KWENDA PENE-PENE NA NZAMBI
Yehowa “Ke Pona-Ponaka Ve”
Keti bantu me mengaka nge dezia? Keti bo me piminaka nge dezia kima mosi, me buyaka kusadisa nge, to bankaka me vwezaka nge sambu na mpusu na nge, dikanda na nge to luzingu na nge? Kana yo kele mpidina, nge kele ve nge mosi. Kansi nsangu ya mbote kele nde: Kuvweza yai ya ke monanaka mingi na nsi-ntoto, ke salamaka ve na zulu. Ntumwa Piere tubaka ti kivuvu yonso nde: “Nzambi ke pona-ponaka ve.”—Tanga Bisalu 10:34, 35.
Piere tubaka bangogo yai na kisika mosi yina vandaka ya mpa sambu na yandi—na nzo ya Korneye, Muntu ya Makanda. Piere vandaka Muyuda mpi zingaka na ntangu yina Bayuda vandaka kumona Bantu ya Makanda bonso bantu ya mvindu mpi yo yina, bo lendaka nkutu ve kuta kinduku ti bo. Ebuna sambu na nki Piere vandaka na nzo ya Korneye? Na bunkufi, sambu Yehowa Nzambi yidikaka kukutana yina. Piere monaka mbona-meso mosi yina katukaka na Nzambi yina bo zabisaka yandi nde: “Nge, bika kubinga bima yina Nzambi me kumisaka bunkete nde bima ya mvindu.” Piere zabaka ve nde na kilumbu yina yitaka, Korneye mpi monaka mbona-meso yina wanzio twadisaka yandi na kubingisa Piere. (Bisalu 10:1-15) Ntangu Piere bakisaka nde Yehowa vandaka kutwadisa mambu, yandi kukaka ve kubumba mawi na yandi.
Piere tubaka nde: “Ntangu yai mono me bakisa kibeni nde Nzambi ke pona-ponaka ve.” (Bisalu 10:34) Ngogo ya Kigreki ya bo ke balulaka ntete-ntete na ‘kupona-pona’ ke tendula “kutala bilungi.” (The Kingdom Interlinear Translation of the Greek Scriptures) Na kutadila bangogo yai, muntu mosi ya mayele ke tendula nde: “Yo ke monisa zuzi yina ke tala ilungi ya muntu mpi ke zenga makambu, na kutadila ve lusambisu yina muntu yango me fwana na kubaka kansi, na kutadila mutindu yandi kele.” Nzambi ke bakaka ve na mbalu ilungi ya muntu mosi kuluta ya nkaka, sambu na mpusu, insi, luzingu na yandi to sambu na mambu ya nkaka ya ke monana na meso.
Kansi, Yehowa ke talaka mambu yina kele na ntima na beto. (1 Samuele 16:7; Bingana 21:2) Na nima Piere tubaka nde: “Na konso dikanda yandi ke ndimaka muntu yina ke tinaka yandi boma mpi ke salaka mambu ya mbote.” (Bisalu 10:35) Kutina Nzambi boma ke tendula kuzitisa yandi, kupesa yandi lukumu, kutudila yandi ntima, mpi kubuya kusala konso kima yina lenda pesa yandi mpasi na ntima. Kusala mambu ya mbote ke tendula kusala na luzolo yonso mambu yina kele mbote na meso ya Nzambi. Yehowa ke sepelaka na muntu yina ntima na yandi me fuluka ti luzitu ya mingi yina ke pusaka yandi na kusala mambu ya mbote.—Kulonga 10:12, 13.
Tuka na zulu, ntangu Yehowa ke talaka awa na ntoto, yandi ke monaka mpusu mosi kaka—bantu mosi kaka
Kana bo me mengaka nge to me bakilaka nge bangindu ya mbi, kele ti bikuma ya mbote na kubaka kikesa na bangogo ya Piere na yina me tala Nzambi. Yehowa ke bendaka bantu ya makanda yonso na lusambu ya kieleka. (Yoane 6:44; Bisalu 17:26, 27) Yandi ke widikilaka mpi ke pesaka mvutu na bisambu ya bansadi na yandi kukonda kutala mpusu, insi, to luzingu na bo. (1 Bantotila 8:41-43) Beto lenda tula ntima nde, tuka na zulu ntangu Yehowa ke talaka awa na ntoto, yandi ke monaka mpusu mosi kaka—bantu mosi kaka. Keti yo ke pusa nge ve na kulonguka mambu ya nkaka ya me tala Nzambi yai ya ke pona-ponaka ve?
