Ngiufula 2: Inki Ta Kumina Mono Kana Mono Kufwa?

ROMAN vandaka toko ntangu nduku na yandi ya ngolo fwaka na aksida ya kamio. Yandi ke tuba nde: “Lufwa ya nduku na mono pesaka mono mpasi mingi. Bamvula mingi na nima ya aksida yango, mono kumaka kudiyula nki ke kuminaka beto kana beto me fwa.”

Sambu na nki kuyula ngiufula yina? Lufwa ya bantu ke monana bonso diambu yina lenda salama ve. Yo vanda beto kele ti bamvula ikwa, beto yonso ke zolaka ve kufwa. Bantu mingi ke waka boma na mambu yina ta kumina bo na nima ya lufwa.

Bantu ya nkaka ke pesaka nki mvutu? Bantu mingi ke kwikilaka nde na lufwa kima mosi yina ke vandaka na kati ya muntu ke landaka kuzinga. Bo ke yindulaka nde bantu ya mbote ta kwenda na zulu mpi bantu ya mbi ta baka ndola ya kimakulu sambu na masumu na bo. Bantu ya nkaka ke yindulaka nde kana muntu me fwa, yandi ke zingaka diaka ve mpi nsuka-nsuka bo ke vilaka yandi kimakulu.

Bamvutu yina ke monisa nki? Mvutu ya ntete ke monisa nde na lufwa, muntu ke fwaka mpenza ve. Mvutu ya zole ke monisa nde luzingu kele ve ti lukanu. Bantu yina ke monaka nde luzingu ke vandaka ti lukanu lenda kuma ti nkadilu yai: “Beto dia mpi beto nwa, sambu mbasi beto ta fwa.”​—1 Bakorinto 15:32.

Biblia ke longaka nki? Biblia ke longaka ve nde kana muntu kufwa kima mosi ya ke vandaka na kati na yandi ke landaka na kuzinga. Na ngolo ya mpeve, Ntotila Salomo sonikaka nde: “Bantu yina ke na moyo, bo ke zaba nde bo ta fwa; kansi bantu ya kufwa kuzaba kima ve.” (Longi 9:5) Bantu yina “kuzaba kima ve” ke zabaka ve ata kima mosi yina ke salamaka na nziunga na bo. Bo lenda wa ve to kusala ata kima mosi. Yo yina, bafwa lenda sadisa ve bantu yina kele na luzingu to kusala bo mbi.

Na kuswaswana ti mambu yina bantu mingi ke kwikilaka, Nzambi gangaka ve bantu sambu bo fwa. Yandi gangaka Adami, muntu ya ntete sambu na kuzinga na ntoto kimakulu. Mbala ya ntete yina Nzambi tubilaka lufwa kele ntangu yandi zabisaka Adami ndola yina yandi ta pesa yandi kana yandi konda bulemfu. Yandi buyisaka Adami na kudia mbuma ya nti mosi mpi na nima yandi kebisaka Adami  nde kana yandi dia yo, yandi “ta fwa” mpenza. (Kuyantika 2:17) Kana Adami mpi Eva lemfukaka, bo ti bana na bo yina zolaka kuvanda ya kwikama lendaka kuzinga na ntoto kimakulu.

Adami buyaka kuwidikila lukebisu ya Nzambi. Yandi salaka disumu ntangu yandi lemfukilaka ve Nzambi, yo yina yandi fwaka. (Baroma 6:23) Ata kitini mosi ve yina vandaka na kati ya Adami landaka kuzinga na nima ya lufwa na yandi. Nkutu, ntangu Adami fwaka, yandi yambulaka kuzinga. Nzambi tubaka na Adami nde: “Na kubaka madia nge ta basikaka mutoki tii kuna nge ta vutuka na ntoto yina ya mono salaka nge. Sambu nge kele ntoto, nge ta vutuka mpi na ntoto.” (Kuyantika 3:19) Sambu bantu yonso me katukaka na Adami, beto me butukaka ti disumu mpi lufwa yina beto me bakaka na yandi.​—Baroma 5:12.

Ata Adami buyaka kulemfuka, Nzambi ta lungisa lukanu na yandi ya kufulusa ntoto ti bana ya Adami. (Kuyantika 1:28; Yezaya 55:11) Kubika fioti, Yehowa ta vutula na luzingu bantu mingi yina me fwaka. Ntumwa Polo tubilaka nsungi yango na bangogo yai: “Bantu ya lunungu ti bantu ya kukonda lunungu ta futumuka.”​—Bisalu 24:15.

Roman yina beto tubilaka na luyantiku, longukaka Biblia mpi zabaka mambu yina yo ke longaka sambu na lufwa mpi Yehowa Nzambi. Mambu yina yandi longukaka sadisaka yandi mingi.

Sambu na kuzaba mambu mingi na yina me tala mambu yina ke kuminaka muntu kana yandi me fwa, tala kapu 6 ya mukanda Inki Biblia Kelongaka Mpenza? Nge lenda zwa yo mpi na Internet na www.pr418.com

[Lupangu ya kele na lutiti 7]

Inki Yezu Tubaka Sambu na Lufwa?

Yezu ndimaka ve mabanza ya bamfumu ya mabundu ya bilumbu na yandi yina vandaka kutuba nde, lufutumuku ya bafwa ta vanda ve. (Luka 20:27) Yandi longaka mpi ve nde kitini mosi ya nitu ke landaka kuzinga na nima ya lufwa. Nkutu, yandi longaka mambu yai me landa:

Lufwa kele bonso mpongi. Ntangu nduku na yandi Lazare fwaka, Yezu tubaka nde: “Lazare nduku na beto ke lala, kansi mono ke kwenda kuna sambu na kutedimisa yandi.” Balongoki ya Yezu bakisaka ve kana yandi zolaka kutuba inki. Bo vutulaka nde: “Mfumu, kana yandi ke lala, yandi ta beluka.” Biblia ke tuba nde: “Yezu vandaka kutubila lufwa na yandi. Kansi bo yindulaka nde yandi vandaka kutubila kupema na mpongi. Na ntangu yina, Yezu tubilaka bo na masonga yonso nde: ‘Lazare me fwa.’”​—Yoane 11:11-14.

Bafwa ta futumuka. Ntangu Yezu kumaka na mbanza yina Lazare vandaka, yandi siamisaka Marta, mpangi ya Lazare ya nkento na bangogo yai: “Mpangi na nge ta futumuka.” Na nima, Yezu silaka nde: “Mono kele lufutumuku mpi luzingu. Muntu yina ke monisa lukwikilu na mono, ata kana yandi fwa, yandi ta vutuka na luzingu.” Lusilu ya Yezu vandaka ve bangogo ya mpamba. Yezu futumunaka Lazare na meso ya bantu mingi, ata yandi fwaka tuka bilumbu iya.​—Yoane 11:23, 25, 38-45.

Na mbona-meso yina yandi songaka ntumwa Yoane, Yezu silaka diaka nde bafwa ta futumuka. Yandi tubilaka ntangu yina lufwa ta basisa bantu yonso yina yo me kangaka na kimpika na mutindu ya kifwani.​—Kusonga 20:13.