ve nzila nde kukonda dikebi to bamvutu ya mbi yina bantu yankaka kepesaka beto na kisalu ya kusamuna kulembisa beto. Kansi, beto fwete landa na kusamuna nsangu ya mbote. Zola tapusa beto na kudibongisa mbote mpi na kulonga mbote-mbote na kisalu ya kusamuna. Kana beto kezolaka mpenza Yehowa mpi bamfinangani na beto, beto tamona ve nde kisalu ya kusamuna Kimfumu kele kilo to mpasi. Kansi, beto tabaka yo bonso mukumba ya nene mpi talungisa yo na kyese yonso.​—Mat. 10:7.

LANDA NA KUPESA NZAMBI LUKUMU

17. Kubakisaka nde disumu kekangaka beto nzila ya kupesa Nzambi lukumu, inki mambu beto fwete sala?

¹⁷ Bantu ya nsi-ntoto kebakisaka ve bunene ya disumu kansi beto kezabaka yo. Dyambu yai kesalaka nde beto bakisa mfunu ya kunwana ti kimuntu na beto ya masumu. Kubakisa kimuntu na beto ya masumu kesadisaka beto na kulonga kansansa na beto na mpila nde yo pusa beto na kusala mambu na mutindu ya mbote ntangu mpusa ya kusala masumu keyantika kuyela na mabanza mpi na ntima na beto. (Roma 7:22, 23) Ya kyeleka, beto lenda lemba kansi Nzambi lenda pesa beto ngolo ya kusala mambu ya mbote na konso dyambu yina.​—2 Kor. 12:10.

18, 19. (a) Inki kesadisaka beto na kununga mvita yina beto kenwanaka ti bampeve ya mbi? (b) Inki lukanu beto fwete baka?

 ¹⁸ Kana beto kezola kupesa Yehowa lukumu, beto fwete nwana mpi ti bampeve ya mbi. Binwaninu ya kimpeve yina Nzambi mepesaka beto kesadisaka beto na kununga. (Ef. 6:11-13) Satana kesalaka yonso sambu na kubaka lukumu yina Yehowa mpamba mefwana na kubaka. Dyabulu kelandaka na kusala bikesa sambu na kubebisa bangwisana na beto ti Yehowa. Kansi, yandi kewaka mpenza nsoni ntangu bamilio ya bantu ya kukonda kukuka, disongidila babakala, bankento mpi bana kebikalaka ya kwikama mpi kepesaka Nzambi lukumu! Yo yina, bika beto landa kukumisa Yehowa bonso bawanzyo yina ketubaka nde: “Nge Mfumu Nzambi na beto, nge me lunga na kubaka lukumu, luzitu ti ngolo. Sambu nge muntu salaka bima yonso; bima yonso ke zingaka, bo ke na moyo kaka sambu na luzolo na nge.”​—Kus. 4:11.

¹⁹ Bika nde beto baka lukanu ya kulanda kupesa Yehowa lukumu yo vanda na konso dyambu yina beto kekutana ti yo. Ya kyeleka, yandi kevandaka na kyese na kumona nde konso muntu na kati na beto kesalaka kikesa ya kulanda mbandu mpi kumonisa lukumu na yandi. (Bing. 27:11) Bika nde mawi na beto kuvanda bonso ya Davidi yina yimbaka nde: “Mfumu Nzambi na mono, mono ta kumisa nge na ntima na mono yonso, mono ta kumisa zina na nge tii kuna.” (Nk. 86:12) Beto kevingilaka mpenza ntangu yina beto tamonisa lukumu ya Yehowa na mutindu ya kukuka mpi lenda pesa yandi lukumu kimakulu! Bantu ya bulemfu tavanda na kyese ya mutindu yina. Keti nge kemonisaka lukumu ya Yehowa Nzambi bubu yai ti lukanu ya kusala yo kimakulu?

[Bangyufula ya disolo ya kulonguka]

[Bifwanisu ya kele na lutiti 30]

Keti nge kemonisaka lukumu ya Yehowa na mitindu yai?