Bambikudulu Kelunganaka

‘Nzambi na beno, mesalaka mambu yonso ya yandi tubaka. Ata kima mosi mebikalaka ve.’​—YOZUE 23:14.

INKI MUTINDU BIBLIA MESWASWANA TI MIKANDA YANKAKA? Mambu yina banganga-Nzambi ya ntama vandaka kulonga sambu na makwisa vandaka ya pwelele ve mpi ya mefwana ve na kutudila ntima; yo kele mpi kiteso mosi bubu yai sambu na bantu yina ketalaka bidimbu ya nsaka ya shanse (horoscope). Ata mayele ya siansi yina kelongukaka makwisa na kutadila mutindu mambu kesalama bubu yai (futurologie), kekukaka ve kuzabisa bamvu-nkama mingi na ntwala mambu ya sikisiki yina tasalama. Kansi, bambikudulu ya Biblia kezabisaka mambu na sikisiki mpi kelunganaka ntangu yonso, ata ntangu yo ketubilaka “na ntwala mambu yina me [salama] ntete ve.”​—Yezaya 46:10.

MBANDU: Na mvu-nkama ya sambanu N.T.B., mbikudi Daniele monaka mbonameso mosi yina vandaka kutubila mutindu Grese tanunga Medo-Persia kukonda kusukinina. Mbikudulu yango tubaka mpi nde kaka na ntangu yina ntotila ya Grese ‘takuma ngolo mingi’ kimfumu na yandi ‘tafwa.’ Nani zolaka kuyinga yandi? Daniele sonikaka nde: ‘Bimfumu iya tayinga kimfumu ya ntete, kansi yo taluta ve kimfumu ya ntete na ngolo.’​—Daniele 8:5-8, 20-22.

MAMBU YINA BANTU YA ISTWARE KETUBA: Bamvula kuluta 200 na nima ya nsungi ya Daniele, Alexandre le Grand kumaka ntotila ya Grese. Na nima ya bamvula kumi, yandi nungaka Medo-Persia mpi kumisaka kimfumu ya Grese nene tii na nzadi Inde (yina kele bubu yai na Pakistan). Kansi, yandi fwaka na kintulumukina ti bamvula 32. Nsukansuka, mvita yina salamaka penepene ya bwala Ipsus na Asie Mineure panzaka kintinu na yandi. Na nima, bantu iya yina nungaka mvita kabulaka Kintinu ya Grese na bitini iya. Kansi, ata muntu mosi ve kumaka ngolo mingi bonso Alexandre.

INKI NGE KEYINDULA? Keti yo kele ti mukanda yankaka yina lenda monisa nde bambikudulu na yo yonso kelunganaka? To keti nge memona nde Biblia meswaswana ti mikanda yankaka?

[Bangogo sambu na kubenda dikebi ya kele na lutiti 4]

“Biblia kele ti bambikudulu . . . mingi mpenza na mpila nde yo lenda salama ve nde bambikudulu yango kulungana kaka na kintulumukina.”​—A LAWYER EXAMINES THE BIBLE, BY IRWIN H. LINTON

[Bangogo ya kemonisa kisina ya foto ya kele na lutiti 4]

© Robert Harding Picture Library/SuperStock