Nkento mosi yina vandaka kukwikila ve nde Yehowa lenda kudibanza sambu na yandi tubaka nde: “Kudiwa nde mono kele na mfunu ve kele diambu ya nene yina mono ke salaka bikesa sambu na kununga yo.” Keti nge mpi ke kudiwaka mpidina? Kana yo kele mpidina, nge lenda kudiyula nde: ‘Keti Yehowa ke kudibanzaka mpenza sambu na konso nsadi na yandi?’ Mvutu kele nde ee! Bangogo ya Yezu ke ndimisa nde Yehowa ke kudibanzaka sambu na beto.​—Tanga Yoane 6:44.

Yezu, muntu yina me zaba mbote-mbote bikalulu ya Yehowa mpi luzolo na yandi kuluta bantu yonso ya nkaka, tubaka nki? (Luka 10:22) Yezu tubaka nde: “Ata muntu mosi ve lenda kwisa na mono kana Tata, yina tindaka mono, kubenda yandi ve.” Yo yina, beto lenda kuma ve balongoki ya Kristu mpi bansadi ya Yehowa Tata na beto ya zulu, kana Yehowa yandi mosi me benda beto ve. (2 Batesalonika 2:13) Kana beto bakisa bangogo ya Yezu, beto ta mona na bangogo na yandi, nzikisa ya ngolo ya ke monisa nde Yehowa ke kudibanzaka sambu na beto.

Kutuba nde, Yehowa ke bendaka beto ke tendula nki? Bo ke sadilaka mpi kisongi-diambu ya Kigreki ya bo ke balulaka na “kubenda,” sambu na kutubila kubenda bukondi ya bambisi. (Yoane 21:6, 11) Keti Yehowa ke bendaka beto na ngolo sambu na kusadila yandi? Ve. Yehowa me pesaka beto kimpwanza ya kupona, yo yina yandi ke kangulaka ve ntima na beto na ngolo. (Kulonga 30:19, 20) Muntu mosi ya mayele tubaka yo mutindu yai: “Kele ve ti kima ya kukangudila na nganda ya kielo ya ntima ya muntu. Yo fwete kanguka na kati.” Yehowa ke fimpaka bantima ya bamilio ya bantu ya nsi-ntoto yai, mpi yandi ke sosaka konso muntu yina ke zola kuzaba yandi. (1 Bansangu 28:9) Kana yandi mona muntu ya mutindu yina, yandi ke tudilaka yandi dikebi. Na nki mutindu?

Na mawete yonso, Yehowa ke bendaka ntima ya muntu yina kele “ti nkadilu ya mbote.” (Bisalu 13:48) Yandi ke salaka mpidina na mitindu zole—na nzila ya nsangu ya mbote ya Biblia, yina konso muntu na kati na beto ke waka, mpi na nzila ya mpeve santu na yandi. Kana Yehowa me tala ntima ya muntu mpi me mona nde yo me ndima kieleka ya Biblia, yandi ke sadilaka mpeve santu na yandi sambu na kusadisa muntu yina na kubakisa mpi kusadila kieleka yina na luzingu na yandi. (1 Bakorinto 2:11, 12) Kukonda lusadisu ya Nzambi, beto lendaka kukuma ve balongoki ya kieleka ya Yezu mpi bansadi ya Yehowa ya me kudipesaka.

Kansi, bangogo ya Yezu yina kele na Yoane 6:44 ke longa beto nki na yina me tala Yehowa Nzambi? Yehowa ke bendaka bantu sambu yandi ke monaka kima mosi ya mbote na ntima na bo mpi yandi ke kudibanzaka sambu na bo. Kubakisa kieleka yai ya ke pesa kikesa lembikaka ntima ya nkento yina beto tubilaka na luyantiku ya disolo. Yandi ke tuba nde: “Kuvanda nsadi ya Yehowa kele dibaku mosi ya mbote yina konso muntu lenda baka. Mpi kana Yehowa me pona mono na kusadila yandi, yo ke tendula nde mono kele na mbalu mingi na meso na yandi.” Ebuna nge? Keti kuzaba nde Yehowa ke kudibanzaka sambu na konso nsadi na yandi, ke pusa nge na kundima kukangula kielo ya ntima na nge?