Na Batangi na Beto
Zulunalu yai ya nge ke tanga yantikaka kubasika na Yuli 1879, na Kingelesi. Tuka ntangu yina, mambu mingi me sobaka; zulunalu yai mpi me sobaka. (Tala bafoto ya kele na zulu.) Yantika na nimero yai, nge ta mona bansoba ya nkaka na zulunalu Nzozulu ya Nkengi. Inki mambu me soba?
Na bansi mingi, bantu ke bakaka bansangu na Internet mpi ke sepelaka na kusala mpidina. Kubweta mpuku ya ordinatere mbala mosi mpamba lenda pesa bo bansangu yina bo lenda zwa kaka na Internet. Bo lenda tanga mikanda, baperiodike mpi bazulunalu mingi na Internet.
Sambu bantu mingi ke sepelaka kutanga mambu na Internet, beto me soba site na beto ya Internet www.pr418.com, sambu nde bantu kusepela na yo mingi mpi kusadila yo kukonda mpasi. Bantu yina ke kotaka na site na beto lenda tanga mikanda yina me basikaka na bandinga kuluta 430. Kansi yantika na ngonda yai, bo lenda tanga mpi masolo ya nkaka ya beto me pona, yina vandaka kubasika mbala na mbala na bazulunalu na beto, kansi yina ta basikaka ntangu yai kaka na site na beto ya Internet. *
Sambu beto ta basisaka masolo mingi na Internet, Nimero ya Bantu Yonso ya Nzozulu ya Nkengi ta vandaka diaka ve ti balutiti 32 kansi 16, yantika na nimero yai. Beto ke basisaka dezia Nzozulu ya Nkengi na bandinga 204. Sambu yo me kuma ti balutiti fioti, ntangu yai bo lenda yantika kubalula zulunalu yai na bandinga mingi kuluta.
Beto ke kwikila nde bansoba yai ta sadisa bantu mingi na kuwa nsangu yina ke gulusa ya kele na Biblia. Beto kele ti lukanu ya kulanda kupesa bansangu ya mfunu mingi mpi ya ke sepedisa na Internet mpi na mikanda yina beto ke niemaka, sambu na kusadisa batangi na beto mingi yina ke zitisaka Biblia mpi ya ke zolaka kuzaba mambu yina yo ke longaka mpenza.
Bambasisi
^ Na kati ya masolo yina ta basikaka kaka na Internet, beto ta mona: “Sambu na Baleke,” yina ke sadisaka mingi-mingi baleke na kulonguka Biblia, mpi “Malongi ya Biblia,” disolo ya kulandana yina ke sadisaka bibuti na kulonga bana na bo ya bamvula tatu tii na nsi.
