KETI Yezu vandaka mpenza ti luzingu ya kele ti lukanu? Yo ke monana nde, yandi yelaka na luzingu mosi ya kukonda mindondo, mpi na luzingu na yandi ya mvimba, yandi vandaka ve ti bima mingi ya nsi-ntoto yai. Nkutu, yandi vandaka “ve ti kisika ya kutula ntu na yandi.” (Luka 9:57, 58) Katula yo, bo mengaka yandi, bo kusilaka yandi makambu, mpi nsuka-nsuka, bambeni na yandi fwaka yandi.

Nge lenda yindula mutindu yai: ‘Luzingu ya mutindu yina kele ve ata fioti ti lukanu!’ Kansi, kele ti mambu mingi yina beto fwete longuka na luzingu ya Yezu. Bika beto tadila mambu iya ya luzingu na yandi.

“Madia na mono kele ya kusala luzolo ya muntu yina tindaka mono.”​—Yoane 4:34.

Na kutuba mpi na bisalu na yandi, Yezu salaka yonso sambu na kulungisa luzolo ya Yehowa, Tata na yandi ya zulu. * Yezu vandaka kumona kiese mingi na kusala luzolo ya Nzambi. Nkutu yandi fwanisaka yo ti madia, mutindu verse ke monisa yo. Beto tadila mambu yina pusaka yandi na kufwanisa kusala luzolo ya Nzambi ti madia.

Yezu tubaka bangogo yina pene-pene ya midi. (Yoane 4:6) Yandi tambulaka suka ya mvimba na bangumba mpi miwanda ya Samaria, yo yina yandi waka mpenza nzala. Nkutu, balongoki na yandi siamisaka yandi nde: “Rabi, dia.” (Yoane 4:31) Na mvutu yina yandi pesaka bo, Yezu monisaka nde kusala luzolo ya Nzambi vandaka kupesa yandi kikesa mpi yo vandaka bonso madia na yandi. Keti yo ke monisa ve nde luzingu ya muntu yina vandaka ti lukanu?

“Mono ke zolaka Tata.”​—Yoane 14:31.

Yezu vandaka ti bangwisana ya ngolo mpenza ti Tata na yandi ya zulu. Zola ya ngolo ya Yezu sambu na Nzambi pusaka yandi na kusadisa bantu na kuzaba Tata na yandi, zina na yandi, balukanu na yandi, mpi bikalulu na yandi. Na bangogo, na bisalu mpi na nkadilu na yandi, Yezu monisaka Tata na yandi na mutindu ya kukuka na mpila nde beto ke mona na luzingu ya Yezu bikalulu ya Tata na yandi. Yo yina, ntangu Filipo yulaka Yezu nde: “Songa beto Tata,” Yezu vutudilaka yandi nde: “Muntu yina me mona mono me mona mpi Tata.”​—Yoane 14:8, 9.

Yezu zolaka Tata na yandi mingi na mpila nde yandi lemfukilaka yandi na luzolo yonso na kundimaka lufwa. (Bafilipi 2:7, 8; 1 Yoane 5:3) Zola ya mingi sambu na Nzambi salaka nde luzingu ya Yezu kuvanda ti lukanu.

“Ata muntu mosi ve kele na zola ya nene kuluta yai, nde muntu kupesa moyo na yandi sambu na banduku na yandi.”​—Yoane 15:13.

Sambu na bantu ya kukonda kukuka, kivuvu ya luzingu na bilumbu ke kwisa kele ya mpasi. Biblia ke tendula nde: “Na nzila ya muntu mosi [Adami] disumu kotaka na nsi-ntoto mpi lufwa na nzila ya disumu, mutindu mosi mpi lufwa me mwanganaka na bantu yonso sambu bo yonso salaka disumu.” (Baroma 5:12) Na ngolo na beto mosi, beto lenda tina ve malanda ya disumu, disongidila lufwa.​—Baroma 6:23.

Diambu ya kiese kele nde, Yehowa me yidikaka na zola yonso diambu mosi sambu na kukatula bantu na mpasi yina. Yandi bikaka nde Mwana na yandi ya kukuka mpi ya kukonda masumu, yina zabanaka na zina ya Yezu, kuniokwama mpi kufwa sambu na kupesa nkudulu yina vandaka mfunu sambu na kukatula bantu na kimpika ya disumu mpi ya lufwa. Zola sambu na Tata na yandi mpi sambu na bantu pusaka Yezu na kundima na luzolo yonso mpi kupesa luzingu ya kimuntu ya kukuka sambu na mambote na beto. (Baroma 5:6-8) Zola yina ya kukonda bwimi monisaka nde luzingu na yandi vandaka ti lukanu. *

“Yai kele Mwana na mono, ya mono ke zolaka mingi, yina mono me ndima.”​—Matayo 3:17.

Yehowa tubaka bangogo yina tuka na zulu na ntangu ya mbotika ya Yezu. Mpidina, Yehowa monisaka pwelele zola na yandi sambu na Mwana na yandi, Yezu mpi ndimaka yandi. Yo yina Yezu tubaka kukonda ntembe nde: “Tata ke zolaka mono”! (Yoane 10:17) Sambu Yezu zabaka nde Tata na yandi zolaka yandi mpi ndimaka yandi, yandi nwanaka ti kimbeni mpi kuvwenza ti kivuvu. Zola yina mpi kundimama na yandi na Nzambi pesaka yandi kikesa na ntwala ya lufwa. (Yoa. 10:18) Ntembe kele ve nde, zola mpi kundimama na yandi na Tata na yandi monisaka nde luzingu na yandi vandaka ti lukanu.

Ntembe kele ve nde, Yezu vandaka ti luzingu ya kele ti lukanu. Yo ke pwelele nde, beto lenda longuka mambu mingi na yandi na mutindu yina beto lenda vanda ti luzingu ya kele ti lukanu. Disolo yina ke landa ta tubila mwa bandongisila ya pwelele yina Yezu pesaka balongoki na yandi na yina me tala mutindu ya kuzinga.