Michelle: Bubu yai, mono ke pesa trakiti yai na muntu yonso ya kartie yai. Yo ke tuba nde Keti Nge Tazola Kuzaba Kyeleka? Ya nge yo yai.

Sophia: Yo ke tubila mambu ya Nzambi?

Michelle: Ee. Tala bangiufula sambanu yina kele na lutiti ya zulu. Inki ngiufula—

Sophia: Bika mu zenga nge ntete ndinga. Nge ta bebisa ntangu na nge na kusolula ti mono.

Michelle: Sambu na nki nge me tuba mpidina?

Sophia: Na kutuba masonga, mono ke kwikilaka ve na Nzambi.

Michelle: Mambu ve, mono me sepela sambu nge me zabisa mono masonga. Kansi, bika mono yula nge, keti nge ke kwikilaka ve na Nzambi tuka ntama?

Sophia: Ve, ntangu mono vandaka kuyela mono vandaka kukwenda na nzo-nzambi. Kansi, mono me yambulaka tuka ntangu mingi.

Michelle: Mono me bakisa. Ata mpidina, bika mono zabisa nge kana mono kele nani. Zina na mono Michelle.

Sophia: Ya mono Sophia.

Michelle: Mono me sepela kukutana ti nge, Sophia.

Sophia: Mono mpi.

Michelle: Sophia, mono me kwisa awa ve sambu na kundimisa balukwikilu na mono na ngolo. Kansi, sambu na kuzaba diambu mosi. Keti kele ti diambu mosi buna yina pusaka nge na kubuya kukwikila nde Nzambi kele?

Sophia: Ee. Mama na mono salaka aksida na kamio bamvula 17 me luta ntangu yai.

Michelle: Yo me pesa mono mawa na kuwa yo. Keti yandi lwalaka?

Sophia: Ee, tuka ntangu yina yandi me kumaka paralize.

Michelle: Mawa kibeni! Yo ke monana nde yo pesaka nge mpasi mpenza.

Sophia: Ee, yo me lembisaka mono nitu. Yo yina, mono ke kudiyulaka nde, kana Nzambi kele, inki mutindu yandi bikaka nde diambu yina kusalama? Sambu na nki Nzambi ke bika nde beto niokwama mutindu yai?

Michelle: Yo kele mbi ve na kudiwa mutindu yina mpi kudiyula mpidina. Ntangu beto ke niokwamaka, mbala mingi yo ke vandaka mbi ve na kudiyula sambu na nki. Nkutu, ata babakala mpi bankento ya kwikama ya ntangu ya ntama kudiyulaka mpi mutindu yina!

Sophia: Ya kieleka?

Michelle: Ee. Keti nge ta zola nde mono songisa nge mbandu mosi na Biblia?

Sophia: Ee.

Michelle: Tala bangiufula yina Habakuki, profete ya kwikama yulaka Nzambi, mutindu yo kele na Habakuki, kapu ya 1, verse 2 ti 3: ‘Yehowa, tii nki ntangu mono fweti binga nge sambu nge sadisa mono mpi kugulusa mono na maboko ya bantu ya nku, ebuna nge ndima? Sambu na nki nge ke bika nde mono mona mambu ya mbi ya mutindu yai?’ Keti bangiufula yina me fwanana ti yina nge ke kudiyulaka?

Sophia: Yo me fwanana kibeni.

Michelle: Nzambi nganinaka ve Habakuki sambu na bangiufula yina, mpi yandi zabisaka ve Habakuki nde yandi vandaka ti lukwikilu ya fioti.

Sophia: Yo me sepedisa mono kibeni.

Michelle: Biblia ke longaka nde Nzambi ke bakisaka bampasi na beto mpi yandi ke tudilaka yo dikebi.

Sophia: Nge ke zola kutuba inki?

Michelle: Bika mu songisa nge mbandu mosi ya kele na Kubasika 3:7. Keti nge lenda tanga verse yina?

Sophia: Mambu ve. Yo ke tuba nde: ‘Yehowa yikaka  nde: “Mono me mona kibeni mpasi ya bantu na mono yina kele na Ezipte, mpi mono me wa bidilu na bo sambu na bakapita yina ke sadisa bo kisalu ya ngolo; mono me zaba mbote bampasi yina bo ke mona.”’

Michelle: Mersi. Na kutadila verse yai, keti Nzambi ke monaka ntangu bantu na yandi ke monaka mpasi?

Sophia: Ee, yo ke monana nde yandi ke monaka.

Michelle: Mpi yandi ke zabaka yo ve na zulu-zulu. Tala diaka kitini ya nsuka ya verse yango. Nzambi ke tuba nde: “Mono me zaba mbote bampasi yina bo ke mona.” Keti bangogo yai ke monana bonso ya Nzambi mosi ya nku to ya ntima ya mbi?

Sophia: Ve, yo ke monana ve mpidina.

Michelle: Nzambi ke monaka kaka ve bampasi na beto kansi yandi ke waka mpi mawa ntangu beto ke niokwamaka.

Sophia: Yo kele kieleka.

Michelle: Ti mambu yina na mabanza, beto tadila ntangu yai mbandu ya nkaka yina ke tubila ntangu yina bansadi ya Nzambi vandaka kumona mpasi. Yo kele na Yezaya 63:9. Verse yango ke tuba nde: ‘Ntangu yonso yina bo vandaka na mpasi, yo vandaka mpasi sambu na yandi.’ Keti, nge lenda tuba nde Nzambi mpi vandaka kuniokwama ntangu bantu na yandi vandaka kumona mpasi?

Sophia: Ee, yo ke monana mpidina.

Michelle: Sophia, kieleka kele nde Nzambi ke kudibanzaka mingi sambu na beto, mpi yandi ke mengaka kumona beto ke niokwama. Ntangu beto ke monaka mpasi, yandi mpi ke niokwamaka.

Michelle: Na ntwala ya kukwenda, mono kele ti diambu mosi yina mono ke zola kuzabisa nge.

Sophia: Mambu ve.

Michelle: Beto tadila mambu yina Biblia ke longaka beto sambu na ngolo ya Nzambi. Verse yina mono ke zola kusonga nge kele Yeremia 10:12. Keti nge lenda tanga yo?

Sophia: Ee. Yo ke tuba nde: ‘Yandi muntu salaka ntoto na ngolo na yandi, yandi tedimisaka ntoto yina ke butaka na mayele na yandi, yandi tandulaka zulu bonso lele na ngangu na yandi.’

Michelle: Mersi. Beto yindula fioti verse yai. Keti yo lombaka nde Nzambi kusadila ngolo ya mingi sambu na kuganga luyalanganu yai ya nene mpi bima yonso yina kele na kati na yo?

Sophia: Ee.

Michelle: Ntangu yai, kana Nzambi kele ti ngolo ya kuganga bima yonso yina kele na nziunga na beto, keti beto fwete kwikila ve nde yandi kele mpi ti ngolo ya kumanisa bampasi na beto?

Sophia: Ee.

Michelle: Yindula diaka mama na nge. Sambu na nki yo ke yangisa nge ntangu nge ke monaka yandi ke niokwama?

Sophia: Sambu mono ke zolaka yandi. Yandi kele mama na mono.

Michelle: Kana nge vandaka ti ngolo ya kubelula yandi bubu yai, keti nge zolaka ve kusala yo?

Sophia: Mono lendaka.

Michelle: Yindula fioti. Biblia ke longaka nde Nzambi ke monaka bampasi na beto, yandi ke bakisaka mawi na beto, mpi yandi kele ti ngolo mingi. Keti nge ke mona ve nde Nzambi ke kudiyalaka kibeni na mutindu yandi me tulaka ve nsuka na bampasi na beto?

Sophia: Mono me yindulaka ntete ve mutindu yina.

Michelle: Keti yo lenda vanda ve nde yandi kele ti bikuma ya mbote yina ke salaka nde yandi tula ntete ve nsuka na bampasi na beto? *

Sophia: Hum, mono ke mona nde yo lenda vanda mpidina.

Michelle: Mono me wa bonso nde bo ke binga nge na telefone mono me kwenda, mpi mono ta vutuka kilumbu ya nkaka sambu beto tadila diaka disolo yai.

Sophia: Mersi. Mono ta sepela kibeni. *