Sambu na Nki Madesu ya Bana Ke Mana Ve?

“Bantu ya nkaka kele bamfumu ebuna ba nkaka ke mona mpasi na maboko na bo.”​—LONGI 8:9.

BANGOGO yai, ke monisa mbote-mbote mambu yina baluyalu ya bantu me basisa. Yo kele na kisina ya bampasi mpi kinsukami ya bantu. Tuka ntama, bantu yina kele ti bangindu ya mbote ya me salaka bikesa sambu na kutula lunungu me bwaka na mutambu ya bwimi mpi ya madesu ya bana. Sambu na nki? Sambu na nki madesu ya bana ke mana ve? Mingi-mingi, sambu na mambu yai tatu:

1. Disumu.

Biblia ke tuba pwelele nde beto “yonso kele na nsi ya kiyeka ya disumu.” (Baroma 3:9) Bonso maladi mosi yina beto me butukaka ti yo ya ke manaka ve, disumu “kele na kati” na beto to “ke zinga” na kati na beto. Na nsungi ya mafunda ya bamvula, disumu “ke yala” bantu yonso bonso ntotila. “Nsiku” ya disumu ke landa kusala na kati na beto. Bupusi ya masumu ke pusaka bantu mingi na kutula mambote na bo na kisika ya ntete to kusadila luzingu na bo sambu na kuzwa bima ya kinsuni to kuniokula bantu ya nkaka.​—Baroma 5:21; 7:17, 20, 23, 25.

2. Nsi-ntoto ya mbi yina beto ke zinga.

Nsi-ntoto yai me fuluka ti bantu ya bwimi. Sambu na bantu ya nkaka yo kele mpasi na kuvanda ya kuswaswana ti bantu yina kele na nziunga na bo. Sambu bo ke bika nde bampusa na bo ya bwimi kutwadisa bo, bo ke kuma ti nzala ya kubaka kimfumu. Bo ke kuma mpi ti mpusa ya ngolo ya kuzwa mbongo mpi bima mingi ya kinsuni​—kuluta yina bo fwete vanda ti yo. Diambu ya mawa kele nde, bo ke ndimaka kusala ata konso diambu yina sambu na kulungisa balukanu yina. Na kisika ya kutelamina bampusa yina ya mbi, bantu ya bwimi ‘ke landaka bantu mingi sambu na kusala mambu ya mbi.’​—Kubasika 23:2.

3. Satana Diabulu.

Satana, kigangwa ya kimpeve yina kolamaka ‘ke kusa ntoto ya mvimba.’ (Kusonga 12:9) Yandi ke sala bikesa sambu na kuyala bantu. Yandi lenda sadila mayele ya mbi sambu na kusadila mpusa yina muntu yonso ke vandaka ti yo ya kuvanda ti luzingu ya mbote mpi mbongo mingi sambu na kupusa yandi na kusala mambu ya kukonda lunungu.

Keti yo ke tendula nde beto kele bonso bisadilu yina Satana ke twadisaka, mpi nde beto fwete lemfukila yandi ntangu yandi ke twadisa beto? Beto ta baka mvutu na disolo yina ke landa.