Muntu ya mbi yina beto lenda bakila dilongi kele yina nge ke mona na kifwanisu yai, yina Yezu ke solula ti yandi. Muntu yai ya mbi me wa mawa na ntima sambu na mambi na yandi. Yandi lombaka Yezu nde: “Yibuka mono ntangu nge ta kwisa na Kimfumu na nge.” Ntangu yai, mutindu nge ke mona yo na kifwanisu, Yezu ke solula ti muntu yai ya mbi. Keti nge me zaba mambu yina Yezu ke zabisa yandi?— * Yezu ke sila yandi nde: “Ya kieleka mono ke tubila nge bubu yai nde, Nge ta vanda ti mono na Paladisu.”

Nge ke yindula nde Paladisu yina ta vanda inki mutindu?— Sambu na kuzikisa nde beto me baka mvutu ya mbote, bika beto tadila Paladisu yina Nzambi salaka sambu na bakala mpi nkento ya ntete, Adami ti Eva. Paladisu yina vandaka wapi? Keti yo vandaka na zulu, to awa na ntoto?—

Nge me tuba mbote kana nge me tuba nde yo vandaka na ntoto. Yo yina ntangu beto ke yindula muntu yina ya mbi “na Paladisu,” beto fwete mona nde yandi ta zinga awa na ntoto ntangu yo ta kuma paladisu. Paladisu yina ta vanda nki mutindu?— Bika beto tadila yo.

Na nima ya kuganga bankwelani ya ntete Adami ti Eva, Biblia ke tuba nde Yehowa tulaka bo na paladisu awa na ntoto. Yo vandaka kubingama ‘kilanga ya Edeni.’ Keti nge lenda yindula mutindu ‘kilanga ya Edeni’ vandaka kitoko?— Ya kieleka, yo vandaka kisika mosi ya kitoko kibeni kuluta kisika yonso yina muntu lenda zinga!

Inki nge ke yindula? Keti Yezu ta vanda awa na ntoto ti muntu yina ya mbi, ya kuwaka mawa sambu na disumu na yandi?— Ve, Yezu ta vanda na zulu mpi ta yala bonso Ntotila na Paladisu ya ntoto. Yo yina, Yezu ta vanda ti muntu yina ya mbi na mutindu yandi ta futumuna yandi na bafwa mpi ta lungisa bampusa na yandi na Paladisu awa na ntoto. Kansi sambu  na nki Yezu ta bika nde muntu yina vandaka muntu ya mbi kuzinga na Paladisu?— Bika beto tadila yo.

Ya kieleka, muntu yina ya mbi salaka mambu ya mbi kibeni. Kansi, bamilio ya bantu ya nkaka yina zingaka awa na ntoto salaka mpi mambu ya mbi. Ata mpidina, mingi na bo salaka mambu ya mbi sambu bo longaka bo ve mambu ya me tala Yehowa mpi mambu yina yandi ke zolaka nde bo sala.

Yo yina, bantu ya mutindu yina tanga mpi muntu ya mbi yina Yezu solulaka ti yandi na zulu ya nti, ta futumuka mpi ta zinga na Paladisu awa na ntoto. Bo ta longa bo na kusala luzolo ya Nzambi. Na nima, bo lenda monisa kana bo ke zolaka Yehowa to ve.

Keti nge me zaba mutindu bo lenda monisa yo?— Na kusalaka mambu yina Nzambi ke zolaka. Yo ta vanda kiese kibeni na kuzinga na Paladisu mpi kuvanda ntangu yonso ti bantu yina ke zolaka Yehowa mpi ke zolanaka!