“Nani Mono Lenda Tina Boma?”
“Nani Mono Lenda Tina Boma?”
“Ata bambeni kunwanisa mono, mono fweti tula ntima kaka na Mfumu Nzambi.”—NK. 27:3.
INKI MUTINDU BAVERSE YAI KESADISA NGE NA KUVANDA KIKESA?
1. Nkunga 27 tapesa beto bamvutu na nki bangyufula?
SAMBU na nki kisalu na beto ya kusamuna kelanda kuyela ata mambu kekuma kaka mpasi na nsi-ntoto? Sambu na nki beto kepesaka na luzolo yonso ntangu mpi ngolo na beto ata bantu yankaka kekutana ti bampasi ya mbongo? Inki mutindu beto lenda landa kuvanda kikesa ntangu bantu yankaka kewa boma na mambu yina tasalama na bilumbu kekwisa? Nkunga 27, yina Ntotila Davidi sonikaka kepesa beto bamvutu.
2. Boma ya ngolo kesalaka nki na nitu ya muntu, kansi nki kivuvu beto kele ti yo?
2 Davidi yantikaka nkunga yango na bangogo yai: “[Yehowa] kele mwinda na mono, yandi muntu ke gulusaka mono, nani mono lenda tina boma? Mfumu Nzambi ke taninaka mono na bigonsa yonso, nki mono lenda tekitila?” (Nk. 27:1) Matekita, to boma ya ngolo, lenda lembisa mpenza muntu na mpila nde yandi konda makuki ya kusala ata kima mosi. Kansi muntu yina ketulaka ntima na Yehowa kevandaka ti kikesa mpi kewaka ve boma. (1 Pie. 3:14) Kana Yehowa kele kisika na beto ya ngolo, beto ‘tavanda mbote mpi tazinga na ngemba kukonda boma.’ (Bing. 1:33; 3:25) Sambu na nki?
YEHOWA “KELE MWINDA NA MONO, YANDI MUNTU KE GULUSAKA MONO”
3. Na nki mutindu Yehowa kele mwinda na beto, kansi beto fwete sala nki?
3 Ntangu Biblia ketuba nde Yehowa “kele mwinda na mono” yo kemonisa nde, Yehowa kekatulaka beto na kimpika ya kukonda nzayilu mpi na mudidi ya kimpeve. (Nk. 27:1) Mwinda kesongaka beto kigonsa to dyambu mosi ya mbi yina kele na nzila, kansi yo kekatulaka yo ve. Beto fwete tambula na mayele yonso sambu na kutina kigonsa yina. Mutindu mosi, Yehowa kezabisa beto bantendula ya sikisiki ya mambu yina kesalama na nsi-ntoto. Yandi kekebisa beto na bigonsa ya ngidika yai ya bima. Yandi kepesa beto minsiku ya Biblia yina kevandaka ntangu yonso ya mbote, kansi beto fwete sadila mambu yina beto kelonguka. Kana beto sala mpidina, beto lenda vanda mayele mingi kuluta bambeni na beto to bantu yina longaka beto.—Nk. 119:98, 99, 130.
4. (a) Sambu na nki Davidi tubaka ti kivuvu yonso nde Yehowa “muntu ke gulusaka mono”? (b) Inki ntangu Yehowa tagulusa beto?
4 Bangogo ya Davidi yina kele na Nkunga 27:1 kemonisa nde, yo lombaka nde yandi yibuka mutindu Yehowa gulusaka to sadisaka yandi na ntama. Mu mbandu, Yehowa gulusa ka yandi “na maboko ya bantambu ti “ ya urse. Yehowa sadisaka yandi na kununga Goliati, muntu ya nda mpi ya ngolo. Na nima, Yehowa gulusaka Davidi na konso ntangu yina Ntotila Saule vandaka kulosila yandi dikonga. (1 Sam. 17:37, 49, 50; 18:11, 12; 19:10) Sambu na yo, Davidi tubaka ti kivuvu yonso nde: Yehowa “muntu ke gulusaka mono”! Yehowa tagulusa bansadi na yandi mutindu yandi gulusaka Davidi. Nki ntangu? Ntangu yandi tagulusa bansambidi na yandi na ‘mpasi ya nene’ yina kekwisa.—Kus. 7:14; 2 Pie. 2:9.
YIBUKA NTANGU YONSO YINA YEHOWA MESADISAKA NGE
5, 6. (a) Inki mutindu mambu yina beto keyibukaka kesadisaka beto na kuvanda kikesa? (b) Na nki mutindu kuyindula mambu yina Yehowa mesadilaka bansadi na yandi ya ntama kepesa nge kikesa?
5 Dyambu ya kuluta mfunu sambu na kulanda kuvanda kikesa kele kutula dikebi na Nkunga 27:2, 3. (Tanga.) Davidi yibukaka bampasi yina yandi kutanaka ti yo yina Yehowa gulusaka yandi. (1 Sam. 17:34-37) Kuyindulula mambu yina pesaka yandi kikesa sambu na kunwana ti bampasi ya ngolo kibeni. Keti nge kevandaka ti mabanza ya mutindu mosi sambu na bampasi yina nge kekutanaka ti yo? Mu mbandu, keti nge mesambaka dezia mingi sambu na dyambu mosi buna mpi nge monaka mutindu Yehowa pesaka nge ngolo ya kununga mimekamu yango? Keti nge lenda yibuka mabaku yina Yehowa mepesaka nge sambu na kusadila yandi na kyese? To keti nge lenda yibuka mutindu yandi pesaka nge dyaka mabaku yankaka sambu na kusadila yandi? (1 Kor. 16:9) Kuyibuka mambu yai kevandaka ti nki bupusi na zulu na nge? Keti kuyibuka mambu yai kendimisaka nge ve nde Yehowa lenda sadisa nge na kununga to kukanga-ntima na bigonsa to na bampasi ya ngolo kuluta?—Roma 5:3-5.
6 Inki beto lenda tuba kana luyalu mosi ya ngolo mebaka lukanu ya kufwa Bambangi yonso ya Yehowa? Bantu mingi ya bilumbu na beto memekaka kusala yo kansi bo menungaka ve. Kuyindula mutindu Yehowa mesadisaka bansadi na yandi na ntangu ya ntama tapesa beto kikesa ya kukanga-ntima na bampasi yina beto takutana ti yo na bilumbu kekwisa.—Dan. 3:28.
ZOLA SAMBU NA LUSAMBU YA KYELEKA
7, 8. (a) Na kutadila Nkunga 27:4, nki dyambu Davidi lombaka Yehowa? (b) Tempelo ya Yehowa ya nene ya kimpeve kele nki, mpi nki mutindu beto kesambilaka yandi kuna?
7 Zola na beto sambu na lusambu ya kyeleka kesadisaka beto mpi na kuvanda kikesa. (Tanga Nkunga 27:4.) Na bilumbu ya Davidi, nzo ya ntenta vandaka ‘nzo ya Nzambi.’ Davidi muntu salaka bangidika yonso sambu na kutunga tempelo yina Salomo mwana na yandi tungaka. Bamvu-nkama mingi na nima, Yezu monisaka nde bantu tavanda dyaka ve na mfunu ya kukwenda na tempelo sambu na kusambila Yehowa na mutindu yina yandi kezolaka. (Yoa. 4:21-23) Na Baebreo kapu 8 tii na 10, ntumwa Polo monisaka nde tempelo ya nene ya kimpeve yantikaka ntangu Yezu bakaka mbotika na mvu 29 T.B., mpi kudipesaka sambu na kusala luzolo ya Yehowa. (Baeb. 10:10) Tempelo yai ya kimpeve kele ngidika yina Yehowa mebakaka na mpila nde beto samba yandi na mutindu yina yandi kezolaka kana beto kemonisa lukwikilu na kimenga ya nkudulu ya Yezu. Inki mutindu beto kesambaka na tempelo yango? Na “ntima mosi ya kieleka, ti lukwikilu ya ngolo”; na kumonisaka kivuvu na beto kukonda mpasi; mpi na kutulanaka dikebi, na kupesanaka kikesa, mpi na kusyamisaka bampangi na beto Bakristu ntangu beto kevukanaka na balukutakanu na beto ya dibundu mpi na lusambu ya dibuta. (Baeb. 10:22-25) Zola na beto sambu na lusambu ya kyeleka kepesaka beto kikesa ya mingi na bilumbu yai ya nsuka mpi ya mpasi mingi.
8 Na ntoto ya mvimba, bansadi ya kwikama ya Yehowa kelutisaka mingi ntangu na bo na kisalu ya kusamuna, kulonguka bandinga ya mpa mpi kukwenda bisika yina mpusa ya bansamuni ya Kimfumu kele mingi. Bonso muyimbi-bankunga, bisalu na bo kemonisaka nde bo kele ti kima mosi ya kulomba Yehowa. Bo kevandaka na mfunu ya bumbote ya Yehowa mpi kusala kisalu na yandi ya santu yo vanda bo kekutana ti bampasi ya nki mutindu.—Tanga Nkunga 27:6.
TULA NTIMA NA LUSADISU YA YEHOWA
9, 10. Nkunga 27:10 kepesa beto nki lusilu?
9 Davidi tulaka mpenza ntima na lusadisu ya Yehowa, yo yina yandi tubaka nde: “Tata na mono ti mama na mono bo lenda buya mono, kansi nge Mfumu Nzambi, nge ta baka mono.” (Nk. 27:10) Kana beto tanga 1 Samuele kapu 22, beto kebakisa nde bibuti ya Davidi yambulaka yandi ve. Kansi, bantu mingi bubu yai, mabuta na bo meyambulaka bo. Ata mpidina, mingi na kati na bo mebakaka lusadisu mpi lutaninu ya zola na kati ya dibundu ya Bukristu.
10 Sambu Yehowa kesadisaka bansadi na yandi ntangu bantu yankaka keyambulaka bo, keti yandi tasadisa bo ve na konso mpasi yina bo takutana ti yo? Mu mbandu, kana beto kekudiyangisa sambu na kulungisa bampusa ya kinsuni ya dibuta na beto, keti beto lenda tula ve kivuvu nde Yehowa tasadisa beto? (Baeb. 13:5, 6) Yandi kebakisaka bampasi mpi bampusa ya bansadi na yandi yonso ya kwikama.
11. Ntima ya beto ketudilaka Yehowa kevandaka ti nki bupusi na bantu yankaka? Pesa mbandu.
11 Beto tadila mbandu ya Victoria, longoki mosi ya Biblia na Libéria. Sambu yandi vandaka kusala bikesa sambu na kubaka mbotika, bakala yina yandi vandaka kuzinga ti yandi yambulaka yandi ti bana tatu. Ata yandi vandaka ve ti kisalu mpi kisika ya kulala, yandi landaka kuyela na kimpeve. Na nima ya kubaka mbotika, mwana na yandi ya nkento ya bamvula 13, lokutaka ka-saki yina vandaka ya kufuluka ti mbongo. Sambu na kubuya kubwa na mpukumuna, bo buyaka nkutu kuzaba ntalu ya mbongo yango. Kansi, bo sosaka nswalu soda yina vidisaka mbongo yango. Soda yango zabisaka bo nde kana bantu yonso vandaka masonga bonso Bambangi ya Yehowa, nsi-ntoto ya mvimba zolaka kuvanda mbote mpi na ngemba mingi. Victoria sadilaka Biblia sambu na kusonga soda yina lusilu ya Yehowa ya nsi-ntoto ya mpa. Soda yango yitukaka ngolo na lukwikilu ya Victoria mpi pesaka yandi mbongo mingi. Ya kyeleka, sambu Bambangi ya Yehowa ketulaka ntima nde Yehowa kele ti makuki ya kulungisa bampusa na bo, bantu yankaka kepesaka bo lukumu sambu na masonga na bo.
12. Sambu na nki beto kelanda kusadila Yehowa ata beto mevidisa kisalu to mbongo? Pesa mbandu.
12 Beto tadila mbandu ya Thomas, nsamuni mosi ya mebakaka ntete ve mbotika ya kezingaka na Sierra Leone. Tala mutindu yandi kudiwaka. Yandi yantikaka kulonga na nzo-nkanda ya mimpe kansi bo vandaka kufuta yandi ve kiteso ya mvula mosi. Yo lombaka nde Thomas kusala inki na ntwala ya kuyantika kubaka mbongo na yandi? Yo lombaka nde Thomas kusolula ti nganga-Nzambi yina vandaka ntwadisi na nzo-nkanda yango. Nganga-Nzambi songaka yandi nde balukwikilu ya Bambangi ya Yehowa kewakana ve ti balukwikilu ya nzo-nkanda yina. Yandi zabisaka Thomas na kupona kisalu to balukwikilu na yandi ya mesimbama na Biblia. Thomas yambulaka kisalu yina ti mbongo na yandi ya mvula ya mvimba, mpi yandi zwaka kisalu yankaka ya kuyidika batelefone ti baradio. Mbandu yai mpi bambandu yankaka ya mefwanana ti yo kemonisa nde, kana beto ketula ntima na Yehowa beto fwete wa boma ve ata fyoti nde beto takonda bima yina beto kele na yo mfunu. Sambu yandi kele Ngangi ya bima yonso mpi ketaninaka ntangu yonso bantu na yandi, beto ketula ntima nde yandi talungisa mpi bampusa na beto.
13. Sambu na nki kisalu ya kusamuna keyelaka na bansi yina kinsukami kele mingi?
13 Na bansi mingi ya kinsukami, bansamuni ya Kimfumu kekudipesaka mingi na kisalu ya kusamuna. Sambu na nki? Biro ya filiale mosi sonikaka nde: “Bantu mingi yina kendimaka kulonguka Biblia kevandaka ve ti bisalu yo yina bo kevandaka ti ntangu mingi ya kulonguka Biblia. Bampangi mpi kevandaka ti ntangu mingi ya kusamuna. Sambu na bantu yina kezingaka na bisika ya kinsukami, yo kevandaka mpasi ve na kundima nde beto kezinga na bilumbu ya nsuka; bo kemonaka mambu yango na luzingu na bo.” Mpangi mosi ya misionere yina mesalaka bamvula kuluta 12 na insi yina konso nsamuni kelongukaka na mwayene ti bantu kuluta tatu, sonikaka nde: “Sambu bansamuni mingi kevandaka ti luzingu ya kukonda mindondo mpi kevandaka ti mambu fyoti ya kekatulaka bo dikebi, mbala mingi bo kevandaka ti ntangu mingi ya kusala kisalu ya kusamuna mpi kulonguka Biblia ti bantu.”
14. Na nki mitindu kibuka ya nene lenda baka lutaninu ya Nzambi?
14 Yehowa mesilaka bansadi na yandi na kusadisa bo, kutanina bo mpi kugulusa bo na kimvuka, na kinsuni ti na kimpeve mpi beto ketulaka ntima nde yandi talungisa lusilu na yandi. (Nk. 37:28; 91:1-3) Kibuka yina taguluka na ‘mpasi ya nene’ tavanda ya nene mpenza. (Kus. 7:9, 14) Yehowa tatanina kibuka yai ya nene na mutindu yandi tapesa ve nzila nde ata muntu mosi kufwa bantu na yandi yonso na bilumbu ya nsuka ya ngidika yai ya bima. Yandi tapesa bo mambu yonso yina bo kele na yo mfunu sambu na kukanga ntima na bampasi mpi kutanina bangwisana na bo ti Yehowa. Mpi na kitini ya nsuka ya mpasi ya nene, Yehowa tatanina bansadi na yandi.
YEHOWA, “LONGA MONO MAMBU YA NGE ZOLA NDE MONO SALA”
15, 16. Inki mambote beto kebakaka ntangu beto kelemfukaka na malongi ya Nzambi? Pesa mbandu.
15 Sambu na kuvanda kaka kikesa, beto fwete landa kulonguka mambu yina Nzambi kezolaka nde beto sala. Dyambu yai kele kyeleka, sambu Davidi sambaka nde: “[Yehowa], longa mono mambu ya nge zola nde mono sala, nata mono na nzila ya mbote sambu mono ke na bambeni mingi.” (Nk. 27:11) Sambu na kulongama na Yehowa, beto fwete tula dikebi ya mingi na lutwadisu yonso yina beto kebakaka na organizasio ya Yehowa mpi kusadila yo kukonda kusukinina. Bantu mingi yina kebuyaka kubaka bamfuka ya kukonda mfunu memonaka nde kusadila bandongisila ya mayele ya kukumisa luzingu kukonda mindondo menatilaka bo mambote na bampasi ya mbongo. Na kisika ya kusala ngolo sambu na kusumba bima mingi ya kinsuni yina bo tavanda na mfunu na yo ve, bo kevandaka ti ntangu mingi sambu na kuyedisa kisalu na bo ya kusamuna. Konso muntu na kati na beto fwete kudiyula nde: ‘Keti mono kesadilaka kukonda kusukinina mambu yonso ya mono ketangaka na Biblia mpi na mikanda ya kimvuka ya mpika ya kwikama mpi ya mayele, ata yo kelomba nde mono sala bibansa?’—Mat. 24:45.
16 Kana beto kebika nde Yehowa kulonga beto mpi kutwadisa beto na nzila ya lunungu, beto tawa ve boma ata fyoti. Mupasudi-nzila mosi ya ntangu yonso ya kezingaka na États-Unis kwendaka kusosa kisalu yina zolaka kusadisa yandi mpi dibuta na yandi ya mvimba na kulanda kusala kisalu ya ntangu yonso. Mfumu ya kisalu zabisaka yandi nde, yandi tapesa yandi ve kisalu yango sambu mupasudi-nzila yina vandaka ve ti diplome ya iniversite. Kana dyambu yai kuminaka nge, keti nge zolaka kubokuta sambu nge ponaka kisalu ya ntangu yonso na kisika ya kukwenda na iniversite? Bamposo zole na nima, bo katulaka mfumu yina na kisalu mpi bo yingisaka mfumu yankaka yina yulaka mupasudi-nzila yina balukanu na yandi. Yandi zabisaka mfumu nde, yandi ti nkento na yandi kele baministre ya Yehowa ya ntangu yonso mpi bo kele ti lukanu ya kulanda kusala kisalu yango. Na ntwala nde mupasudi-nzila kutuba dyambu yankaka, mfumu zabisaka yandi nde: “Mu mezaba nde nge kele ti kima mosi ya kuswaswana! Ntangu tata na mono vandaka pene-pene ya kufwa, bampangi na beno zole vandaka kukwisa kutala yandi mpi kutangila yandi Biblia konso kilumbu. Mono silaka nde, kana mono zwa dibaku ya kusadisa Mbangi mosi ya Yehowa, mono tasala yo.” Kilumbu yina landaka, mfumu yai pesaka mupasudi-nzila kisalu ya mbote yina mfumu ya ntete buyaka kupesa yandi. Ya kyeleka, kana beto ketula mambote ya Kimfumu na kisika ya ntete na luzingu na beto, Yehowa talungisa kivuvu na yandi ya kupesa beto bima ya kinsuni yina beto kele na yo mfunu.—Mat. 6:33.
LUKWIKILU MPI KIVUVU KELE MFUNU
17. Inki tasadisa beto na kuwa ve boma sambu na mambu yina kekwisa na ntwala?
17 Na nima, Davidi monisaka mfunu ya kuvanda ti lukwikilu mpi kivuvu. Yandi vandaka kudiwa bonso nde yandi zolaka kuvanda ve ti kivuvu kana yandi kondaka lukwikilu ya kumona “mambote ya Mfumu Nzambi.” (Nk. 27:13) Ya kieleka, luzingu na beto zolaka kuvanda nki mutindu kana Nzambi pesaka beto ve kivuvu mpi kana beto zabaka ve mambu yina kele na Nkunga 27? Yo yina, bika nde beto landa kusamba Yehowa na kivuvu yonso sambu yandi pesa beto ngolo, kugulusa beto na bampasi yina beto kekutana ti yo bubu yai mpi kugulusa beto na Armagedoni.—Tanga Nkunga 27:14.
[Bangyufula ya disolo ya kulonguka]
[Kifwanisu ya kele na lutiti 23]
Davidi bakaka kikesa ntangu yandi yindulaka mutindu Yehowa gulusaka yandi
[Kifwanisu ya kele na lutiti 25]
Keti beto ketadilaka mpasi ya mbongo bonso dibaku ya kuyedisa kisalu na beto?
