Sadila Nzambi Yina Kepesaka Kimpwanza

“Yai kele ntendula ya zola ya Nzambi, nde beto zitisa bansiku na yandi; mpi bansiku na yandi kele kilo ve.”—1 YOA. 5:3, NW.

KETI NGE LENDA PESA MVUTU?

Inki mutindu Satana kesalaka bikesa sambu na kumonisa nde bansiku ya Nzambi kele kilo?

Sambu na nki beto fwete keba mpenza na banduku na beto?

Inki tasadisa beto na kubikala ya kwikama na Nzambi yina kepesaka kimpwanza?

1. Inki mutindu Yehowa kesadilaka kimpwanza na yandi, mpi nki mutindu yandi monisilaka yo Adami ti Eva?

YEHOWA mpamba kele ti kimpwanza ya kukonda ndilu. Ata mpidina, yandi kesadilaka ntangu yonso kimpwanza na yandi na mutindu ya mbote; yandi keyiminaka ve bansadi na yandi kimpwanza na kulandilaka mambu yonso ya bo kesalaka. Kansi, yandi mepesaka bo kimpwanza ya kupona, yina kesadisaka bo na kubaka balukanu bo mosi mpi kulungisa bampusa na bo yonso. Mu mbandu, Nzambi pesaka Adami ti Eva nsiku mosi kaka​—ya kudya ve “bambuma ya nti yina kepesaka mayele sambu na kuzaba mambu ya mbote ti mambu ya mbi.” (Kuy. 2:17) Yo kemonisa nde bo vandaka mpenza ti kimpwanza ya nene mpi makuki ya kusala luzolo ya Ngangi na bo!

2. Sambu na nki Adami mpi Eva vidisaka kimpwanza yina Nzambi pesaka bo?

² Sambu na nki Yehowa pesaka bibuti na beto ya ntete kimpwanza ya mingi mpidina? Sambu Yehowa gangaka bo na kifwani na yandi mpi kupesaka bo kansansa. Yandi vandaka ti kivuvu nde zola na bo sambu na yandi tapusa bo na nzila ya mbote. (Kuy. 1:27; Roma 2:15) Dyambu ya mawa kele nde, Adami ti Eva monisaka ve ntonda na Ngangi na bo yina pesaka bo luzingu mpi kimpwanza. Bo ponaka kimpwanza ya mbi yina Satana pesaka bo ya kupona bo mosi mambu ya mbote mpi ya mbi. Kansi, na kisika ya kukuma ti kimpwanza mingi, bibuti na beto ya ntete kuditekaka mpi tekaka bana na bo na kimpika ya masumu, yina menatilaka beto bampasi mpi lufwa.​—Roma 5:12.

3, 4. Satana kepusaka beto na kuyindula nki na yina metala minsiku ya Nzambi?

³ Sambu Satana nungaka kukusa bantu zole ya kukuka mpi bawanzio mingi na kubuya luyalu ya Nzambi, yandi lenda kusa beto. Mayele ya mbi ya satana mesobaka ve. Yandi kekusaka beto na kuyindula nde mambu yina Nzambi kelombaka beto kele kilo, mpi kana beto kesadila Nzambi beto tavanda ve na kyese na luzingu. (1 Yoa. 5:3)  Bantu ya nsi-ntoto keyindula mutindu yai, mpi kana beto kelutisa ntangu mingi ti bo, beto takuma kuyindula bonso bo. Mpangi-nkento mosi yina kele ti bamvula 24, yina salaka pite ketuba nde: “Banduku ya mbi pusaka mono mpenza na kusala mambu ya mbi, mingi-mingi sambu mono vandaka kuwa boma ya kuvandaka ti mabanza ya kuswaswana ti bo.” Ziku, nge mpi mekutanaka ti bupusi ya mutindu yai.

⁴ Dyambu ya mawa kele nde, bampangi yankaka na dibundu lenda vanda mpi banduku ya mbi. Toko mosi ketuba nde: “Banduku na mono yankaka na dibundu salaka kinduku ya makwela ti bankento yina vandaka ve Bambangi ya Yehowa. Kansi nsukansuka mono monaka nde, sambu mono vandaka kukangama ti bo mono yantikaka kukuma bonso bo. Bangwisana na mono ti Nzambi yantikaka kubeba. Mono vandaka kuzola balukutakanu dyaka ve mpi mono yambulaka kusamuna. Yo kele ntangu yina mono bakisaka nde, mono fwete yambula kulutisa ntangu ti bo, mpi mono zengaka kinduku ti bo!” Keti nge mezaba bupusi yina banduku na nge lenda vanda ti yo na zulu na nge? Beto tadila mbandu mosi ya kele na Biblia.​—Roma 15:4.

YANDI YIBAKA BANTIMA BO

5, 6. Inki mutindu Absalomi kusaka bantu yankaka, mpi keti lukanu na yandi nungaka?

⁵ Biblia kele ti bambandu ya bantu mingi yina vandaka mbandu ya mbi sambu na bankaka. Mosi na bo kele, Absalomi mwana ya Ntotila Davidi. Absalomi vandaka bakala mosi ya kitoko mpenza. Kansi bonso Satana, yandi bikaka nde mpusa ya mbwimi kuyela na ntima na yandi, sambu yandi zolaka kubaka kimfumu na kisika ya Tata na yandi, ata yandi vandaka ve ti nswa ya kukuma mfumu. * Sambu na kuzwa kimfumu yango, Absalomi kumaka kupusa bantu na kukwikila nde yandi vandaka mpenza ti luzolo ya kusadisa bo kansi ntotila vandaka kuzola bo ve. Kaka mutindu Satana salaka na kilanga ya Edeni, Absalomi kudimonisaka nde yandi vandaka muntu ya mbote, mpi tubaka mambu ya luvunu mpi ya mbi sambu na Tata na yandi.​—2 Sam. 15:1-5.

⁶ Keti lukanu ya Absalomi nungaka? Beto mezaba nde yandi nungaka sambu Biblia ketuba nde: ‘Absalomi vandaka kuyiba bantima ya bantu ya Israele.’ (2 Sam. 15:6) Absalomi kusaka bantu mingi kansi na nsuka, yandi bwaka. Lulendo na yandi natilaka yandi lufwa yika mpi bantu mingi yina yandi kusaka.​—2 Sam. 18:7, 14-17.

7. Inki malongi beto lenda baka na mbandu ya Absalomi? (Tala kifwanisu na lutiti 19)

⁷ Sambu na nki bantu yina ya Izraele kusamaka kukonda mpasi? Ziku bo vandaka na mpusa ya bima yina Absalomi silaka bo. To mbala yankaka kitoko na yandi kangaka bo meso. Yo vanda nki bikuma pusaka bo, beto lenda ndima nde: Bo vandaka ve ya kwikama na Yehowa mpi na ntotila yina yandi tulaka. Bubu yai, Satana kelanda kusadila bantu bonso “Absalomi” sambu na kuyiba bantima ya bansadi ya Yehowa. Bo lenda tuba nde, mambu yina Yehowa kelombaka beto kele ngolo mingi mpi nde bantu yina kesadilaka ve Yehowa kevandaka na kyese mingi!’ Keti nge tabakisa nde bangindu yina kele ya luvunu mpi nge tabikala ya kwikama na Yehowa? Keti nge tabakisa nde kaka “nsiku ya kukuka” ya Yehowa, nsiku ya Kristu, lenda nata nge na kimpwanza ya kyeleka? (Yak. 1:25, NW) Kana yo ke mpidina, monisa nde nge kezolaka nsiku yina mpi sadila kimpwanza na nge na mutindu yina tasepedisa Yehowa.​—Tanga 1 Piere 2:16.

8. Inki kele bambandu ya bilumbu na beto yina kemonisa nde kufwa bansiku ya Yehowa kenataka ve kyese?

⁸ Satana kekusaka mingimingi batoko. Mpangi-bakala mosi ya kele ti bamvula 30 bubu yai ketuba sambu na kileki na yandi nde: “Mono vandaka kumona nde bansiku ya Yehowa vandaka kukanga mono, yo vandaka ve sambu na kutanina mono.” Nsuka-nsuka, yandi salaka pite. Kansi, yo natilaka yandi ve kyese. Yandi keyika nde:  “Na nsungi ya bamvula mingi, mono vandaka na mawa mpi kudiwa bonso nde mono menataka makambu.” Mpangi-nkento mosi yina salaka pite ntangu yandi vandaka toko sonikaka nde: “Na nima ya kusala pite, nge tayantika kudiwa mawa mpi kudimona mfunu ve. Ata bamvula 19 meluta ntangu yai, mambu yina ya mbi kekwisilaka mono na mabanza.” Mpangi-nkento yankaka tubaka nde: “Ntangu mono bakisaka nde nkadilu na mono pesaka mpasi na bantu yina mono kezolaka, yo yangisaka mono ngolo mpenza na mabanza, na kimpeve, mpi na mawi. Yo kele mpasi na kuzinga kukonda kundimama na Yehowa.” Satana kezola ve nde nge yindula malanda yina disumu lenda nata.

9. (a) Inki bangyufula lenda sadisa beto na kuzaba mutindu beto ketadilaka Yehowa mpi bansiku na yandi? (b) Sambu na nki beto fwete zaba Yehowa mbote-mbote?

⁹ Yo kele mawa na kumona nde batoko mingi yina kele na kyeleka ata mpi bambuta yankaka mekutanaka na malanda ya mbi ya mendimisaka bo nde masumu kenataka mbala mingi bampasi ya nene! (Gal. 6:7, 8) Yo yina kudiyula nde: ‘Keti mono kebakisaka mayele yina Satana kesadilaka sambu na kukusa mono? Keti mono kemonaka Yehowa bonso nduku na mono ya ngolo, yina ketubilaka mono ntangu yonso kyeleka mpi kesosaka mambote na mono? Keti mono kendimaka mpenza nde yandi lenda buyisa mono ve ata fyoti kima yina kele mbote mpi yina tanatila mono kyese mingi?’ (Tanga Yezaya 48:17, 18.) Sambu na kundima mpenza ee, nge fwete zaba Yehowa mbote-mbote. Nge fwete zaba nde bansiku ya Biblia mpi minsiku na yandi kemonisaka nde Yehowa kezolaka nge kansi ve nde yandi kezolaka kubotula kimpwanza na nge.​—Nk. 25:14.

 SAMBA SAMBU NA KULOMBA NTIMA YA MAYELE MPI YA BULEMFU

10. Sambu na nki beto fwete sala bikesa sambu na kulanda mbandu ya Ntotila ya leke Salomo?

¹⁰ Ntangu yandi vandaka toko, Salomo sambaka Yehowa na kudikulumusa yonso nde: “Mono kele leki, mono ke zaba ve mutindu ya kuyala bantu.” Na nima yandi lombaka Nzambi na kupesa yandi ntima mosi ya mayele mpi ya bulemfu. (1 Bant. 3:7-9, 12) Yehowa pesaka mvutu na kisambu yina ya masonga mpi yandi tawa bisambu na nge, yo vanda nge kele leke to mbuta. Ya kyeleka, Yehowa tapesa nge ve mayele na mutindu ya kuyituka. Kansi, yandi takumisa nge muntu ya mayele kana nge kelonguka Ndinga na yandi, kesamba yandi sambu na kulomba mpeve santu mpi kelanda lutwadisu mpi bantuma yina nge kebaka na dibundu ya Bukristu. (Yak. 1:5) Nkutu na nsadisa ya bangidika yai, Yehowa kesadisaka ata bansadi na yandi ya baleke na kukuma mayele kuluta bayina kelemfukilaka yandi ve, ata nkutu ‘bantu ya mayele mpi ya melongukaka’ ya nsi-ntoto yai.​—Luka 10:21; tanga Nkunga 119:98-100.

11-13. (a) Inki malongi ya mfunu beto lenda longuka na Nkunga 26:4, Bingana 13:20, mpi 1 Korinto 15:33? (b) Inki mutindu nge lenda sadila malongi yai na luzingu na nge?

¹¹ Sambu na kubakisa mfunu ya kulonguka Biblia mpi kuyindulula mambu yina beto ketanga sambu na kuzaba Yehowa mbote-mbote, bika beto tadila baverse yai kelanda. Konso verse kele ti dilongi ya mfunu sambu na banduku yina beto keponaka: “Mono ke vandaka ve ti bantu ya mpamba, mono ke taka kinduku ve ti bantu ya luvunu.” (Nk. 26:4) “Kana nge landa bantu ya mayele, nge ta kuma mpi mayele; kana nge landa bazoba, nge mpi ta kuma zoba.” (Bing. 13:20) “Banduku ya mbi ke bebisaka bikalulu ya mbote.”​—1 Kor. 15:33.

¹² Inki malongi ya mfunu beto lenda longuka na baverse yai? (1) Yehowa kezolaka nde beto pona banduku ya mbote. Yandi kezolaka kutanina beto sambu beto sala ve dyambu yina lenda pesa beto mpasi mpi kubebisa bangwisana na beto ti yandi. (2) Banduku na beto lenda pusa beto na kusala mambu ya mbote to ya mbi; yo kesalamaka mpenza mutindu yina! Bangogo ya baverse yina kele na zulu kemonisa mpenza nde Yehowa kezola kusimba bantima na beto. Inki mutindu? Ata verse mosi ve ketuba bonso ntuma, mu mbandu “nge fwete sala ve dyambu yai to nge fwete sala ve dyambu yina.” Kansi, yo ketubila mambu mutindu yo kesalamaka. Nkutu, yo kele bonso nde Yehowa kezabisa nge nde: ‘Mambu yonso yo yai. Inki nge tasala? Inki nge keyindula na ntima na nge?’

¹³ Dyaka, sambu baverse yina tatu ketubila mambu ya kyeleka, ya kele mfunu tii bubu yai mpi ya beto lenda sadila na mambu mingi. Mu mbandu, nge lenda kudiyula nde: Inki mutindu mono lenda buya kusala kinduku ti bantu yina “kebumbaka kimuntu na bo”? Na nki bisika mono lenda vanda ti bantu ya mutindu yina? (Bing. 3:32; 6:12) Banani kele “bantu ya mayele” yina Yehowa kezola nde mono kuma nduku na bo? Ebuna, banani kele “bazoba” yina Yehowa kebuya? (Nk. 111:10; 112:1; Bing. 1:7) Inki “bikalulu ya mbote” mono tabebisa kana mono pona banduku ya mbi? Keti mono tamona banduku ya mbi kaka na kati ya bantu ya nsi-ntoto? (2 Pie. 2:1-3) Inki mvutu nge tapesa na bangyufula yai?

14. Inki beno lenda sala sambu nkokila na beno ya Lusambu ya Dibuta kuvanda mbote mpenza?

¹⁴ Kaka mutindu beto mesala sambu na baverse yina, nge lenda tanga baverse yankaka sambu na kubakisa bangindu ya Nzambi na mambu yina kele mfunu sambu na nge mpi dibuta na nge. * Bibuti, beno lenda longuka malongi ya mutindu yina na nkokila na beno ya Lusambu ya Dibuta. Ntangu beto kesala yo, beno vila ve nde lukanu na beno kele ya kusadisa konso muntu na kati ya dibuta na kubakisa nde bansiku ya Nzambi mpi minsiku na yandi kemonisaka zola  na yandi ya ngolo sambu na beto. (Nk. 119:72) Kana beno kesala mpidina, bangwisana na beno ti Yehowa takuma ngolo mpi dibuta na beno tavanda na bangwisana ya mbote.

15. Inki mutindu nge lenda zaba nde nge kekuma ti ntima ya mayele mpi ya bulemfu?

¹⁵ Inki mutindu nge lenda zaba nde nge kekuma ti ntima ya mayele mpi ya bulemfu? Nge lenda fwanisa mabanza na nge ti ya bansadi ya Yehowa ya kwikama ya ntangu ya ntama, mu mbandu Ntotila Davidi yina sonikaka nde: ‘Mono kezolaka mingi kusala mambu yina nge kezolaka! Malongi na nge kele na ntima na mono.” (Nk. 40:9) Nsoniki ya Nkunga 119 tubaka nde: “Mono ke zolaka bansiku na nge mingi! Mono ke yindulaka yo kilumbu ya mvimba.” (Nk. 119:97) Nge fwete sala bikesa sambu na kuyedisa zola ya mutindu yina. Yo keyelaka ntangu beto kelongukaka Biblia na mudindu, kesambaka, keyindululaka mpi ntangu beto kemonaka na luzingu na beto mosi nde kulemfukila bansiku ya Yehowa kenataka balusakumunu mingi.​—Nk. 34:9.

NWANA SAMBU NA KIMPWANZA NA NGE YA BUKRISTU!

16. Inki beto fwete vila ve kana beto kezola kununga mvita ya kubaka kimpwanza ya kyeleka?

¹⁶ Disolo ya luzingu ya bantu kemonisa nde bantu ya bansi mingi kenwanaka bamvita ya ngolo sambu na kubaka kimpwanza. Beto Bakristu fwete nwana ngolo sambu na kutanina kimpwanza na beto! Kuvila ve nde bambeni na nge kele kaka Satana ve, nsi-ntoto mpi mpeve ya nsi-ntoto. Nge fwete nwana mpi ti kukonda kukuka na nge mpi ntima na nge ya mefuluka ti luvunu. (Yer. 17:9; Ef. 2:3) Kansi, na lusadisu ya Yehowa nge lenda nunga. Mpi konso ntangu yina nge kenunga mvita yango, yo vanda ya nene to ya fyoti, nge tabaka mambote zole. Ya ntete, nge tasepedisa ntima ya Yehowa. (Bing. 27:11) Ya zole, ntangu nge kemona mambote ya kulemfukila “nsiku ya kukuka ya kimpwanza,” lukanu na nge ya kubikala na ‘nzila ya fioti’ yina kenataka na luzingu ya mvula na mvula takuma ngolo mpenza. Na bilumbu kekwisa, nge tabaka kimpwanza ya kyeleka yina Yehowa tapesa bansadi na yandi ya kwikama.​—Yak. 1:25, NW; Mat. 7:13, 14.

17. Sambu na nki beto fwete lemba ve nitu sambu na kukonda kukuka na beto, mpi nki mutindu Yehowa kesadisaka beto?

¹⁷ Ya kyeleka, beto yonso kesalaka bifu mbala na mbala. (Lo. 7:20) Kana yo mesalama, kudimona ve nde nge kele ve mfunu mpi kulemba ve nitu kuluta ndilu. Kana nge mebula dibaku, telama mpi landa kukwenda​—ata kana yo talomba nde nge sosa lusadisu na bankuluntu. Yakobo sonikaka nde ‘bisambu na bo ya lukwikilu, tabelula muntu ya maladi mpi Yehowa tavutula ngolo na nitu na yandi mpi talolula yandi sambu na masumu yina yandi salaka.’ (Yak. 5:15) Kuvila ve nde, Nzambi kewilaka mpenza bantu mawa mpi yandi bendaka nge na dibundu sambu yandi monaka dyambu mosi ya mbote na kati na nge. (Tanga Nkunga 103:8, 9.) Yehowa talanda kusadisa nge kana nge kelanda kusadila yandi na ntima ya mvimba.​—1 Bans. 28:9.

18. Inki beto fwete sala sambu Yehowa kutanina beto?

¹⁸ Na mpimpa ya nsuka na ntwala ya lufwa yandi, Yezu sambaka ti bantumwa na yandi 11 ya kwikama mpi lombaka tata na yandi na kutanina bo. Yandi tubaka bangogo yai, yina bo vilaka ve: ‘Tanina bo sambu na muntu ya mbi.’ (Yoa. 17:15) Yezu vandaka kudibanzabanza kaka ve sambu na bantumwa na yandi kansi mpi sambu na balongoki na yandi yonso. Yo yina, beto lenda ndima mpenza nde Yehowa tapesa mvutu na kisambu ya Yezu ya kutanina beto na bantangu ya mpasi. Bingana 2:7, 8 ketuba nde Yehowa kele bonso dibaya ya lutaninu sambu na bantu na yandi ya kwikama mpi yandi kekebaka “bantu yina ke kudipesaka na yandi.” Ya kyeleka, yo kele pete ve na kulemfuka ntangu yonso na mambu yina Yehowa kelombaka beto, kansi kaka bantu yina kelemfukilaka Yehowa tabaka luzingu ya mvula na mvula mpi kimpwanza ya kyeleka. (Roma 8:21) Kubika ve nde ata na muntu mosi kukusa nge!

[Banoti na nsi ya lutiti]

[Bangyufula ya disolo ya kulonguka]

[Bifwanisu ya kele na lutiti 19]

Inki mutindu beto lenda zaba bantu yina kele bubu yai bonso Absalomi mpi kutina bo?