Biblia ke pesa bikuma zole ya mfunu. Ya ntete, ata bantu me salaka mambu mingi ya mbote, Nzambi me gangaka bo ve ti makuki ya kutwadisa makulu na bo mosi. Ya zole, bangidika ya bantu me nungaka ve sambu “nsi-ntoto ya mvimba kele na nsi ya kiyeka ya muntu ya mbi,” Satana Diabulu. Yo yina, bikesa ya bantu me nungaka ve na kutula ngemba.​—Tanga Yeremia 10:23; 1 Yoane 5:19.

Kusosa kaka mambote na bo mosi mpi bwimi me salaka nde bantu kukuka ve kutula ngemba na nsi-ntoto. Kaka luyalu yina lenda longa bantu na kuzola mambu ya mbote mpi kudibanza sambu na bankaka ta tula ngemba.​—Tanga Yezaya 32:17; 48:18, 22.

Nzambi Nkwa-Ngolo Yonso me silaka na kutula luyalu mosi yina ta yala bantu yonso. Yo ta yinga baluyalu ya bantu. (Daniele 2:44) Yezu, Mwana ya Nzambi ta yala bonso Mfumu ya Ngemba. Yandi ta katula mambi yonso na ntoto mpi ta longa bantu nzila ya ngemba.​—Tanga Yezaya 9:5, 6; 11:4, 9.

Na nsi ya lutwadisu ya Yezu, bamilio ya bantu ya nsi-ntoto ya mvimba ke sadilaka dezia Biblia, Ndinga ya Nzambi, sambu na kulonga bantu mutindu ya kuzinga na ngemba ti bankaka. Ntama mingi ve, ngemba na nsi-ntoto ta vanda diambu ya kieleka.​—Tanga Yezaya 2:3, 4; 54:13.