Kudikulumusa ke tendula kukonda kudisonga to kukonda lulendo. Muntu ya kudikulumusa ke monaka ve nde bantu ya nkaka kele na nsi na yandi. Yandi ke zabaka nde yandi kele muntu ya kukonda kukuka mpi ke ndimaka nde yo kele ti mambu ya nkaka yina yandi lenda sala ve.

Moize bikaka ve nde kiyeka na yandi kukumisa yandi lulendo. Mbala mingi, yo ke monanaka pwelele kana muntu kele na kudikulumusa to ve ntangu yandi me baka kiyeka. Robert G. Ingersoll nsoniki mosi ya mvu-nkama ya 19 tubaka nde: “Bantu mingi lenda kanga ntima ntangu bo ke kutana ti bampasi. Kansi, kana nge ke zola kuzaba kimuntu ya kieleka ya muntu mosi buna, pesa yandi kiyeka.” Kana yo kele mpidina, Moize bikaka mbandu ya mbote na yina me tala kudikulumusa. Nki mutindu?

Moize bakaka kiyeka ya nene, sambu Yehowa pesaka yandi mukumba ya kutwadisa bantu ya Izraele. Ata mpidina, kiyeka yina kumisaka ve Moize lulendo. Mu mbandu, beto tala mambu yina yandi salaka na kudikulumusa yonso sambu na kuzenga diambu mosi ya mpasi ya me tala banswa ya kubaka difwa. (Kutanga 27:1-11) Yo vandaka diambu mosi ya nene mpenza, sambu lukanu yina bo zolaka kubaka zolaka kuvanda ti bupusi na mabuta yonso yina zolaka kubasika na nima.

Moize salaka inki? Keti yandi yindulaka nde sambu yandi vandaka ntwadisi ya bantu ya Izraele, yandi fwanaka mpenza sambu na kubaka lukanu na diambu yina? Keti yandi tulaka ntima na mayele na yandi mosi, na mambu mingi yina yandi zabaka, to na nzayilu yina yandi vandaka ti yo sambu yandi zabaka mutindu Yehowa ke tadilaka mambu?

Ziku muntu ya lulendo zolaka kusala mpidina. Kansi Moize salaka ve mpidina. Biblia ke zabisa beto nde: “Moize songaka mambu [yina] na Mfumu Nzambi.” (Kutanga 27:5) Yindula fioti! Ata na nima ya kutwadisa bantu ya Izraele bamvula kiteso ya 40, Moize tulaka kaka ntima na Yehowa kansi na yandi mosi ve. Yo ke monana pwelele nde, Moize vandaka mpenza muntu ya kudikulumusa!

Moize yindulaka ve nde yandi mosi kaka fwete vanda ti kiyeka. Yandi sepelaka ntangu Yehowa pesaka nzila nde bantu ya nkaka ya Izraele kukuma baprofete bonso yandi. (Kutanga 11:24-29) Ntangu bokilo na yandi zabisaka yandi na kupesa mikumba ya nkaka na bantu ya nkaka ya Izraele sambu bo sadisa yandi, Moize ndimaka mpi sadilaka dibanza yina na kudikulumusa yonso. (Kubasika 18:13-24) Mpi ntangu yandi kumaka na nsuka ya luzingu na yandi, ata yandi vandaka kaka ngolo na nitu, Moize lombaka Yehowa na kupona muntu yina zolaka kuyinga yandi. Ntangu Yehowa ponaka Yozue, Moize sadisaka toko yina na ntima ya mvimba mpi siamisaka bantu ya Izraele na kulanda lutwadisu ya Yozue na Ntoto ya Lusilu. (Kutanga 27:15-18; Kulonga 31:3-6; 34:7) Moize monaka nde, kutwadisa bantu ya Izraele na lusambu ya Nzambi vandaka dibaku ya mbote sambu na yandi. Kansi yandi tulaka ve kiyeka na yandi na ntwala ya mambote ya bantu ya nkaka.

Beto fwete bika ve nde kimfumu, kiyeka to makuki na beto kukumisa beto lulendo. Yibuka nde: Sambu nde Yehowa kupesa beto mikumba, kudikulumusa kele mfunu mingi kuluta makuki na beto. (1 Samuele 15:17) Kana beto ke kudikulumusa mpenza, beto ta sala bikesa sambu na kusadila ndongisila yai ya mayele: ‘Tula ntima na nge yonso na Mfumu Nzambi; kutula ntima ve na mayele na nge mosi.’—Bingana 3:5, 6.

Mbandu ya Moize ke longa beto na kubaka ve kiyeka na beto na mbalu mingi.

Keti kulanda mbandu ya kudikulumusa ya Moize lenda natila beto mambote? Ee! Kana beto ke monisa kudikulumusa ya masonga, luzingu ya bantu yina kele na nziunga na beto ta vanda ya mbote mpi bo ta sepela na beto. Diambu ya mfunu kuluta, Yehowa Nzambi ta sepela na beto sambu yandi mosi ke monisaka mpi kikalulu yai ya kitoko. (Nkunga 18:35) “Nzambi kele mbeni ya bantu ya lulendo, kansi yandi ke monisaka ntima ya mbote ya nene na bantu ya kudikulumusa.” (1 Piere 5:5) Yai kele kikuma ya nene mpenza ya kulanda mbandu ya kudikulumusa ya Moize!