Keti Bubu Yai Bakristu Fwete Kota na Mambu ya Politiki?

BUBU yai Bakristu ya kyeleka kekotaka ve na mambu ya politiki. Sambu na nki? Sambu bo kelandaka mbandu ya Yezu. Yandi tubaka sambu na yandi mosi nde: ‘Mono kele muntu ya nsi-ntoto yai ve.’ Mpi sambu na balongoki na yandi, yandi tubaka nde: “Beno mpi kele bantu ya nsi-ntoto ve.” (Yoane 15:19; 17:14) Beto tadila mwa bikuma yina Bakristu fwete kota ve na mambu ya politiki.

1. Makuki ya bantu kele ti bandilu. Biblia ketubaka nde bantu kele ve ti makuki ya kudiyala mpi bo kevandaka ve ti nswa ya kuditwadisa. Mbikudi Yeremia sonikaka nde: “Ke na muntu ve lenda songa nzila na makulu na yandi ntangu yandi ke tambula.”​—Yeremia 10:23.

Kaka mutindu Nzambi megangaka ve bantu ti makuki ya kupumbuka na ngolo na bo mosi, yandi megangaka bo mpi ve sambu na kudiyala. Na yina metala bandilu yina baluyalu kevandaka na yo, David Fromkin, muntu mosi ya mayele sonikaka na mukanda mosi (The Question of Government) nde: “Baluyalu ketwadisamaka na bantu; yo yina, bo kenungaka ve mpi balukanu na bo kelunganaka ve. Bo kevandaka ti mwa ngolo kansi ngolo yango kevandaka ti bandilu.” Yo yina, Biblia kekebisaka beto na kutudila ve bantu ntima!​—Nkunga 146:3.

2. Bampeve ya mbi ketwadisa nsi-ntoto bubu yai. Ntangu Satana zolaka kupesa yandi bimfumu ya nsi-ntoto, Yezu buyaka ve nde Dyabulu kuvandaka ve ti kiyeka ya kupesa yandi bimfumu yonso ya nsi-ntoto. Nkutu, kilumbu mosi Yezu bingaka Satana “mfumu ya nsi-ntoto yai.” Bamvula mingi na nima  ntumwa Polo bingaka Satana “nzambi ya ntangu yai.” (Yoane 14:30; 2 Korinto 4:4) Polo sonikilaka bampangi na yandi Bakristu nde: “Beto ke nwanaka . . . ti bampeve yina ke yalaka nsi yai ya mpimpa, ti bampeve ya mbi yina kele na zulu.” (Efezo 6:12) Ata bantu kezabaka yo ve, bampeve ya mbi bantu keyalaka nsi-ntoto. Inki mutindu dyambu yai lenda vanda ti bupusi na mutindu beto ketadilaka mambu ya politiki?

Kaka mutindu kitembo ya ngolo kenataka bamaswa ya fyoti konso ndambu, bangidika ya bantu ya politiki ketwadisama na bampeve ya mbi mpi ya ngolo. Kaka mutindu bantu yina kesalaka na maswa lenda sala ve ata kima mosi sambu na kulembika kitembo yina ya ngolo, bantu ya politiki mpi lenda sala ve ata kima mosi sambu na kusoba bupusi ya bampeve yina ya mbi mpi ya ngolo. Lukanu ya bampeve yina kevandaka ya kubebisa mpenza bantu mpi kunata “mawa mingi na ntoto.” (Kusonga 12:12) Yo yina, kaka muntu yina meluta Satana mpi bampeve na yandi na ngolo muntu lenda sala bansoba ya kyeleka. Muntu yango kele Yehowa Nzambi yandi mosi.​—Nkunga 83:19; Yeremia 10:7, 10.

3. Bakristu ya kyeleka kevandaka ya kwikama na Kimfumu ya Nzambi. Yezu mpi balongoki na yandi zabaka nde na ntangu mosi buna, Nzambi tatula luyalu mosi yina tayala ntoto ya mvimba tuka na zulu. Biblia kebingaka luyalu yango Kimfumu ya Nzambi mpi kemonisaka nde Nzambi meponaka Yezu Kristu na kuvanda Ntotila. (Kusonga 11:15) Sambu Kimfumu yina ketadila bantu yonso, “nsangu ya mbote ya Kimfumu ya Nzambi” vandaka ntu-dyambu ya malongi ya Yezu. (Luka 4:43) Yandi longaka mpi balongoki na yandi na kusamba nde: ‘Bika Kimfumu na nge kukwisa.’ Sambu na nki? Sambu na nsi ya Kimfumu yina, luzolo ya Nzambi tasalama mpenza na zulu mpi na ntoto.​—Matayo 6:9, 10.

Kansi, inki takumina baluyalu ya bantu? Biblia kepesa mvutu nde Nzambi tafwa baluyalu “ya ntoto ya mvimba.” (Kusonga 16:14; 19:19-21) Kana muntu mosi kekwikila mpenza nde kubika fyoti Kimfumu ya Nzambi tafwa bangidika yonso ya politiki, ntembe kele ve nde yandi tabuya kupesa maboko na bangidika yina. Nkutu, kana yandi kepesa maboko na baluyalu yina Nzambi tafwa, yandi ketelamina Yehowa.

[Bangogo sambu na kubenda dikebi ya kele na lutiti 6]

Bambangi ya Yehowa kekudipesaka na bisalu yina kepesaka maboko na Kimfumu ya Nzambi kansi ve na mambu ya politiki