Sambu na Nki Muntu Yina Kewaka Bisambu Mepesaka Nzila na Bampasi?

ATA BANTU yankaka kesambilaka, bo kendimaka ve nde Nzambi kele. Sambu na nki? Ziku, sambu bo kemonaka bampasi mingi na nsi-ntoto yai. Keti nge mekudiyulaka sambu na nki Nzambi mepesaka nzila na bampasi?

Keti Nzambi gangaka mpenza bantu mutindu bo kele bubu yai​—ya kukonda kukuka mpi ya kenyokwama? Yo zolaka kuvanda mpasi na kuzitisa Nzambi yina gangaka bantu sambu bo mona mpasi. Kansi yindula mbandu yai: Kana nge ketala kamio mosi ya mpa mpi nge kesepela na mutindu bo mesala yo kansi na nima nge memona nde yo kele ya kubeba, keti nge tatuba nde bo salaka yo mutindu yina? Ve! Nge tandima nde muntu yina salaka yo, kusalaka yo “mbote mpenza” kansi muntu to kima mosi mebebisa yo.

Kiteso mosi, ntangu beto ketala bima ya kitoko yina kele na nsi-ntoto mpi mutindu yo mesalamaka na ndonga mpi beto kemona mubulu mpi kukonda lunungu yina kesalama, inki beto tatuba? Biblia kelongaka nde Nzambi salaka bankwelani ya ntete ya kukuka kansi na nima bo mosi kudibebisaka. (Kulonga 32:4, 5) Dyambu ya kyese kele nde, Nzambi mesila na kuyidika mambu​—kuvutudila bantu ya bulemfu nitu ya kukuka. Kansi, sambu na nki yandi kesukinina?

Sambu na Inki Yo Kesukinina?

Yo kele sambu na ntembe yina basikaka na kilanga ya Edeni ya metala muntu yina fwete yala bantu. Yehowa gangaka ve bantu sambu bo kudiyala. Yo lombaka nde yandi vanda Mfumu na bo. Biblia ketuba nde: “Ke na muntu ve lenda songa nzila na makulu na yandi ntangu yandi ke tambula.” (Yeremia 10:23) Dyambu ya mawa kele nde, bankwelani ya ntete ponaka kukolama na luyalu ya Nzambi. Sambu bo fwaka bansiku, bo kumaka bansumuki. (1 Yoane 3:4) Yo yina, bo vidisaka nitu  ya kukuka mpi kunataka mpasi sambu na bo mosi mpi bana na bo.

Na nsungi ya mafunda ya bamvula, Yehowa mebikaka bantu na kudiyala mpi mambu yina kesalama memonisaka nde bantu kele ve ti makuki ya kudiyala. Yo kemonisa nde, baluyalu yonso ya bantu menataka bampasi. Ata luyalu mosi ve menungaka na kumanisa mvita, mubulu, kukonda lunungu to maladi.

Inki Mutindu Nzambi Tayidika Mambu?

Biblia kesila nde kubika fyoti, Nzambi tatula nsi-ntoto ya mpa ya lunungu. (2 Piere 3:13) Kaka bayina kesadila kimpwanza na bo ya kupona sambu na kumonisa zola na kati na bo mpi na Nzambi tazinga na ntoto yango.​—Kulonga 30:15, 16, 19, 20.

Biblia ketuba mpi nde na ‘kilumbu ya kusambisa’ yina mefinama, Nzambi tamanisa bampasi mpi tafwa bantu yina kebasisaka yo. (2 Piere 3:7) Na nima, Yezu Kristu Mfumu yina Nzambi meponaka tayala bantu ya bulemfu. (Daniele 7:13, 14) Inki mambu luyalu ya Yezu talungisa? Biblia ketuba nde: ‘Bantu ya kudikulumusa ta zinga mbote mpi na ngemba na ntoto.’​—Nkunga 37:11.

Sambu yandi kele Ntotila na zulu, Yezu takatula mambu yonso ya mbi​—maladi, kinunu mpi lufwa—​yina basikaka ntangu bantu kolamaka na Yehowa, “nto ya moyo.” (Nkunga 36:10) Yezu tagulusa bantu yonso yina kendima luyalu na yandi. Na nsi ya luyalu na yandi, balusilu yai ya Biblia talungana:

◼ ‘Ata muntu mosi ve ta tuba nde: “Mono ke bela.” Nzambi ta lolula masumu na beto.’​—Yezaya 33:24.

◼ ‘Nzambi ta kusula mansanga yonso na meso na bo. Lufwa ta vandaka diaka ve, mawa, bidilu mpi mpasi ta vandaka diaka ve. Mambu ya ntama me vila.’​—Kusonga 21:4.

Keti yo kepesa nge ve kikesa na kuzaba nde kubika fyoti Nzambi talungisa lusilu na yandi ya kukatula bampasi yonso? Ntangu yai,  beto fwete kwikila nde yandi kewaka bisambu na beto ata yandi mepesaka nzila na bampasi sambu na mwa ntangu.

Nzambi kele. Yandi lenda wa nge, ata ntangu nge ketuba mambu yina kepesa nge mpasi mpi mawa. Yandi kele na kyese ya kumona nge na luzingu ntangu keti-keti mpi bampasi yonso tamana.