Ntangu mono vandaka mwana-fioti, dibuta na beto vandaka kuzinga pene-pene ya Leipzig, na Allemagne ya Esti ntama mingi ve ti ndilu ya République Tchèque mpi ya Pologne. Ntangu mono lungisaka bamvula sambanu, beto kwendaka ntete na Brésil mpi na nima na Équateur sambu na kisalu ya papa.

Ntangu mono lungisaka bamvula 14, bo vutulaka mono na Allemagne sambu na kutanga na enterna. Mono vandaka kulungisa bampusa na mono, mono mosi sambu bibuti na mono vandaka ntama kibeni na Amerika ya Sudi. Mono vandaka kusala mambu ya mono me zola. Mono vandaka kutula mpenza ve dikebi mutindu bikalulu na mono vandaka ti bupusi na bantu yankaka.

Bibuti na mono vutukaka na Allemagne ntangu mono kumaka ti bamvula 17. Na luyantiku, mono zingaka kisika mosi ti bo. Kansi na nima, mono kukaka diaka ve kuvanda ti bo nzo mosi sambu mono vandaka kusala mambu na mutindu na mono. Ntangu mono lungisaka bamvula 18, mono katukaka na nzo.

Mono kumaka mawa-mawa, mpi vandaka kusosa lukanu ya luzingu. Na nima ya kutala mutindu bantu vandaka kuzinga mpi bimvuka mingi, mono monaka nde yo kele mbote na kusadila luzingu na mono sambu na kusosa kuzaba nsi-ntoto yai ya kitoko na ntwala nde bantu kubebisa yo.

Mono sumbaka moto, katukaka na Allemagne mpi kwendaka na Afrika. Kansi na nima, yo lombaka nde mono vutuka na Eropa sambu na kuyidika moto. Ntangu fioti na nima, mono kumaka na dibungu mosi ya Portugal. Mono bakaka lukanu ya kuyambula kusala banzietelo na moto mpi yantikaka kusala banzietelo na maswa.

Mono kotaka na kimvuka ya batoko yina vandaka kuyilama sambu na kusabuka océan Atlantique na maswa. Na kati ya batoko yango, mono kutanaka ti Laurie, mwana-nkento yina mono kwelaka na nima. Ntete, beto salaka nzietelo na maswa tii na Antilles. Na nima ya kulutisa mwa bilumbu na Porto Rico, beto vutukaka na Eropa. Beto vandaka kusosa maswa ya ke tambulaka na mupepe sambu beto tula yo motere. Kansi na nima ya kusosa yo bangonda tatu, mambu ya beto kanaka na kusala sukaka na kintulumukina. Bo kotisaka mono na kingolo-ngolo na kisalu ya kisoda na Allemagne.

 Mono salaka bangonda 15 na maswa ya bitumba na Allemagne. Na nsungi yina, mono kwelaka Laurie mpi beto yilamaka diaka sambu na kusala banzietelo. Ntangu fioti na ntwala nde mono yantika kisalu ya kisoda, beto sumbaka epave ya maswa. Ntangu mono vandaka na kisalu ya kisoda, malembe-malembe beto kumisaka epave yango maswa ya fioti. Beto bakaka bangidika ya kuzinga na kati na yo mpi ya kusengumuna bisika ya kitoko na ntoto. Na nima ya kukatuka na kisalu ya kisoda mpi na ntwala nde maswa na beto kumana, Bambangi ya Yehowa kwisaka kutala beto mpi beto yantikaka kulonguka Biblia.

Ntete, mono monaka ve mfunu ya kusala bansoba mingi na luzingu na mono. Mono kwelaka nkento yina vandaka ntete makangu na mono mpi na ntangu yina, mono vandaka dezia me yambula kunwa makaya. (Baefezo 5:5) Sambu na lukanu na beto ya kusala banzietelo na nsi-ntoto, mono yindulaka nde kusadila luzingu na beto na kukwenda kusengumuna bima ya kitoko yina Nzambi me salaka vandaka mfunu mingi.

Na masonga yonso, yo lombaka nde mono sala bansoba, mingi-mingi kusoba kimuntu na mono. Sambu mono vandaka lulendo mingi, mono vandaka kutula ntima na makuki mpi na mambu ya mono vandaka kusala. Mono vandaka kuzinga kaka sambu na mono mosi.

Kilumbu mosi, mono tangaka Disolo ya Yezu ya me zabanaka mingi yina yandi salaka na Zulu ya Ngumba. (Matayo, kapu 5-7) Na luyantiku, mono bakisaka ve mambu yina Yezu tubaka sambu muntu kuvanda na kiese. Mu mbandu, yandi tubaka nde kiese na bantu yina kele na nzala mpi na kiwina. (Matayo 5:6) Mono vandaka kudiyula nki mutindu muntu ya mutindu yai lenda vanda na kiese. Sambu mono landaka kulonguka, mono bakisaka nde beto yonso kele na nzala ya mambu ya kimpeve kansi beto fwete ndima ntete na kudikulumusa yonso nzala yango na ntwala ya kulungisa yo. Yezu tubaka nde: “Kiese na bantu yina kele na nzala ya mambu ya kimpeve.”—Matayo 5:3.

Beto yantikaka kulonguka Biblia na Allemagne, beto kwendaka na France mpi na nima na Italia. Na konso kisika, beto vandaka kukutana ti Bambangi ya Yehowa. Mono yitukaka mingi kibeni sambu na zola ya masonga mpi bumosi yina vandaka na kati na bo. Mono monaka nde Bambangi ya Yehowa kele mpenza na kimvuka ya nene ya bampangi ya nsi-ntoto ya mvimba. (Yoane 13:34, 35) Na nima, beto bakaka mbotika.

Na nima ya mbotika, mono landaka kusala bansoba na kimuntu na mono. Beto bakaka lukanu ya kukita na maswa na océan Atlantique na lweka ya Afrika mpi sabukaka sambu na kukwenda na États-Unis. Ntangu beto zole vandaka na maswa ya fioti na zulu ya océan, mono bakisa nde mono kele kima mosi ya mpamba na ntwala ya Ngangi na beto ya nene. Sambu beto vandaka ti ntangu mingi (beto vandaka ve ti mambu mingi ya kusala na zulu ya océan), mono kudipesaka na kutanga Biblia. Disolo ya luzingu ya Yezu awa na ntoto yitukisaka mono mingi. Yandi vandaka muntu ya kukuka. Yandi vandaka ti makuki mingi kuluta bantu yonso, kansi yandi bendaka ve dikebi na yandi mosi. Yezu sadilaka ve luzingu na yandi sambu na mambote na yandi mosi kansi sambu na mambote ya Tata na yandi.

Ntangu mono yindululaka mbandu ya Yezu, mono bakisaka nde mono fwete tula Kimfumu ya Nzambi na kisika ya ntete na luzingu na mono na kisika ya kusadila ntangu na mono na mambu mingi ya mono kanaka kusala. (Matayo 6:33) Nsuka-nsuka ntangu beto kumaka na États-Unis, beto bakaka lukanu ya kuzinga kuna mpi kutula dikebi na lusambu na beto.

Ntete, ntangu mono vandaka kuditudila ntima, mbala mingi mono vandaka ve kubaka badesizio ya mbote. Kansi ntangu yai, mono me monaka kisika ya kubaka mayele yina ke twadisaka mono. (Yezaya 48:17, 18) Mono me kumaka ti lukanu na luzingu, lukanu yina mono vandaka ntete ve ti yo, disongidila kusambila Nzambi mpi kusadisa bantu ya nkaka na kulonguka mambu ya me tala yandi.

Bangwisana ya makwela na beto ke vandaka ngolo sambu beto ke sadilaka minsiku ya Biblia. Beto kele na kiese sambu beto me butaka mwana-nkento mosi ya kitoko yina ke zabaka Yehowa mpi ke zolaka yandi.

Bantangu ya nkaka luzingu na beto ke vandaka ve pete. Kansi sambu Yehowa ke sadisaka beto, beto me bakaka lukanu ya kulanda kusala kisalu na yandi mpi ya kutudila yandi ntima.—Bingana 3:5, 6.