Kwenda Penepene ya Muntu Yina Kewaka Bisambu

BANTU mingi yina ketubaka nde bo kekwikilaka na Nzambi kekukaka ve kumonisa kikuma yina bo kekwikilaka. Bo kekukaka mpi ve kutendula kikuma yina mbala mingi dibundu kele na kisina ya mambi, to kikuma Nzambi mepesaka nzila na bampasi. Bo kesukaka kaka na kusambila Nzambi yina bo kezabaka ve.

Kansi nge, nge lenda kwenda penepene na Nzambi. Nge lenda kuma ti lukwikilu ya ngolo kana nge mezaba Nzambi mpi yo tasadisa nge na kuzola Nzambi. Lukwikilu ya kyeleka kekatukaka na banzikisa. (Baebreo 11:1) Kana nge longuka kyeleka ya metala Nzambi, nge tazaba yandi mpi tasolula ti yandi bonso nduku. Beto tadila mambu yina bantu yankaka kutanaka ti yo, bayina ata bo kesambilaka kekwikilaka ve nde Nzambi kele.

◼ Patricia, yina beto tubilaka na disolo ya ntete ketuba nde: “Kilumbu mosi, mono vandaka ti banduku na mono kiteso ya kumi ntangu bo yantikaka kutubila mambu ya Nzambi. Mu songaka bo nde kilumbu mosi, mono basikaka na nzo na beto sambu na kutina disolo yina tata na mono yina vandaka kukwikila na Nzambi vandaka kusolula ti Mbangi mosi ya Yehowa yina kwisaka na nzo na beto. Nduku na mono mosi tubaka nde: ‘Mbala yankaka Bambangi ya Yehowa ketubaka kyeleka.’

“Nduku yankaka tubaka nde: ‘Keti yo tavanda ve mbote nde beto kwenda na mosi ya balukutakanu na bo sambu na kuzikisa?’ Beto salaka mpidina. Ata beto vandaka ti keti-keti, mingi na kati na beto landaka kukwenda na balukutakanu kaka sambu Bambangi vandaka bantu ya mbote.

“Kansi na Lumingu mosi, mono waka dyambu mosi yina sobaka nkadilu na mono. Mutubi tendulaka kikuma yina bantu kenyokwamaka. Mu vandaka kuzaba ve nde, na luyantiku Nzambi gangaka muntu ya kukuka mpi nde masumu ti lufwa yantikaka na nzila ya muntu mosi mpi na nima yo yalumukaka na bantu yonso. Mutubi tendulaka mpi kikuma yina lufwa ya Yezu vandaka mfunu sambu na kuvutula bantu na luzingu ya kukuka, yina muntu ya ntete vidisaka. * (Roma 5:12, 18, 19) Na mbala mosi, mono yantikaka kubakisa mambu yonso. Mu tubaka nde: ‘Kele mpenza ti Nzambi yina kekudibanzaka sambu na beto.’ Mu landaka kulonguka Biblia mpi ntama ve, sambu na mbala ya ntete na luzingu na mono, mono monaka nde mono lendaka kusamba Nzambi yina kele muntu ya kyeleka.”

◼ Allan, yina beto tubilaka na disolo ya ntete ketuba nde: “Kilumbu mosi, Bambangi ya Yehowa kwisaka na nzo na beto mpi nkento na mono kotisaka bo na nzo sambu yandi vandaka kusepela na mambu yina bo kelongaka sambu na luzingu ya mvula na mvula awa na ntoto. Mono waka makasi. Yo yina, mono yambulaka banzenza na salon, mono bingaka nkento na mono na kikuku mpi zabisaka yandi nde: ‘Kuvanda ve zoba. Nge lenda kukwikila ve kaka mambu mutindu yina!’

“Yandi zabisaka mono nde: ‘Kana yo kele mpidina, kwenda kumonisa bo nde bo ketuba luvunu.’

“Ya kyeleka, mono vandaka ata ti nzikisa mosi ve. Kansi, Bambangi yina vandaka ntima mbote mpi bikilaka mono mukanda mosi yina  vandaka kutubila kana Nzambi gangaka luzingu to yo kudibasikilaka. Yo vandaka ti mambu ya pwelele mpi ya kendimisa, yo yina mono bakaka lukanu ya kusosa kuzaba mambu mingi ya metala Nzambi. Mu yantikaka kulonguka Biblia ti Bambangi ya Yehowa mpi kukonda kusukinina mono bakisaka nde mambu yina Biblia ketubaka meswaswana ti mambu yonso yina mono vandaka kuyindula sambu na Nzambi. Ntangu mono landaka kulonguka mambu ya metala Yehowa, bisambu na mono kumaka ya sikisiki. Mu vandaka ti bikalulu yankaka ya mbi, yo yina mono sambaka Nzambi na kusadisa mono. Mu kendima nde Yehowa pesaka mvutu na bisambu na mono.”

◼ Andrew, yina kezingaka na Angleterre ketuba nde: “Ata mono vandaka ti bangindu ya kendimisa mpi kusepela ngolo na mambu ya siansi, mono vandaka kundima dilongi ya evolisio kaka sambu bantu yankaka vandaka kutuba nde yo kele kyeleka. Mu buyaka kukwikila na Nzambi sambu na mambu ya mbi yina vandaka kusalama.

“Kansi, na bantangu yankaka mono vandaka kuyindula mutindu yai: ‘Kana Nzambi kele, mono kezola kuzaba ntendula ya mambu yai yonso. Sambu na nki mubulu mpi bamvita kele mingi?’ Na bantangu ya mpasi, mono  vandaka kusamba sambu na kusosa lusadisu kansi mono vandaka kuzaba ve nani mono vandaka kusamba.

“Na nima, muntu mosi pesaka nkento na mono trakiti mosi yina Bambangi ya Yehowa mebasisaka, Keti nza yai tazinga dyaka? Mono vandaka mpenza kudiyula ngyufula yina. Trakiti yango pusaka mono na kudiyula nde: ‘Keti Biblia lenda pesa bamvutu ya mefwana na kutudila ntima?’ Na nima, ntangu mono vandaka na konzie, muntu mosi pesaka mono mukanda La Bible : Parole de Dieu ou des hommes ? * Ntangu mono zabaka nde Biblia kele na kuwakana ti siansi, mono monaka nde mono fwete longuka mambu mingi ya Biblia. Yo yina, ntangu Mbangi ya Yehowa mosi lombaka mono na kulonguka ti yandi, mono ndimaka. Ntangu mono zabaka lukanu ya Yehowa, mono bakisaka nde yandi kele muntu ya kyeleka, yina mono lenda samba na kimpwanza yonso.”

◼ Jan, yina yelaka na dibundu ya Misioni na Londres ketuba nde: “Luvunu yina kele na mabundu mpi bampasi ya mingi pusaka mono na kuyambula kusambila. Na nima, mu yambulaka kukwenda na nzo-nkanda mpi mu yantikaka kuyimba ti kubula gitare sambu na kuzwa mbongo. Yo kele ntangu yina mono kutanaka ti mwana-bakala mosi na zina ya Pat. Yandi yelaka na dibundu ya Katolika mpi yandi yambulaka kusambila bonso mono.

“Beto vandaka kuzinga na nzo mosi yina bo meyambulaka kumosi ti bantu yankaka yina meyambulaka mabundu na bo mpi mekumaka kusepela ti mabundu ya Mputu. Na mpimpa, beto vandaka kulutisa bangunga mingi sambu na kutubila mfunu ya luzingu. Ata mono ti Pat vandaka kukwikila ve na Nzambi, beto bakisaka nde fwete vanda ti ‘ngolo mosi yina mesimba luzingu.’

“Na nima, ntangu beto kwendaka na nordi ya Angleterre sambu na kusosa kisalu bonso bantu yina keyimbaka mpi kebulaka miziki, mwana na beto ya bakala butukaka. Kilumbu mosi na mpimpa, yandi belaka mpi mono sambaka Nzambi yina mono vandaka kukwikila ve. Ntangu fyoti na nima, mwa mavwanga basikaka na kati na mono ti Pat mpi mono bakaka mwana mpi kwendaka. Mono sambaka dyaka sambu na kusosa lusadisu, mpi mono vandaka kuyindula nde kele ti muntu mosi yina vandaka kuwa. Kukonda kuzaba, Pat mpi salaka mutindu mosi.

“Na nima kaka na kilumbu yina, Bambangi ya Yehowa zole kwisaka na nzo ya Pat mpi songaka yandi bandongisila ya Biblia yina lendaka kusadisa yandi. Pat bingaka mono na telefone mpi yulaka mono kana mono tandima kulonguka Biblia ti yandi kumosi ti Bambangi. Kukonda kusukinina beto zabaka nde sambu na kusepedisa Nzambi beto fwete sonikisa makwela na beto na leta. Yo vandaka dyambu ya mpasi sambu mono ti Pat vandaka kuwakana mbote ve.

“Beto vandaka na mpusa ya kuzaba mambu mingi ya metala kulungana ya bambikudulu ya Biblia, kikuma yina bantu kenyokwamaka mpi ntendula ya Kimfumu ya Nzambi. Malembe-malembe, beto bakisaka nde Nzambi kekudibanzaka sambu na beto mpi beto vandaka na mpusa ya kulemfukila mambu yina yandi ketubaka. Beto kwelanaka. Mayele ya Ndinga ya Nzambi sadisaka beto na kusansa bana na beto tatu. Beto kendima mpenza nde Yehowa waka bisambu na beto.”

Tadila Banzikisa Yina Kendimisa Nge

Bonso bamilio ya bantu yankaka, bayina beto metubila na disolo yai, bo buyaka kukusama na mabundu ya luvunu mpi bakisaka kikuma yina Nzambi mepesaka nzila na bampasi. Keti nge memona ve nde na bambandu yai yonso, nzayilu ya sikisiki ya Biblia sadisaka bo na kundima nde Yehowa kewaka mpenza bisambu?

Keti nge tazola kutadila banzikisa yina kendimisa nde Nzambi kele? Bambangi ya Yehowa tasepela kusadisa nge na kulonguka kyeleka ya metala Yehowa mpi mutindu nge lenda kwenda penepene ya ‘muntu yina kewaka bisambu.’​—Nkunga 65:3.

[Banoti na nsi ya lutiti]

[Bangogo sambu na kubenda dikebi ya kele na lutiti 10]

“Ntangu mono zabaka lukanu ya Yehowa, mono bakisaka nde yandi kele muntu ya kyeleka, yina mono lenda samba na kimpwanza yonso”

[Kifwanisu ya kele na lutiti 9]

Lukwikilu ya kyeleka kekatukaka na banzikisa mpi na mpusa ya kuzaba kyeleka ya metala Nzambi