“Yai Ke Tendula Luzingu ya Mvula na Mvula”
“Yai Ke Tendula Luzingu ya Mvula na Mvula”
“Yai ke tendula luzingu ya mvula, bo longuka na kuzaba nge, Nzambi mosi kaka ya kieleka, mpi muntu yina nge tindaka, Yezu Kristu.”—YOANE 17:3, NW.
NZAYILU lenda gulusa bantu. Ntangu Nouhou mwana mosi ya bangonda kumi belaka, mama na yandi yina vandaka kusala na kimvuka mosi ya mambu ya mavimpi na nsi Niger, zabaka dyambu yina yandi fwete sala. Yandi vukisaka sukadi ti mungwa mpi masa ya bunkete sambu na kupesa mwana na mpila nde masa kumana yandi ve na nitu. Kimvuka sambu na bana (UNICEF) ketuba nde, sambu mama yai “salaka mambu nswalu mpi zabaka mambu ya lusansu, mwana na yandi belukaka.”
Nzayilu yina kekatukaka na Biblia lenda gulusa mpi bantu. Moize, nsoniki ya ntete ya Biblia tubaka nde: “Malongi yai kele mambu ya mpamba ve, yo kele luzingu na beno mpenza. Beno landa yo, mpidina beno ta vanda na luzingu ya nda.” (Kulonga 32:47) Keti Biblia lenda kumisa luzingu na beto nda? Na nki mutindu yo ketendula luzingu na beto?
Masolo tanu yina beto mekatuka kutadila memonisa nde Biblia meswaswana ti mikanda yankaka sambu yo kele ti bambikudulu yina beto lenda tudila ntima, yo kele ya sikisiki na mambu ya istware mpi ya siansi, mikanda na yo yonso kele na kuwakana mpi yo kele ti bandongisila yina kesadisaka bantu. Mambu yai keswaswanisa Biblia ti mikanda yankaka. Yo yina, ntangu yo kemonisa mambu yina beto fwete sala sambu na kuvanda ti luzingu ya nda—luzingu ya mvula na mvula—keti yo mefwana ve nde nge tudila yo dikebi?
Beto kelomba nge na kulonguka sambu na kuzaba mutindu nzayilu ya kyeleka ya Biblia lenda natila nge ngemba ya mabanza bubu yai mpi kyese na makwisa. Bambangi ya Yehowa tasepela kusonga nge mutindu nge lenda baka nzayilu yina.
[Lupangu/Kifwanisu ya kele na lutiti 9]
Biblia meswaswana mpi ti mikanda yankaka sambu yo mpamba kepesaka bamvutu na bangyufula yai ya kuluta mfunu ya bantu kekudiyulaka:
• Sambu na nki beto kele awa na ntoto?
• Sambu na nki bampasi kekuma mingi?
• Keti kivuvu kele sambu na bampangi na mono yina mefwaka?
Nge lenda zwa bamvutu ya bangyufula yai na mukanda yai, Inki Biblia Kelongaka Mpenza?, yina Bambangi ya Yehowa mebasisaka.
