Mono vandaka kuzola mingi bima yina ke vandaka na lugangu tuka mono vandaka mwana-fioti. Mbala mingi, dibuta na mono vandaka kusepela kukwenda kutala bamfinda mpi mazanga ya kitoko yina vandaka na nziunga ya Jyväskylä, mbanza yina beto vandaka kuzinga na Finlande. Mono ke zolaka mpi bambisi mingi. Ntangu mono vandaka mwana-fioti, mono vandaka kuzola kusimba bapusu mpi bambwa yonso yina mono vandaka kumona! Ntangu mono vandaka kuyela, mono kumaka kudiyangisa na mutindu bantu vandaka kuniokula bambisi. Na nima, mono kotaka na kimvuka yina vandaka kutanina banswa ya bambisi, kisika mono kutanaka ti bantu yina vandaka ti mabanza ya mutindu mosi bonso mono.

Beto vandaka kusala mambu ti kikesa sambu na kunwanina banswa ya bambisi. Beto vandaka kukabula bansangu mpi kutambula sambu na kubuya ba magazini yina ke tekaka bampusu ya mbisi mpi ba laboratoire yina ke sadilaka bambisi sambu na kumeka bankisi. Beto salaka nkutu kimvuka mosi ya mpa sambu na kutanina bambisi. Sambu beto bakaka bangidika ya ngolo sambu na kunata na ntwala mambu yina beto vandaka kunwanina, mbala mingi beto vandaka kuwakana ve ti bamfumu. Bo kangaka mono mpi nataka mono na tribinale mbala mingi.

Katula susi na mono sambu na bambisi, mono vandaka kudiyangisa sambu na mambu ya nkaka yina vandaka kusalama na nsi-ntoto. Na nsuka, mono kumaka kusala na bimvuka mingi, mu mbandu na Amnesty International mpi Greenpeace. Mono kudipesaka ya mvimba sambu na kupesa maboko na bisalu na bo. Mono vandaka kunwanina mambote ya bansukami, bantu yina ke fwa nzala, mpi bantu ya nkaka.

Kansi, malembe-malembe mono bakisaka nde, mono lendaka ve kusoba nsi-ntoto. Ata bimvuka yina mekaka kuyidika mambu ya fioti, mambu ya nene landaka kaka kukuma mingi. Yo vandaka bonso nde bangolo ya mambi kumaka kutwadisa nsi-ntoto mpi ata muntu mosi ve vandaka kutula dikebi na mambu yina. Mono monaka nde mono kondaka ngolo.

Sambu mono vandaka na mawa na mutindu mono kondaka makuki ya  kupesa lusadisu, mono yantikaka kuyindula na yina me tala Nzambi mpi Biblia. Na luyantiku, mono vandaka kulonguka Biblia ti Bambangi ya Yehowa. Ata mono vandaka kusepela na mutindu Bambangi vandaka bantu ya mbote mpi monisilaka mono dikebi, mono vandaka ve ya kuyilama sambu na kusoba luzingu na mono. Kansi, ntangu yai mambu sobaka.

Mono bakaka Biblia na mono mpi yantikaka kutanga yo. Yo vandaka bonso nkinsi na bamputa na mono mingi. Mono monaka baverse mingi yina longaka mono na kusadila bambisi mambu na mawete yonso. Mu mbandu, Bingana 12:10 ke tuba nde: “Muntu ya mbote ke talaka bambisi na yandi mbote.” Mono bakisaka mpi nde, Nzambi kele ve na kisina ya bampasi ya bantu. Kansi, bampasi na beto ke kuma mingi sambu bantu mingi ke landaka ve lutwadisu na yandi. Mono yitukaka ngolo ntangu mono longukaka na yina me tala zola mpi ntima-nda ya Yehowa.​—Nkunga 103:8-14.

Na ntangu yango, mono fulusaka formilere ya kulomba mukanda Inki Biblia Kelongaka Mpenza? mpi mono tindaka yo. Kukonda kusukinina, Bambangi zole kwisaka kutala mono mpi lombaka mono na kulonguka Biblia ti bo, mpi mono ndimaka. Mono yantikaka mpi kukwenda na balukutakanu ya Bukristu na Nzo ya Kimfumu. Mpidina, kieleka ya Biblia yantikaka kubaka bansimbulu na ntima na mono.

Biblia sadisaka mono na kuvanda ti makuki ya kusala bansoba mingi. Mono yambulaka kunwa makaya mpi kulauka malafu. Mono sobaka mvwatu mpi ntubilu na mono. Mpi mono sobaka mutindu na mono ya kutadila bamfumu ya leta. (Baroma 13:1) Mono yambulaka mpi luzingu na mono ya mansoni, mutindu ya luzingu yina mono kudipesaka mingi.

Nsoba ya kuluta mpasi sambu na mono kele kuvanda ti dibanza ya mbote sambu na bimvuka yina ke taninaka banswa ya bantu mpi ya bambisi. Yo ke salamaka ve na kilumbu mosi. Na luyantiku, mono monaka nde mono ta yekula kimvuka yina kana mono yambula yo. Kansi, mono bakisaka nde Kimfumu ya Nzambi kele kivuvu mosi kaka ya kieleka sambu na nsi-ntoto. Yo yina, mono bakaka lukanu ya kusala bikesa sambu na kupesa maboko na Kimfumu yina mpi kusadisa bankaka na kuzaba yo.​—Matayo 6:33.

Sambu mono vandaka kunwana sambu na mambote ya bankaka, mono vandaka kukabula bantu na bimvuka zole​—bantu ya mbote mpi ya mbi—​mpi bayina mono vandaka kumona bantu ya mbi, mono vandaka kunwanisa bo. Kansi, Biblia sadisaka mono na kuyambula kumenga bankaka. Nkutu, mono salaka bikesa sambu na kumonisila bantu yonso zola ya Bukristu. (Matayo 5:44) Mono ke monisaka zola yango na mutindu mono ke samunaka nsangu ya mbote ya Kimfumu ya Nzambi. Mono kele na kiese ya kumona mutindu kisalu yai ya ofele ke natilaka bantu ngemba, kiese mpi kivuvu ya kieleka.

Mono me kumaka ti ngemba ya mabanza na mutindu mono me bikaka mambu na maboko ya Yehowa. Mono ke ndima nde sambu yandi kele Ngangi, yandi ta bika ve nde bantu kulanda kuniokula bambisi ti bantu kimakulu mpi kubebisa ntoto na beto yai ya kitoko. Nkutu, ntama mingi ve na nzila ya Kimfumu na yandi, yandi ta yidika mambu yonso ya mbi. (Yezaya 11:1-9) Mono kele na kiese mingi na mutindu mono me zaba bakieleka yai kaka ve kansi mpi ke sadisa bankaka na kukwikila yo. Mono ke monaka diaka ve nde mono fwete soba nsi-ntoto.