Ngiufula 3: Sambu na Nki Nzambi Ke Pesaka Nzila nde Mono Mona Mpasi?

TATA ya Ian vandaka kulauka malafu. Ata Ian yelaka ti bima yonso yina yandi vandaka ti yo mfunu, yandi vandaka mpenza na mfunu nde tata na yandi kumonisila yandi zola. Yandi ke tuba nde: “Mono vandaka kuzola yandi mpenza ve, mingi-mingi sambu yandi vandaka kulauka malafu mpi kuniokula mama na mono.” Ntangu Ian kumaka mbuta, yandi yantikaka kudiyula kana Nzambi kele. Yandi vandaka kuyindula mutindu yai: “‘Kana Nzambi kele, sambu na nki yandi ke pesa nzila nde bantu kumona mpasi?’”

Sambu na nki kuyula ngiufula yina? Ata luzingu na nge kele ve mpenza ti bampasi, mbala ya nkaka nge lenda wa mpasi ntangu nge ke mona bantu yina me sala ve mbi ke mona mpasi. Kansi, kana nge ke niokwama bonso Ian, to muntu yina nge ke zolaka me bela to me fwa, ngiufula yina lenda vanda na mfunu mingi sambu na nge.

Bantu ya nkaka ke pesaka nki mvutu? Bantu ya nkaka ke yindulaka nde Nzambi ke pesaka nzila na bampasi sambu na kulonga beto na kudikulumusa mpi kuwila ba nkaka mawa. Bantu ya nkaka diaka ke yindulaka nde bantu ke niokwama na luzingu yai sambu na masumu yina bo salaka na luzingu na bo ya ntama.

Bamvutu yina ke monisa nki? Nzambi ke tulaka ve dikebi na bampasi ya bantu, yo yina yo kele mpasi na kuzola yandi. Nzambi kele muntu ya nku.

Biblia ke longaka nki? Biblia ke monisaka pwelele nde Nzambi kele ve na kisina ya bampasi ya bantu. Yo ke tubaka nde: “Ntangu muntu ke kutana ti mumekamu, bika yandi tuba ve nde: ‘Nzambi ke meka mono.’ Sambu Nzambi lenda mekama ve na mambu ya mbi mpi yandi mosi ke mekaka ve ata muntu mosi.” (Yakobo 1:13) Nkutu, dibanza ya ke monisa nde Nzambi kele na kisina ya bampasi ke wakana ve ti mutindu yina Biblia ke tubila bikalulu na yandi. Inki mutindu?

Zola kele mosi ya bikalulu ya nene ya Nzambi. (1 Yoane 4:8) Sambu na kundimisa diambu yango, Biblia ke monisaka nde Nzambi kele ti mawi ya me fwanana ti ya mama yina ke nwisa mwana na yandi. Nzambi ke yula nde: “Keti mama lenda vila mwana ya yandi ke nwisa mabele? Keti yandi lenda wa mawa ve sambu na mwana yina me basika na divumu na yandi? Ata mama kuvila mwana na yandi, kansi mono, ta vila beno ve ata fioti!” (Yezaya 49:15) Keti nge ke yindula nde, mama mosi yina ke zolaka mwana na yandi lenda niokula yandi na nku yonso? Nkutu, kibuti  yina ke tudilaka mwana na yandi dikebi ta sala yonso sambu na kulembika mpasi yina. Mutindu mosi, Nzambi ve muntu ke salaka nde bantu yina me sala mbi ve kuniokwama.​—Kuyantika 18:25.

Ata mpidina, bantu yina me salaka ka bo mbi ve ke niokwama. Nge lenda kudiyula nde: ‘Kana Nzambi ke kudibanzaka sambu na beto mpi yandi kele ti ngolo mingi, sambu na nki yandi me katulaka ve mambu yina kele na kisina ya bampasi?’

Nzambi kele ti bikuma ya mbote yina yandi me pesaka nzila na bampasi. Beto tadila kaka kikuma mosi. Mbala mingi bantu ke basisaka bampasi yina ke niokulaka ba nkaka. Bantu mingi yina ke niokulaka ba nkaka ke zolaka ve kusoba bifu na bo. Yo yina, sambu Nzambi kukatula diambu ya nene yina kele na kisina ya bampasi, yandi fwete fwa bantu ya mutindu yina.

Ntumwa Piere monisaka kikuma yina Nzambi ke yambula bantu yina ke sala mambi; yandi sonikaka nde: “Yehowa ke sukinina ve na kulungisa lusilu na yandi, mutindu bantu ya nkaka ke yindulaka, kansi yandi ke monisila beno ntima-nda, sambu yandi ke zola ve nde ata muntu mosi kufwa, kansi yandi ke zola nde bantu yonso kubalula ntima.” (2 Piere 3:9) Ntima-nda ya Yehowa Nzambi ke monisa nde yandi kele zola mpi ke wilaka bantu mawa.

Ntama mingi ve, Yehowa Nzambi ta sala diambu mosi. Yandi ta ‘vutula mpasi na bantu yina ke monisa ba nkaka yina me sala ve mbi mpasi.’ Bantu yina ke niokula ba nkaka ta baka “ndola ya lufwa ya mvula na mvula.”​—2 Batesalonika 1:6-9.

Ian yina beto tubilaka na luyantiku, zwaka bamvutu ya mbote na bangiufula na yandi na yina me tala bampasi. Mambu yina yandi longukaka sadisaka yandi na kutadila luzingu na mutindu ya nkaka.

Sambu na kuzaba mambu mingi na yina me tala kikuma yina Nzambi ke pesaka nzila na bampasi mpi mambu yina yandi ta sala sambu na yo, tala kapu 11 ya mukanda Inki Biblia Kelongaka Mpenza? Nge lenda zwa yo mpi na Internet na www.pr418.com

[Lupangu ya kele na lutiti 9]

Yezu Tubaka Inki Sambu na Bampasi?

Yezu tubaka ve nde Nzambi vandaka na kisina ya bampasi yina yandi kutanaka ti yo. Nkutu, yandi salaka mambu yai me landa.

Yezu monisaka nde Nzambi ke niokulaka ve bantu yina me sala mbi ve sambu na kupesa bo ndola. Yezu belulaka bantu ya maladi, ya makulu-kifu mpi bifwa-meso. (Matayo 15:30) Bimangu yina yandi salaka ke longa beto mambu zole ya mfunu: Ya ntete, Yezu sadilaka ngolo ya Nzambi sambu na kulembika bampasi nkasi ve sambu na kubasisa yo. Ya zole, mawa vandaka kupusa Yezu na kubelula bantu. Ntangu yandi monaka bantu ke niokwama, yandi “wilaka bo mawa.” (Matayo 20:29-34) Yezu monisaka mpenza mutindu yina Tata na yandi ke waka sambu na bampasi. Yo yina, bangogo mpi bisalu ya Yezu ke longa beto nde, Nzambi ke waka mawa ntangu yandi ke monaka mambu ya mpasi mpi yandi ke zola kumanisa yo.​—Yoane 14:7, 9.

Yezu monisaka kisina ya kieleka ya bampasi ya bantu​—Satana Diabulu. Yezu tubaka nde: “Muntu yina vandaka muntu ya ke fwaka bantu ntangu yandi yantikaka.” (Yoane 8:44) Yezu monisaka mpi nde Satana Diabulu kele “mfumu ya nsi-ntoto yai” mpi yandi muntu ke “kusaka ntoto ya mvimba.”​—Yoane 12:31; Kusonga 12:9.

Yezu pesaka beto kivuvu nde kilumbu kele bampasi yonso ta mana. Yandi longaka balongoki na yandi na kusamba nde: “Tata na beto yina kele na zulu, . . . bika nde Kimfumu na nge kukwisa. Bika nde luzolo na nge kusalama na ntoto, bonso na zulu.” (Matayo 6:9, 10) Ntangu Kimfumu ya Nzambi ta kwisa, bampasi ta vanda diaka ve na ntoto, kaka mutindu yo ke vandaka ve na zulu.

Na mbona-meso yina yandi songaka ntumwa Yoane, Yezu monisaka mutindu luzingu ta vanda sambu na bantu yina ta zinga na nsi ya Kimfumu ya Nzambi. Na ntangu yango, Nzambi “ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”​—Kusonga 1:1; 21:3, 4.