Ntangu mono butukaka bibuti na mono vandaka ti ferme na bwala mosi ya fioti na Galicie, na nordi-westi ya Espania. Na dibuta beto, beto kele bana nana mpi mono kele mwana ya iya. Luzingu ya dibuta na beto vandaka ya kiese. Na ntangu yina na Espania mabuta mingi vandaka kutinda bana na bo na seminere to na kuvan. Na dibuta na beto, beto kwendaka bana tatu.

Ntangu mono lungisaka bamvula 13, mono landaka yaya na mono ya nkento na kuvan mosi na Madrid. Na kuvan yango, konso muntu vandaka kudizingila. Kinduku vandaka ve—kaka minsiku, bisambu, mpi mambu vandaka ngolo. Na suka-suka, beto vandaka kuvukana na chapelle sambu na kuyindulula, kansi mbala mingi, mono vandaka kuyindulula ve ata kima mosi. Na nima, beto vandaka kuyimba bankunga ya nzo-nzambi mpi kusala Misa na Latini. Mono vandaka kubakisa ve ata kima mosi mpi kuyindula nde Nzambi vandaka ntama ti mono. Luzingu vandaka kitoko ve na kuvan. Nkutu, ntangu mono vandaka kukutana ti yaya na mono, beto vandaka kupesana mbote nde: “Mbote santa Maria.” Bamasere vandaka ti nswa ya kusolula kaka minuta 30 na nima ya kudia. Luzingu yai swaswanaka mpenza ti luzingu ya dibuta na beto! Mono vandaka kudiwa mono mosi mpi mbala mingi mono vandaka kudila.

Ata mono vandaka kudiwa ntama ti Nzambi, mono lungisaka balusilu na mono mpi kumaka masere ti bamvula 17. Ya kieleka, mono lungisaka lukanu na mono, kansi ntangu fioti na nima mono yantikaka kudiyula kana Nzambi ponaka mono kibeni na kisalu yai. Bamasere vandaka kutuba nde bantu ya ke vandaka ti keti-keti na kisalu yai ta kwenda na bilungi ya tiya! Kansi, keti-keti na mono kumaka mingi. Mono zabaka nde Yezu Kristu zingaka ve na kingenga; kansi yandi kudipesaka na kisalu ya kulonga mpi ya kusadisa bantu ya nkaka. (Matayo 4:23-25) Ntangu mono lungisaka bamvula 20, mono monaka diaka ve mfunu ya kuvanda masere. Diambu ya ke yitukisa kele nde, masere-nkuluntu (mère supérieure) zabisaka mono nde kana nge ke zola diaka ve kuvanda masere, nge lenda yambula. Mono yindulaka nde masere waka  boma kana ve mono benda bamasere ya nkaka. Yo yina mono katukaka na kuvan.

Ntangu mono vutukaka na nzo, bibuti na mono yambaka mono mbote. Sambu na bwala na beto kisalu vandaka ve, mono kwendaka na Allemagne kisika mpangi na mono ya bakala vandaka kuzinga. Yandi vandaka na kimvuka mosi ya Bakoministe ya Espania yina vandaka kuzinga na nsi ya Allemagne. Mono sepelaka na kuvanda ti bantu yina vandaka kunwanina banswa ya bantu ya kisalu mpi banswa ya bankento. Yo yina mono kumaka Koministe mpi nsuka-nsuka muntu mosi ya kimvuka yango kwelaka mono. Mono yindulaka nde kukabula mikanda ya Bakoministe mpi kutambula na babala-bala sambu na kuzabisa bamfumu na kubongisa mambu vandaka diambu mosi ya mfunu.

Nsuka-nsuka, mono lembaka nitu. Mono monaka nde mbala mingi Bakoministe vandaka kuzitisa ve mambu ya bo vandaka kutuba. Mono lembaka diaka nitu ntangu Bakoministe yina vandaka batoko yokaka biro ya vandaka kumonisa Ambassade ya Espania na Francfort tiya na 1971. Bo salaka mambu yina sambu na kutelamina kukonda lunungu ya bamfumu ya nku na Espania. Kansi, mono monaka nde yo vandaka ve mutindu ya mbote ya kumonisa makasi.

Ntangu mono butaka mwana na mono ya ntete, mono zabisaka bakala na mono nde mono ta kwendaka diaka ve na balukutakanu ya Bakoministe. Mono kudiwaka mono mosi sambu banduku na mono ya ntama kwisaka kutala mono ve ntangu mono butaka. Mono kudiyangisaka sambu na lukanu ya luzingu. Keti yo vandaka kibeni mfunu nde beto sala bikesa ya ngolo sambu na kutomisa nsi?

Na mvu 1976, Bambangi ya Yehowa zole ya Espania kokulaka na kielo na beto mpi mono ndimaka kubaka mikanda yina ke tendulaka Biblia. Na viziti na bo ya zole, mono yantikaka kuyula bo bangiufula na yina me tala bampasi, luswaswanu yina kele na kati ya bamvwama ti bansukami, mpi kukonda lunungu. Mono yitukaka mpenza mutindu bo sadilaka Biblia sambu na kupesa mvutu na konso ngiufula! Mono ndimaka kulonguka Biblia mbala mosi.

Na luyantiku, mono vandaka kusosa kuzaba mambu. Kansi, mambu sobaka ntangu mono ti bakala na mono yantikaka kukwenda na balukutakanu ya Bambangi ya Yehowa na Nzo ya Kimfumu. Na ntangu yina, beto vandaka ti bana zole. Bambangi ya Yehowa yambaka beto na kiese mpi sadisaka mono na kutanina bana na ntangu ya balukutakanu. Yo yina, mono kumaka kuzola bo mingi.

Ata mpidina, mono vandaka kaka ti keti-keti. Mono bakaka lukanu ya kukwenda kutala dibuta na mono na Espania. Papa-leki na mono ya mumpe salaka bikesa sambu mono yambula kulonguka Biblia. Kansi, Bambangi ya bwala yina sadisaka mono mingi. Bo sadilaka Biblia sambu na kupesa bamvutu na bangiufula na mono, kaka mutindu Bambangi ya Allemagne salaka. Mono bakaka lukanu ya kulonguka diaka Biblia ntangu mono vutuka na Allemagne. Ata bakala na mono yambulaka, mono vutukilaka kulonguka Biblia. Na mvu 1978, mono bakaka mbotika mpi kumaka Mbangi ya Yehowa.

Nzayilu ya siki-siki ya kieleka ya Biblia me sadisaka mono na kuzaba lukanu ya luzingu mpi ke twadisaka mono. Mu mbandu, 1 Piere 3:1-4 ke siamisa bankento na ‘kulemfukila babakala’ na bo ti “luzitu ya mudindu” mpi kuyedisa kikalulu ya “mawete, yina kele na mbalu mingi na meso ya Nzambi.” Minsiku yai me sadisaka mono na kuvanda mama mpi Mukristu ya mbote.

Kiteso ya bamvula 35 me luta banda mono me kumaka Mbangi ya Yehowa. Mono ke waka kiese ya kusadila Nzambi na dibuta ya kimpeve ya ntoto ya mvimba. Diaka, mono kele ti bana tanu mpi bana iya ke sadilaka Yehowa.