Yindula nde tata mosi ke solula ti mwana na yandi ya bakala ya bamvula nsambwadi. Tata me tuba nde, “tuka ntama, Nzambi me gangaka ntoto mpi bima yonso yina kele na zulu na yo mpi yandi me gangaka ntangu, ngonda mpi bambwete.” Mwana me yindula mwa fioti mpi me yula nde: “Tata, nani gangaka Nzambi?”

Tata me vutula nde: “Ata muntu mosi ve gangaka Nzambi.” Yandi ke vandaka ntangu yonso.” Mvutu yai ya pete me lungisa mpusa ya mwana na ntangu yai. Kansi ntangu yandi ke yela, ngiufula yai ke landa na kuyangisa yandi. Yandi ke kuka ve kubakisa nki mutindu Nzambi lenda vanda ve ti luyantiku. Nkutu luyalanganu kele ti luyantiku. Yandi ke kudiyula nde: ‘Nzambi katukaka wapi?’

Inki mvutu Biblia ke pesa? Biblia ke pesa mvutu ya mutindu mosi ti tata ya beto me tubila na mbandu na beto. Moize sonikaka nde: “Mfumu Nzambi, . . . ntangu nge vandaka me sala bangumba ntete ve ti ntoto mutindu yo kele, nge kele kaka Nzambi tii kuna; na nge, luyantiku to nsuka kele ve.” (Nkunga 90:1, 2) Mutindu mosi, profete Yezaya yitukaka nde: “Keti beno zaba ve? Keti beno me waka ve? Mfumu Nzambi salaka ntoto yonso tii na nsuka na yo, yandi kele Nzambi tii kuna”! (Yezaya 40:28) Mutindu mosi, mukanda ya Yude ke tuba sambu na Nzambi nde yandi me vandaka “banda na ntangu yonso ya me lutaka.”—Yude 25.

Baverse yai ke monisa beto nde Nzambi kele “Ntotila ya kukonda nsuka,” kaka mutindu Polo tubaka yo. (1 Timoteo 1:17) Yo ke tendula nde Nzambi ke vandaka ntangu yonso, ata beto yindula bamvula mingi yina me lutaka. Mpi yandi ta vandaka ntangu yonso tii na bilumbu yina ke kwisa. (Kusonga 1:8) Kikalulu mosi ya Nkwa-Ngolo Yonso kele mutindu yandi ke zingaka ntangu yonso.

Sambu na nki dibanza yai kele mpasi na kubakisa? Sambu luzingu na beto kele nkufi, yo ke salaka nde mutindu na beto ya kutadila ntangu kuswaswana kibeni ti ya Yehowa. Sambu Nzambi kele ve ti luyantiku mpi nsuka, na meso na yandi kilumbu mosi kele bonso bamvula funda. (2 Piere 3:8) Beto baka mbandu: Keti mpasu ya ke zingaka kiteso ya bilumbu 50 mpamba lenda bakisa luzingu na beto ya ke salaka bamvula 70 to 80? Ata fioti ve! Biblia ke monisa nde beto kele bonso bampasu kana beto kudifwanisa ti Ngangi na beto ya Nene. Nkutu, mutindu na beto ya kuyindula kele nkufi kana beto fwanisa yo ti ya Yehowa. (Yezaya 40:22; 55:8, 9) Yo yina, yo lenda yitukisa beto ve kana beto ke bakisa ve mpenza mambu ya nkaka ya me tala kimuntu ya Yehowa.

Ata yo lenda vanda mpasi na kubakisa dibanza ya ke monisa nde Nzambi kele ve ti luyantiku mpi nsuka, beto ke ndimaka nde mambu yango kele kieleka. Kana muntu ya nkaka gangaka Nzambi, muntu yina zolaka kuvanda Ngangi. Kansi, Biblia ke monisa nde Yehowa kele muntu yina “gangaka bima yonso.” (Kusonga 4:11) Diaka, beto me zaba ntete nde luyalanganu vandaka ve. (Kuyantika 1:1, 2) Yo katukaka na wapi? Yo lombaka nde Ngangi na yo kuvanda ntete. Yandi zingaka ntete na ntwala ya kuganga bigangwa ya mayele, mu mbandu Mwana na yandi mosi kaka ya kubutukaka mpi bawanzio. (Yobi 38:4, 7; Bakolosai 1:15) Yo ke pwelele nde yandi vandaka kuzinga ntete yandi mosi. Bo gangaka yandi ve mpi ata kima mosi ve lendaka kuganga yandi.

Luzingu na beto mpi ya luyalanganu ya mvimba ke monisaka nde Nzambi kele, Nzambi yina kele ve ti luyantiku mpi nsuka. Ntembe kele ve nde Nzambi yina ke zingaka ntangu yonso Muntu ke tambwisaka luyalanganu na beto ya nene, mpi me tulaka bansiku sambu yo yala yo. Yandi mpamba muntu ke pesaka bima yonso luzingu.—Yobi 33:4.