Keti nge ke kwikilaka na kivuvu ya lufutumuku yina kele na Biblia? * Kivuvu ya kukutana ti bantu ya beto vandaka kuzola yina me fwaka ke sepedisaka beto. Keti kivuvu ya mutindu yai kele kieleka? Sambu na kubaka mvutu, bika beto tadila mbandu ya bantumwa ya Yezu Kristu.

Bantumwa vandaka kukwikila ngolo na lufutumuku ya bafwa. Sambu na nki? Sambu na bikuma kiteso ya zole. Ya ntete, kivuvu na bo simbamaka na diambu yai: Yezu yandi mosi futumukaka na bafwa. Bantumwa—mpi “bampangi kuluta 500 na mbala mosi”—monaka Yezu yina futumukaka. (1 Bakorinto 15:6) Diaka, mutindu Baevanzile iya ke monisa yo, bantu monaka mpi ndimaka lufutumuku ya Yezu.—Matayo 27:62–28:20; Marko 16:1-8; Luka 24:1-53; Yoane 20:1–21:25.

Ya zole, bantumwa taka kimbangi ya balufutumuku kiteso ya tatu yina Yezu salaka—ntete na Naini, na nima na Kapernaumi, mpi na nsuka na Betania. (Luka 7:11-17; 8:49-56; Yoane 11:1-44) Lufutumuku ya nsuka, yina beto tubilaka dezia na Nzozulu ya Nkengi yai, ke tadila dibuta mosi yina vandaka ti bangwisana ya ngolo ti Yezu. Bika beto tadila mambu yina salamaka.

Yezu zabisaka Marta, yina mpangi na yandi Lazare fwaka dezia bilumbu iya bangogo yai: “Mpangi na nge ta futumuka.” Ntete-ntete Marta bakisaka ve ntendula ya bangogo yai ya Yezu. Marta vutulaka nde: “Mono me zaba nde yandi ta futumuka,” kansi yandi yindulaka nde ziku yo ta salaka na makwisa. Yindula mutindu yandi yitukaka ntangu yandi waka Yezu ke tuba nde “mono kele lufutumuku mpi luzingu,” mpi yandi monaka Yezu ke futumuna mpangi na yandi na bafwa!—Yoane 11:23-25.

Lazare vandaka wapi bilumbu yina iya? Lazare tubaka ve ata kima mosi yina ke monisa nde yandi vandaka kisika mosi buna bilumbu yina iya. Lazare vandaka ve ti moyo yina ke fwaka ve yina zolaka kukwenda na zulu. Mutindu Yezu futumunaka Lazare, yandi katulaka yandi ve na zulu sambu yandi yambula kiese yina yandi vandaka na yo pene-pene ya Nzambi, sambu na kuvutula yandi awa na ntoto. Ebuna, Lazare vandaka wapi bilumbu yina iya? Ya kieleka, yandi vandaka ya kulala na maziamu.—Longi 9:5, 10.

Kuvila ve nde Yezu fwanisaka lufwa ti mpongi yina bo ke tedimisa muntu mosi na nzila ya lufutumuku. Verse ke tuba nde: “‘Lazare nduku na beto ke lala, kansi mono ke kwenda kuna sambu na kutedimisa yandi.’ Ebuna balongoki tubilaka yandi nde:  ‘Mfumu, kana yandi ke lala, yandi ta beluka.’ Yezu vandaka kutubila lufwa na yandi. Kansi bo yindulaka nde yandi vandaka kutubila kupema na mpongi. Na ntangu yina, Yezu tubilaka bo na masonga yonso nde: ‘Lazare me fwa.’” (Yoane 11:11-14) Ntangu Yezu futumunaka Lazare, yandi vutudilaka yandi luzingu mpi salaka nde yandi kutana diaka ti dibuta na yandi. Yezu pesaka dibuta yina dikabu mosi ya mbote kibeni!

Balufutumuku yina Yezu salaka ntangu yandi vandaka na ntoto vandaka kifwani ya mambu yina yandi ta sala bonso Ntotila ya Kimfumu ya Nzambi na bilumbu yina ke kwisa. * Ntangu Yezu, yina ta vanda na zulu, ta yala ntoto, yandi ta futumuna bantu yina ke lala na maziamu. Yo yina, yandi tubaka nde: “Mono kele lufutumuku.” Yindula kiese yina nge ta wa ntangu nge ta mona diaka bantu yina nge vandaka kuzola! Yindula mpi kiese yina bantu yina ta futumuka ta vanda ti yo!—Luka 8:56.

Yezu songaka Marta nde: “Muntu yina ke monisa lukwikilu na mono, ata kana yandi fwa, yandi ta vutuka na luzingu; mpi konso muntu yina kele na luzingu mpi ke monisa lukwikilu na mono ta fwa ve ata fioti.” (Yoane 11:25, 26) Bantu yina Yezu ta futumuna na nsungi ya luyalu na yandi ya bamvula funda ta vanda ti kivuvu ya kuzinga kimakulu—kana bo monisa mpenza lukwikilu na yandi.

Na nima ya kutuba mambu yai ya ke yitukisa na yina me tala lufutumuku, Yezu yulaka Marta ngiufula yai ya mfunu: “‘Keti nge ke kwikila diambu yai?’ Yandi songaka yandi nde: ‘Ee, Mfumu; mono me kwikilaka nde nge kele Kristu Mwana ya Nzambi.’” (Yoane 11:26, 27) Ebuna nge—keti nge ta zola kuyedisa lukwikilu na kivuvu ya lufutumuku mutindu Marta yedisaka? Kitambi ya ntete kele kulonguka kuzaba lukanu ya Nzambi sambu na bantu. (Yoane 17:3; 1 Timoteo 2:4) Nzayilu yai lenda sadisa nge na kuvanda ti lukwikilu. Sambu na nki ve kuyula Bambangi ya Yehowa na kusonga nge mambu yina Biblia ke longaka na yina me tala disolo yai? Bo ta vanda na kiese ya kuzabisa nge kivuvu ya kitoko ya lufutumuku.