“Muntu yina ke buya kulolula bankaka ke bukaka kilalu yina yandi mosi fwete luta.” Bangogo yai ya Edward Herbert, muntu mosi ya istware ya mvu-nkama 17, ke monisa kikuma yina beto fwete lolula bankaka: Kilumbu ya nkaka, beto mpi ta vanda na mfunu nde bo lolula beto. (Matayo 7:12) Kansi, kele ti kikuma ya kuluta mfunu yina beto fwete lolula bankaka. Tala bangogo ya ntumwa Polo yina kele na Bakolosai 3:13.​—Tanga.

Sambu beto yonso kele bantu ya kukonda kukuka, bantangu ya nkaka beto lenda pesa bankaka makasi to mpasi na ntima, mpi bo lenda sadila beto mutindu mosi. (Baroma 3:23) Inki mutindu beto lenda tanina ngemba ti bantu ya kukonda kukuka bonso beto? Na nsadisa ya mpeve santu ya Nzambi, Polo ke longisila beto na kukonda kulandila mambu yonso mpi na kulolula bankaka. Ndongisila yina kele kaka mfunu bubu yai kaka mutindu yo vandaka mfunu ntangu bo sonikaka yo kiteso ya bamvula 2000 me luta. Beto tadila mbote-mbote bangogo ya Polo.

“Beno landa na kukanga ntima na mambu ya bankaka.” Bangogo “beno landa na kukanga ntima na mambu ya bankaka” me katuka na ngogo ya Kigreki yina ke tendula kukonda kulandila mambu yonso to kumonisa ntima-nda. Mukanda mosi ke tuba nde Bakristu ke monisaka kikalulu yai ntangu bo “ke ndimaka kukanga-ntima na kifu to na diambu mosi ya mbi yina me pesa bo makasi.” Bangogo “bankaka” ke monisa nde bo mpi fwete monisa kikalulu yina. Yo yina, kana beto ke vila ve nde beto kele ti bifu yina lenda pesa bankaka makasi, beto ta bika ve nde mambu na bo yina ke sepedisaka beto ve kubebisa ngemba na beto ti bo. Kansi inki beto lenda sala kana bankaka me sadila beto mbi?

“Beno landa . . . kulolulana na ntima ya mvimba.” Muntu mosi ya mayele ke tuba nde, ngogo ya Kigreki yina bo ke balulaka na “kulolulana na ntima ya mvimba” “kele ve ngogo yina bantu ke sadilaka mingi sambu na kulomba ndolula . . . kansi yo kele ngogo mosi ya mbote yina ke monisaka kibeni kikalulu ya kulolula.” Mukanda ya nkaka ke tuba nde bangogo yai lenda tendula “kukumisa kima mosi kitoko, kundima kima mosi, to bumbote.” Beto ke monisaka bumbote ntangu beto ke lolulaka na ntima ya mvimba ata ntangu beto kele “na makambu ti muntu ya nkaka.” Kansi, sambu na nki beto fwete ndima kusala diambu yina? Kikuma mosi kele nde, kilumbu ya nkaka beto mpi ta vanda na mfunu nde muntu yina salaka beto mbi kulolula beto mutindu beto lolulaka yandi.

“Kaka mutindu Yehowa lolulaka beno na ntima ya mvimba, beno fwete sala mpi mutindu mosi.” Kikuma ya mfunu yina beto fwete lolula bankaka na ntima ya mvimba kele sambu nde Yehowa Nzambi kulolula beto mpi na ntima ya mvimba. (Mishe 7:18) Yindula mambote ya nene yina Yehowa ke monisilaka bansumuki yina ke balulaka ntima. Na kuswaswana ti beto, Yehowa ke salaka ve masumu. Ata mpidina, yandi ke lolulaka na ntima ya mvimba bansumuki yina me balula ntima ata yandi ke zabaka nde yandi ta vanda ve na mfunu nde bo lolula yandi. Ya kieleka, Yehowa kele mbandu ya kuluta mbote na yina me tala kulolula na ntima ya mvimba!

Mawa ya Yehowa ke bendaka beto pene-pene na yandi mpi ke pusaka beto na kulanda mbandu na yandi. (Baefezo 4:32–5:1) Beto fwete kudiyula nde: ‘Sambu Yehowa ke lolulaka mono na ntima ya mvimba, sambu na nki mono lenda buya kulolula muntu ya kukonda kukuka bonso mono, ya me balula ntima na masonga yonso sambu disumu yina yandi sadilaka mono?’​—Luka 17:3, 4.