Nge ta sepela na dikabu ya nki mutindu? Ntembe kele ve nde, bantu mingi na kati na beto ta sepela na dikabu yina me katuka na muntu yina me pesa yo na zola kansi ve sambu bo me lomba yandi na kusala yo. Bikuma yina ke pusaka muntu na kupesa ke vandaka mfunu. Yo ke vandaka mpi mfunu sambu na beto. Kansi kuluta yonso, yo ke vandaka mfunu sambu na Nzambi. Beto tadila bangogo ya kupemama ya ntumwa Polo ya kele na 2 Bakorinto 9:7.

Sambu na nki Polo sonikaka bangogo yai? Lukanu na yandi vandaka ya kusiamisa Bakristu ya Korinto na kupesa maboko na kisalu ya kupesa lusadisu na bampangi Bakristu ya Yudea yina vandaka bansukami. Keti yandi mekaka kupusa na ngolo Bakristu ya Korinto na kupesa makabu? Ve, nkutu yandi sonikaka nde: “Bika nde konso muntu kusala kaka mutindu yandi me kana na ntima na yandi, ti kubokuta ve to sambu bo ke pusa yandi, sambu Nzambi ke zolaka muntu yina ke pesaka na kiese.” Bika beto tadila lukebisu yai na dikebi yonso.

“Kaka mutindu yandi me kana na ntima na yandi.” Polo ke tuba nde, Mukristu ya kieleka ke pesaka sambu yandi me kana na “ntima na yandi” na kusala mpidina. Yo yina, Mukristu ke yindulaka mbote-mbote bampusa ya bampangi na yandi Bakristu. Muntu mosi ya mayele tubaka nde, ngogo ya ndinga ya kisina yina bo balulaka nde “me kana” “ke pesa dibanza ya kuyidika na ntwala.” Yo yina Mukristu ke yindulaka bampusa ya bampangi na yandi mpi ke kudiyulaka nki yandi lenda sala sambu na kulungisa yo.​—1 Yoane 3:17.

“Ti kubokuta ve to sambu bo ke pusa yandi.” Polo ke tubila mitindu zole ya kupesa yina Bakristu ya kieleka fwete buya​—kupesa ti keti-keti mpi kupusama. Ngogo ya Kigreki ya bo me balula nde “ti kubokuta” ke tendula na kisina “ti mawa (to, mpasi).” Mukanda mosi ke tuba nde, muntu yina ke pesa ti kubokuta to ti keti-keti ke pesaka ti “mpasi na ntima bonso nde yandi ke kabwana ti mbongo.” Muntu yina bo ke pusa, ke pesaka sambu bantu me pusa yandi na kusala yo. Nani na kati na beto ke zolaka dikabu yina me katuka na muntu ya kele ti keti-keti to ya bo me pusa na kupesa?

“Nzambi ke zolaka muntu yina ke pesaka na kiese.” Polo ke tuba nde, kana Mukristu me baka lukanu ya kupesa, yandi fwete sala yo na kiese. Ya kieleka, kupesa ti bikuma ya mbote ke pesaka kiese. (Bisalu 20:35) Kiese ya muntu yina ke pesaka na kiese yonso ke monanaka pwelele. Nkutu, bangogo “ti kiese” lenda monisa mutindu muntu yina ke pesa ke wa na ntima na yandi mpi mutindu ilungi na yandi ke monana ntangu yandi ke pesa. Muntu yina ke pesaka ti kiese ke simbaka ntima na beto. Yandi ke sepedisaka ntima ya Nzambi. Mbalula ya nkaka ke tuba nde: “Nzambi ke zolaka bantu yina ke zolaka kupesa.”​—Contemporary English Version.

Bangogo ya kupemama ya ntumwa Polo kele munsiku yina fwete twadisa Bakristu na yina me tala kupesa. Yo vanda beto ke pesa ntangu, ngolo, to bima na beto ya kinsuni, bika beto sala yo na luzolo na beto mosi mpi sambu beto mona kiese yina ke katukaka na kukabila bankaka, mingi-mingi bansukami. Kusala mpidina ta sepedisa beto mpi ta sala nde Nzambi kuzola beto, sambu yandi “ke zolaka muntu yina ke pesaka na kiese.”