Na ntangu yina, banzila mingi vandaka ve ti gudro mpi yo vandaka mvindu. Bantu mingi ya babwala ya nziunga vandaka ti kikalulu ya kukwisa na mbanza ti bampunda na bo yina vandaka kunata bima mingi. Beto vandaka na dibuta mosi ya kinsukami mpenza ya bana uvwa mpi mono vandaka mwana ya nsambwadi. Tata na mono vandaka kutunga basapatu yina bo ke bingaka guaraches sambu na kusansa dibuta. Kansi yandi fwaka ntangu mono vandaka ti bamvula nsambwadi. Yantika ntangu yina, mama na beto vandaka kuniokwama sambu na kudisa dibuta.

Nkaka na beto ya bakala vandaka kubula violon mpi yandi vandaka ntwadisi ya orkestre yina zabaka kubula mbote-mbote miziki ya mabundu. Bantu mingi ya dibuta na beto zabaka kubula kisadilu mosi ya miziki. Mama na beto vandaka kuyimba na korale ya dibundu mpi ngwashi na beto vandaka muyimbi ya ngolo mpi vandaka kubula piano. Beto kudipesaka mingi na mambu ya lusambu—mono vandaka servant, mpi mono vandaka ti lukanu ya kukuma mumpe ya Dibundu ya Katolika. Kansi, mono vandaka mpi kusepela na bafilme ya karate. Sambu mono vandaka kutala bafilme yina mingi, mono kumaka ti nkadilu ya mubulu.

Mono kotaka na ekole mosi ya dibundu na Puebla, ya kuvandaka bonso seminaire. Lukanu na mono vandaka ya kukuma mumpe ya Dibundu ya Katolika. Kansi na mvula ya nsuka ya nzo-nkanda, mambu ya Dibundu ya Katolika lembisaka mono nitu. Toko mosi ya masere lombaka mono na kuvukisa nitu ti yandi. Ata mono telaminaka mpukumuna yina, yo pesaka mono mpusa ya kukwela.  Diaka, mono monaka nde mimpe mingi vandaka kusala mansoni na kinsweki. Nsuka-nsuka mono yambulaka lukanu na mono ya kukuma mumpe.

Mono bakaka lukanu ya kulonguka miziki na nzo-nkanda ya miziki na mbanza Mexique. Ntangu mono manisaka, mono kwelaka, mpi beto butaka bana iya. Sambu na kusansa dibuta na mono, mono vandaka kuyimba na Misa ya Dibundu ya Katolika.

Kaka na luyantiku, makwela na beto vandaka na mavwanga. Mono ti nkento na mono vandaka kunwana, mingi-mingi sambu beto zole vandaka na zwa ya ngolo. Beto vandaka kuyantika na kuswana mpi na nima kunwana. Nsuka-nsuka, na nima ya bamvula 13 beto bakaka lukanu ya kukabwana mpi na nima kufwa makwela.

Mbala ya ntete yina mono kutanaka ti Bambangi ya Yehowa, vandaka na ntwala nde beto kabwana ti nkento na mono. Bambangi zole kokulaka na kielo na beto mpi bo lombaka mono na kusolula masolo ya Biblia ti bo. Mono yindulaka nde mono zabaka mambu mingi ya me tala Nzambi, yo yina mono zolaka kumonisa bo nde bo vandaka na kifu. Mono yulaka bangiufula ya mpasi yina mono vandaka kuyindula nde bamvutu vandaka ve. Kansi mono yitukaka sambu ntangu yonso, bo vandaka kupesa mono bamvutu ya mbote ya me katuka na Biblia. Mono yantikaka kumona nde mono zabaka mambu fioti kibeni. Kansi, nkento na mono vandaka kuzola ve Bambangi ya Yehowa, mpi mono vandaka ti kisalu mingi, yo yina bo yambulaka kukwisa.

Bamvula tanu na nima, mono kumaka kuzinga ti nkento ya nkaka, Elvira; yo kele na ntangu yina mono kutanaka diaka ti Bambangi ya Yehowa. Elvira vandaka ve kumenga Bambangi ya Yehowa, yo yina yo vandaka pete sambu na kulonguka Biblia mbala na mbala. Ata mpidina, yo bakaka bamvula mingi sambu nde mono yambula bifu na mono ya ntama.

Mono monaka nde kana mono ke zola kusadila Yehowa na ntima ya mvimba, mono fwete sala bansoba ya ngolo. Ntete-ntete, yo lombaka nde mono yambula kuyimba na Misa ya Dibundu ya Katolika, yina ke tendula nde mono sosa mutindu ya nkaka ya kuzingila. (Kusonga 18:4) Yo lombaka mpi nde mono sonikisa makwela na mono ti Elvira na leta.

Kansi, nsoba ya ngolo yina yo lombaka nde mono sala vandaka, kuyala kikalulu na mono ya kuwa makasi. Mingi-mingi baverse zole ya Biblia sadisaka mono: Nkunga 11:5, yina ke monisa nde Yehowa ke mengaka mubulu mpi 1 Piere 3:7, yina longaka mono nde kana mono ke zola nde Yehowa kuwa bisambu na mono, mono fwete pesa nkento na mono lukumu. Ntangu mono vandaka kuyindulula baverse yai mpi kusamba sambu na kulomba lusadisu ya Yehowa, malembe-malembe mono kumaka kuyala kifu na mono ya kuwa makasi.

Ntangu yai, mono kele ti dibuta mosi ya kiese. Mono ke sala bikesa sambu na kuyidika bangwisana na mono ti bana yina mono butaka ti nkento ya ntete mpi kusadisa dibuta na mono ya bubu yai na kuvanda ti lukwikilu ya ngolo.

Ntangu mono vandaka mwana-fioti, mono vandaka ti lukanu ya kukuma mumpe mpi kusadisa bantu. Bubu yai mono ke monaka nde luzingu na mono kele mpenza na mfunu. Mono ke longaka miziki sambu na kusansa dibuta na mono. Mono kele na ntonda mingi mutindu Yehowa monisilaka mono ntima-nda, pesaka mono dibaku ya kusala bansoba mpi kukuma muntu ya mbote!