Kuvanda Mukristu mpi Muntu ya Insi Yina Kezitisa Bansiku Inki Mutindu?

INKI vandaka mambu zole ya mfunu na kisalu ya kusamuna ya Yezu? Ya ntete, Yezu sosaka kusoba bantima ya bantu, kansi ve bimvuka ya politiki. Mu mbandu, tala mambu yina Yezu bendaka dikebi na Disolo na yandi na Zulu ya Ngumba. Na ntwala ya kutubila mfunu ya kuvanda bonso mungwa mpi mwinda, Yezu zabisaka bawi na yandi nde bantu yina “kele na nzala ya mambu ya kimpeve, NW” kevandaka na kyese ya kyeleka. Yandi yikaka nde: “Kiese na bantu yina kele pima, . . . yina kele ntima-mpembe . . . yina ke kotisaka ngemba na kati ya bantu.” (Matayo 5:1-11) Yezu sadisaka balongoki na yandi na kubakisa nde mabanza mpi mawi na bo fwete wakana ti minsiku ya Nzambi na yina metala mambu ya mbote ti ya mbi mpi nde yo kele mfunu na kusadila Nzambi na ntima ya mvimba.

Ya zole, ntangu Yezu monaka bantu kenyokwama, mawa yina yandi vandaka na yo sambu na bo pusaka yandi na kulembika bampasi na bo. Ata mpidina, lukanu na yandi vandaka ve ya kumanisa bampasi yonso ya bantu. (Matayo 20:30-34) Yandi belulaka bambefo, kansi kimbefo kumanaka ve. (Luka 6:17-19) Yandi lembikaka bampasi ya bantu yina vandaka kunyokwama, kansi kukonda lunungu landaka kunyokula bantu. Yandi disaka bantu yina vandakan na nzala, kansi nzala kumanaka.​—Marko 6:41-44.

Kusoba Bantima mpi Kulembika Bampasi

Sambu na nki Yezu tulaka dikebi ya mingi na kusoba bantima ya bantu mpi kulembika bampasi ya bantu kansi ve na kusoba bimvuka ya politiki to kumanisa bampasi na bo? Yezu zabaka nde Nzambi kele ti lukanu ya kusadila Kimfumu na yandi sambu na kufwa baluyalu yonso ya bantu mpi kumanisa mambu yonso yina kele na kisina ya bampasi. (Luka 4:43; 8:1) Yo yina, ntangu balongoki longisilaka Yezu na kulutisa ntangu mingi na kubelula bantu, yandi tubilaka bo nde: “Beto kwenda na kisika ya nkaka na babwala yai kele awa penepene, sambu mono kwenda kulonga mpi kuna. Sambu yo kele mambu ya mono kwisilaka.” (Marko 1:32-38) Yezu lembikaka bampasi ya bantu mingi, kansi yandi tulaka kisalu ya kusamuna mpi kulonga Ndinga ya Nzambi na kisika ya ntete.

Bubu yai na kisalu na bo ya kusamuna, Bambangi ya Yehowa kesalaka bikesa sambu na kulanda mbandu ya Yezu. Bo kesalaka yonso sambu na kulembika bampasi ntangu bo kesadisaka bansukami. Kansi Bambangi kesalaka ve bikesa sambu na kumanisa kukonda lunungu na nsi-ntoto. Bo kendimaka nde Kimfumu ya Nzambi tamanisa mambu yonso yina kele na kisina ya bampasi. (Matayo 6:10) Bonso Yezu, bo kesalaka kikesa sambu na kusoba bantima ya bantu kansi ve bimvuka ya politiki. Kusala mutindu yai kele mbote sambu bampasi ya nene yina kenyokula bantu kekatukaka na bikalulu ya bantu kansi ve na mambu ya politiki.

Bantu ya Insi Yina Kezitisaka Bansiku

Bambangi ya Yehowa kekwikilaka nde Bakristu kele ti mukumba ya kuzitisa bansiku ya insi na bo. Yo yina, bo kezitisaka bamfumu ya luyalu. Na nsadisa ya mikanda mpi ya kisalu na bo ya kusamuna, Bakristu kesyamisaka bamfinangani na bo na kuzitisa bansiku. Kansi, ntangu luyalu mosi melomba bo na kusala mambu yina kewakana ve ti bansiku ya Nzambi, Bambangi ya Yehowa kelemfukaka ve. Bo ‘kelemfukaka ntete na  Nzambi, kansi na bantu ve.’​—Bisalu 5:29; Roma 13:1-7.

Bambangi ya Yehowa kekwendaka kulonguka Biblia ti bamfinangani na bo kukonda kulomba mbongo. Kisalu yai mesobaka bamilio ya bantima. Konso mvula, Bambangi kesadisaka bantu mingi na kuyambula bikalulu ya mbi bonso kunwa makaya, kulauka malafu, kusadila bima yina kelausaka, bansaka ya mbongo mpi kuvukisa nitu na mitindu ya mbi. Bantu yango kekumaka ti bikalulu ya mbote mpi bantu ya insi yina kezitisaka bansiku sambu bo kelongukaka kusadila minsiku ya Biblia na luzingu na bo.

Dyaka, malongi ya Biblia kesadisaka konso muntu na kati ya dibuta na kuzitisana mpi kusolula mbote disongidila, tata ti mama, bibuti ti bana mpi bana bo na bo. Mambu yai kekumisaka bangwisana ya dibuta ngolo. Mpidina, mabuta ya ngolo ketungaka bimvuka ya ngolo.

Na nima ya kutadila mambu ya mfunu yina bo metubila na masolo yai, inki nge keyindula: Keti Biblia kendimaka bantu yina kevukisaka dibundu mpi mambu ya politiki? Mvutu kele pwelele nde ve. Kansi, keti Bakristu ya kyeleka fwete vanda bantu ya insi yina kezitisaka bansiku? Ee. Inki mutindu bo lenda sala yo? Na kulandaka ntuma ya Yezu ya kuvanda bonso mungwa mpi mwinda sambu na bantu.

Bantu yina kesala bikesa sambu na kusadila bandongisila ya Kristu tabaka balusakumunu, yika mpi mabuta na bo ti bamfinangani na bo. Bambangi ya Yehowa ya kele na kisika yina nge kezingaka tavanda na kyese ya kuzabisa nge mambu mingi na yina metala malongi ya Biblia yina bo kezabisaka bamfinangani na nge. *

[Noti na nsi ya lutiti]

[Bangogo sambu na kubenda dikebi ya kele na lutiti 7]

Yezu sosaka kusoba bantima, kansi ve bimvuka ya politiki

[Bangogo sambu na kubenda dikebi ya kele na lutiti 8]

Bambangi ya Yehowa kekwikilaka nde Bakristu kele ti mukumba ya kuzitisa bansiku ya insi na bo