Ntangu mono vandaka mwana-fioti, bibuti na mono fwaka makwela, mpi mama yandi mosi vandaka kusansa mono ti bambuta na mono zole ya babakala mpi mosi ya nkento. Na ntangu yina na France, bo vandaka ve kulonga bababa mutindu bo ke salaka yo bubu yai, mpi mbala mingi ba metode yina bo vandaka kusadila vandaka mpasi. Ata mpidina, banda bumwana na mono, mono zwaka dibaku yina bababa mingi vandaka ve ti yo. Bika mono tela beno.

Mwa bamvula na ntwala, balongi mingi vandaka kuyindula nde sambu na kulonga bana yina vandaka bababa, bo fwete lomba bo na ngolo na kutala mutindu bikobo ya longi ke nikana ntangu yandi ke tuba. Nkutu, na France, kisika ya mono yelaka, ba ekole vandaka kubuyisa kusadila ndinga ya bidimbu. Ntangu longi ke longa, bo vandaka nkutu kukanga maboko ya bana ya nkaka yina vandaka bababa bansinga na mukongo.

Ntangu mono vandaka ntete mwana-fioti, mono vandaka kulutisa bangunga mingi konso mposo ti munganga yina vandaka kulonga bababa. Bo vandaka kusimba mono na matama to na ntu mpi kupusa mono na ngolo na kutuba mbala na mbala bangogo yina mono vandaka kuwa ve. Mono vandaka kukuka ve kusolula ti bana ya nkaka. Yo vandaka bamvula ya mpasi mpenza sambu na mono!

Na nima, ntangu mono kumaka ti bamvula sambanu, bo tindaka mono na interna na nzo-nkanda ya bababa. Sambu na mbala ya ntete, mono kutanaka ti bana ya nkaka yina vandaka bababa. Kuna mpi, bo buyisaka kusadila ndinga ya bidimbu. Kana beto sala bidimbu na nzo-nkanda, bo vandaka kubula beto na misapi ya maboko to kubenda ngolo nsuki na beto. Kansi, beto basisaka beto mosi bidimbu yina beto vandaka kusadila na kinsweki. Nsuka-nsuka, mono kumaka kusolula ti bana ya nkaka kukonda mpasi. Yo vandaka bamvula iya ya kiese.

Kansi, ntangu mono kumaka ti bamvula 10, mono kotaka na nzo-nkanda ya ntete kumosi ti bana yina kele ve bababa. Mono lembaka nitu mpenza! Mono yindulaka nde, bababa yonso fwaka mpi mono bikalaka kaka mono mosi na ntoto ya mvimba. Sambu dibuta na mono vandaka kulanda bandongisila ya minganga, yina vandaka kuwa boma nde mono lendaka kuvidisa makuki na mono ya kutuba, bo longukaka ve ndinga ya bidimbu mpi bo vandaka kupesa mono ve nswa ya kuvukana ti bana yina vandaka bababa. Mono ke vilaka ve kilumbu yina beto kwendaka na munganga mosi yina ke sadisaka bababa. Yandi vandaka ti mukanda ya ndinga ya bidimbu na zulu ya mesa na yandi. Ntangu mono monaka bifwanisu yina vandaka na lutiti ya zulu, mono songisaka yo musapi mpi tubaka nde: “Mono ke zola yai!” Mpi munganga bumbaka yo nswalu. a

Mama salaka bikesa sambu na kusansa beto na minsiku ya Biblia. Yandi vandaka kunata beto na balukutakanu ya Bambangi ya Yehowa na dibundu ya Mérignac, penepene ya mbanza Bordeaux. Sambu mono vandaka mwana-fioti mono vandaka kubakisa mambu fioti kaka na balukutakanu. Kansi, bampangi ya dibundu vandaka kufonga pene-pene na mono, mpi kana mosi me telama ya nkaka vandaka kuyinga sambu na kusonikila mono banoti ya mambu yina bo vandaka kulonga. Zola mpi dikebi na bo simbaka ntima na mono. Na nzo, mama vandaka kulonguka Biblia ti mono, kansi mono vandaka kubakisa mbote-mbote ve mambu yango. Mono kudimonaka bonso profete Daniele yina, na nima ya kubaka mbikudulu na wanzio, tubaka nde: ‘Mono waka mambu ya yandi vandaka kutuba kansi mono lendaka kubakisa ve.’ (Daniele 12:8) Sambu na mono, “Mono monaka kansi mono lendaka kubakisa ve.”

Ata mpidina, malembe-malembe mono yantikaka kubakisa bakieleka ya nkaka ya mfunu ya Biblia. Mono vandaka kusepela na malongi yina mono vandaka kubakisa mpi kusala bikesa sambu na kusadila yo na luzingu na mono. Mono longukaka mpi na kutala bikalulu ya bampangi ya nkaka. Mu mbandu, Biblia ke zabisaka beto na kuvanda ntima nda. (Yakobo 5:7, 8) Ata mpidina, mono vandaka kubakisa mpenza ve ntendula na yo. Kansi, ntangu mono vandaka kumona mutindu bampangi ya dibundu vandaka kumonisa kikalulu yina, mono bakisaka mbote-mbote ntendula na yo. Ya kieleka, dibundu ya Bukristu sadisaka mono mingi.

Kilumbu mosi, ntangu mono vandaka toko, mono monaka batoko ya bababa na nzila mpi bo vandaka kusolula na bidimbu. Mono yantikaka kuvukana ti bo na kinsweki mpi kulonguka ndinga ya bidimbu ya insi France (LSF). Mono landaka kukwenda na balukutakanu ya dibundu, kisika mono kutanaka ti toko mosi na zina ya Stéphane, yina tudilaka mono dikebi ya mingi. Yandi salaka bikesa mingi sambu na kusolula ti mono, mpi beto kumaka banduku ya ngolo. Kansi, diambu mosi ya mawa vandaka kuvingila mono. Bo kotisaka Stéphane na boloko sambu yandi buyaka kukuma soda. Mono lembaka nitu mpenza! Na nsungi yonso yina Stéphane vandaka na boloko, mono lembaka nitu mpi yambulaka kukwenda na balukutakanu.

Bangonda 11 na nima, bo basisaka Stéphane na boloko mpi yandi vutukaka na nzo. Yindula kiese ya mingi yina mono waka ntangu Stéphane yantikaka diaka kusolula ti mono na ndinga ya bidimbu. Mono yitukaka ngolo mpenza! Inki salamaka? Ntangu Stéphane vandaka na boloko, yandi longukaka ndinga ya bidimbu ya France. Mono vandaka kutala bidimbu yina Stéphane vandaka kusala na maboko mpi na luse na yandi, mpidina mono vandaka kuwa kiese mingi.

Stéphane yantikaka kulonguka Biblia ti mono. Yo vandaka na ntangu yina mono kumaka ti makuki ya kubakisa bakieleka yonso ya Biblia yina mono longukaka na ntwala. Ntangu mono vandaka mwana-fioti, mono vandaka kuzola kutala bifwanisu ya kitoko ya mikanda na beto yina ke tendulaka Biblia mpi kufwanisa bifwanisu ya bantu yina kele na mikanda yango ti diambu mosi mosi sambu nde disolo yango kubikala na mabanza na mono. Mono zabaka mambu mingi na yina me tala Abrahami “nkuna” na yandi mpi ‘kibuka ya nene,’ kansi mono bakisaka mbote-mbote ntendula ya malongi yina kaka ntangu bo tendudilaka mono mambu yai na ndinga ya bidimbu. (Kuyantika 22:15-18; Kusonga 7:9) Yo vandaka pwelele nde, mono monaka nde ndinga ya bidimbu vandaka ndinga na mono mpenza, ndinga ya ntima na mono.

Sambu ntangu yai mono kumaka kubakisa mambu yina bo vandaka kulonga na balukutakanu mpi yo vandaka kusimba ntima na mono, mono kumaka na mpusa ya kulonguka mambu mingi. Ti lusadisu ya Stéphane, nzayilu na mono ya Biblia landaka kuyela, mpi na 1992, mono kudipesaka na Yehowa Nzambi mpi bakaka mbotika. Kansi, ata mono yelaka mpenza, mono vandaka kaka nsoni-nsoni mpi kukuka ve kusolula ti bantu ya nkaka sambu ntangu mono vandaka mwana-fioti, mono vandaka ve kusolula ti bantu.

Nsuka-nsuka, kimvuka mosi ya bababa yina mono vandaka kuvukana ti bo vukanaka na dibundu mosi na Pessac, na Bordeaux. Yo sadisaka mono mingi na  kuyela na kimpeve. Ata mono vandaka kaka kunwana ti kikalulu na mono ya nsoni-nsoni, banduku na mono yina vandaka ve bababa vandaka kutudila mono dikebi sambu na kuzikisa nde mono vandaka kubakisa mambu yonso. Gilles ti nkento na yandi Elodie, salaka bikesa ya ngolo sambu na kusolula ti mono. Mbala mingi bo vandaka kubinga mono sambu na kudia to kunwa kafe ti bo na nima ya balukutakanu, mpidina beto yedisaka kinduku ya ngolo. Yo vandaka kiese mpenza na kuvanda na kati ya bantu yina ke fululaka zola ya Nzambi!

Yo kele na dibundu yina mono kutanaka ti Vanessa, mpangi nkento mosi ya kitoko. Mono sepelaka na dikebi na yandi mpi bikalulu na yandi ya lunungu. Yandi vandaka kumona ve nde kukonda kutuba na mono vandaka ndilu sambu na kusolula, kansi bonso dibaku ya kulonguka kusolula ti baba. Beto zolanaka mpi beto kwelanaka na 2005. Ata mono vandaka ti bandilu sambu na kusolula mbote-mbote, Vanessa sadisaka mono na kunwana ti kikalulu na mono ya nsoni-nsoni mpi na kusolula kukonda mpasi ti bankaka. Mono ke sepelaka mingi na lusadisu na yandi ntangu mono ke lungisaka mikumba na mono.

Kaka na mvula yina beto kwelanaka, biro ya filiale ya Bambangi ya Yehowa ya France yina kele na Louviers, bingisaka mono na kukwenda kubaka formasio ya ngonda mosi sambu na kisalu ya kubalula mikanda. Na bamvula yina me luta, biro ya filiale salaka kisalu ya ngolo sambu na kubasisa mikanda mingi na ndinga ya bidimbu ya France na DVD. Kansi, sambu kisalu mingi vandaka kuvingila bo na makwisa, departema ya bambaludi vandaka na mfunu ya lusadisu.

Mono ti Vanessa monaka nde, kusala na Betele vandaka dibaku mosi ya nene mpi dikabu yina katukaka na Yehowa Nzambi, kansi ata mpidina beto vandaka kudiyangisa mwa fioti. Inki ta kumina kimvuka na beto ya ndinga ya bidimbu? Inki beto ta sala sambu na nzo na beto? Keti Vanessa ta zwa kisalu na mbanza yina? Na mutindu mosi ya kuyituka, Yehowa pesaka mvutu ya mbote na mambu yina yonso. Mono monaka mpenza nde Yehowa ke zolaka beto mpi bababa.

Sambu mono kumaka kusala na departema ya kubalula mikanda, mono bakisaka mbote-mbote mambu yonso yina ke salamaka sambu na kusadisa bababa na kuzaba Nzambi. Mpi mono ke vandaka na kiese ya kumona mutindu bampangi yina beto ke salaka ti bo ke salaka bikesa sambu na kusolula ti mono. Mwa bidimbu yina bo me longukaka mpi ke kusadilaka vandaka kusimba ntima na mono. Mono vandaka kudimona ve mono mosi. Zola yina yonso monisaka bumosi yina ke vandaka na kati ya bansadi ya Yehowa.​—Nkunga 133:1.

Mono ke tondaka Yehowa sambu na nzila ya dibundu ya Bukristu, yandi vandaka kuzikisa ntangu yonso nde muntu mosi kuvanda pene-pene na mono sambu na kusadisa mono. Mono ke sepelaka mpi na mukumba ya fioti yina mono kele ti yo ya kusadisa bampangi na mono bababa na kuzaba Ngangi na beto ya zola mpi kukwenda pene-pene na yandi. Mono ke vingilaka na kiese yonso kilumbu yina bandilu yonso ya ke kangaka bantu nzila ya kusolula ta mana mpi bantu yonso ta tuba “ndinga ya kukonda mvindu” (NW)​—kieleka ya me tala Yehowa Nzambi mpi balukanu na yandi​—bonso dibuta mosi ya kele na bumosi.​—Sofonia 3:9.