Keti Yo Mefwanana ti Mikanda Yankaka?

“Masonuku yonso kele ya kupemama na Nzambi mpi yo kele mfunu . . . , na mpila nde muntu ya Nzambi kuvanda ya kukuka kibeni, mpi ya kufwana kibeni sambu na konso kisalu ya mbote.”​—2 TIMOTEO 3:16, 17, NW.

BANTU yankaka kendimaka ve nde bangogo yai kele na zulu kele ya kyeleka. Ebuna nge? Keti nge kemonaka Biblia bonso:

• Mukanda mosi yina bo mesonikaka mbote mpenza?

• Mosi ya mikanda ya Santu yina bantu kebakaka na mbalu mingi?

• Mukanda mosi ya masapu kansi ya kele ti malongi ya bikalulu ya mbote?

• Ndinga ya Nzambi?

Ngyufula yankaka kele nde: Keti mambu yina nge kekwikilaka kele mpenza na mfunu? Tala mambu yina Biblia ketuba: ‘Mambu yonso ya bo sonikaka na mukanda ya Nzambi, bo sonikaka yo sambu na kulonga beto na mpila nde beto kanga ntima, beto vanda kikesa na kuvingila mambu yina ya Nzambi silaka beto.’ (Roma 15:4) Biblia kemonisa nde bo sonikaka yo sambu na kulonga beto, kupesa beto kikesa mpi kivuvu.

Kansi, kana Biblia vandaka kaka mukanda mosi yina bo mesonikaka mbote to mosi ya mikanda ya santu, keti nge zolaka kundima nde yo longa nge mpi yo twadisa dibuta na nge, mingi-mingi kana malongi na yo meswaswana ti yina nge keyindulaka nde yo kele mbote? Kana Biblia vandaka kaka mukanda mosi ya mefuluka ti masolo ya luvunu, keti balusilu na yo zolaka kupesa nge kikesa mpi kivuvu?

Na ndambu yankaka, bamilio ya bantu yina melonguka Biblia mekwikila nde yo kele mpenza Ndinga ya Nzambi. Sambu na nki? Inki keswaswanisa Biblia ti mikanda yankaka? Beto kelomba nge na kutanga masolo yai kelanda sambu na kuzaba mambu tanu yina keswaswanisa Biblia ti mikanda yankaka.