Eric: Mono ke sambilaka mpenza ve. Mono ke mona nde beto ta solula mingi ve.

Brian: Mono me sepela mutindu nge me zabisa mono dibanza na nge. Zina na mono Brian, ebuna nge?

Eric: Zina na mono Eric.

Brian: Eric, mono ke na kiese ya kukutana ti nge.

Eric: Mono mpi.

Brian: Mono ke zola kuyula nge ngiufula mosi, keti dibuta na beno ke sambilaka?

Eric: Ee. Kansi, ntangu mono katukaka na nzo mpi kwendaka na iniversite, mono yambulaka kusambila.

Brian: Mono me bakisa. Inki mambu nge longukaka na iniversite?

Eric: Mono longukaka mutindu bantu ke zingaka na kimvuka mpi mambu yina me lutaka. Mono ke zolaka mambu yina me lutaka, disongidila mutindu bantu vandaka kuzinga na ntangu ya ntama.

Brian: Istware kele dilongi mosi ya kitoko. Ziku, nge me zaba nde Biblia ke tubilaka mpi mambu ya me lutaka. Keti nge sadilaka Biblia ntangu nge vandaka kusala bansosa?

Eric: Ve. Mono ke zaba nde yo kele mukanda mosi ya mbote, kansi mono me yindulaka ntete ve nde Biblia ke tubilaka mambu ya me lutaka.

Brian: Yo ke monana nde nge ke zola kuzaba mambu. Kana nge kele ti mwa ntangu, mono lenda songa nge mwa masolo ya siki-siki ya kele na Biblia.

Eric: Kima ve. Kansi, mono kele na Biblia ve.

Brian: Ok. Mono lenda songa nge na Biblia na mono. Disolo ya ntete kele na mukanda ya 1 Bansangu kapu ya 29, verse ya 26 mpi 27. Biblia ke tuba nde: “Davidi mwana ya Yese vandaka ntotila ya bantu yonso ya Israele bamvula makumi iya (40). Yandi yalaka na bwala Ebroni bamvula nsambwadi ebuna na bwala Yeruzalemi bamvula makumi tatu na tatu.”

Eric: Inki ke songa nde disolo yango kele ya siki-siki?

Brian: Na ntangu mosi buna, bantu ya ke tulaka ntembe tubaka nde Ntotila Davidi zingaka ve.

Eric: Ya masonga? Sambu na nki bo tulaka ntembe?

Brian: Katula banzikisa ya kele na Biblia, banzikisa fioti monisaka nde Davidi zingaka. Kansi, na mvu 1993, kimvuka mosi ya bantu ya arkeolozi sengumunaka ditadi mosi ya ntama yina bo sonikaka na zulu nde “Nzo ya Davidi.”

Eric: Yo ke yitukisa mpenza.

Brian: Muntu ya nkaka ya bantu tulaka ntembe nde yandi zingaka ve kele Ponse Pilate, guvernere ya vandaka kuyala na bilumbu ya Yezu. Na mukanda ya Luka kapu 3, verse 1, bo ke tanga zina na yandi na kati ya bamfumu ya ntangu yina.

Eric: Ee, mono me bakisa. Verse yango ke tuba  nde: “Ntangu Ponse Pilate vandaka guvernere ya Yudea, Erode vandaka mfumu ya distrike ya Galilea.”

Brian: Matondo. Bamvula mingi me luta, bantu ya nkaka ya mayele vandaka kutula ntembe nde Ponse Pilate zingaka ve. Kansi, kiteso ya bamvula 50 me luta, bo monaka ditadi mosi na Proche-Orient ya kusonika zina na yandi.

Eric: Humm. Mono me waka ntete ve mambu ya mutindu yai.

Brian: Mono ke na kiese ya kuzabisa nge yo.

Eric: Na kuta masonga, mono ke zitisaka Biblia bonso mikanda yonso ya nkaka. Kansi, mono me yindulaka ntete ve nde yo lenda vanda mfunu na ntangu na beto. Yo lenda vanda na masolo ya siki-siki kansi mono ke yindula ve nde yo kele mfunu.

Brian: Bantu mingi ke ndimaka nde Biblia kele mukanda ya ntama kansi ya mfunu na ntangu na beto. Mono ke bakisaka yo mutindu yai: Bampusa ya bantu me sobaka ve tuka luyantiku. Mu mbandu, beto ke vandaka ntangu yonso na mfunu ya madia, ya bilele, mpi ya nzo. Beto ke vandaka ntangu yonso na mfunu ya kusolula ti bantu ya nkaka mpi kuvanda ti dibuta ya kiese. Keti yo ke mutindu yina ve?

Eric: Yo ke mutindu yina.

Brian: Biblia lenda sadisa beto na mambu yai yonso. Yo yina, beto lenda tuba nde yo kele mukanda mosi ya ntama kansi ya mfunu na ntangu na beto.

Eric: Nge ke zola kutuba nki?

Brian: Bika mono tendula yo na mutindu ya nkaka: Minsiku ya Biblia kele mfunu bubu yai kaka mutindu bo sonikaka yo bamvu-nkama mingi me luta.

Eric: Yo ke mfunu na nki mambu?

Brian: Minsiku ya Biblia lenda sadisa beto, mu mbandu na kuvanda ti bukati-kati na mambu ya mbongo, na kuvanda ti luzingu ya dibuta ya kiese mpi na kuvanda nduku ya mbote. Biblia kele bonso nzila ya ke sadisa beto na kununga. Mu mbandu, keti nge ke ndima nde kuvanda bakala to mfumu ya dibuta ya mbote na bilumbu yai kele mpasi?

Eric: Ee, yo ke mutindu yina. Mvula mosi ke zola kulunga tuka mono kwelaka nkento na mono kansi beto ke tadilaka ve mambu mutindu mosi.

Brian: Yo kele buna. Kansi Biblia kele ti minsiku ya pwelele yina lenda sadisa beno. Kana nge me zola, nge lenda tanga Baefezo 5:22, 23, 28.

Eric: Kima ve. Baverse yango ke tuba nde: “Bika nde bankento kulemfuka na babakala na bo mutindu bo ke lemfukaka na Mfumu, sambu bakala kele mfumu ya nkento na yandi kaka mutindu Kristu kele mfumu ya dibundu, yandi kele ngulusi ya nitu yai.” Mpi verse 28 ke tuba nde: “Babakala fwete zola bankento na bo mutindu yai, bonso nitu na bo mosi. Muntu yina ke zolaka nkento na yandi ke kudizolaka yandi mosi.”

Brian: Matondo mingi. Keti yo kele ve kieleka nde kana bankwelani ke sadila bandongisila yai ya pwelele, luzingu ya dibuta na bo ta toma?

Eric: Ee, yo ke kieleka. Kutuba mambu yai kele pete, kansi kusadila yo kele mpasi.

Brian: Yo ke mutindu yina sambu ata muntu mosi ve kele ya kukuka. Kaka na kapu yai mosi, verse ya nkaka ke siamisa beto na kuvanda ve makambu ngolo. * Mpi konso nkwelani fwete ndima mabanza ya nkwelani ya nkaka. Mono ti nkento na mono me bakisaka nde Biblia ke sadisaka beto na kuvanda ve makambu ngolo.

Eric: Yo kele mpidina.

Brian: Bambangi ya Yehowa kele ti site Internet mosi ya kele ti malongi ya me tala makwela mpi luzingu ya dibuta. Kana nge kele ti mwa minuta, mono lenda songa nge mambu yina kele na kati.

Eric: Kima ve.

Brian: Ok. Adresi ya site Internet na beto kele www.pr418.com. Yai lutiti ya luyantiku.

Eric: Mono me sepela ti bafoto yai.

Brian: Bafoto yai ke monisa mutindu beto ke salaka kisalu ya kusamuna na ntoto ya mvimba. Ah, beto me kuma na kisika yango. Ntu-diambu ya kitini yai kele “Couples & Parents.” Kana beto bweta na  kisika yai, beto ke kuta masolo mingi ya nkufi ya ke tubila mambu ya kuswaswana. Keti disolo mosi me benda dikebi na nge?

Eric: Ee. “Comment résoudre les conflits dans son couple.” Mono ta sadila yo!

Brian: Disolo yai ke tubila mambu iya ya muntu fwete sadila sambu na kumanisa mavwanga. Eric, tala paragrafe yai, keti nge ta zola kutanga yo?

Eric: Ee. Yo ke tuba nde: “Kana masolo kele mfunu na makwela, mpidina zola ti luzitu kele ntima mpi bapumo ya makwela.” Humm, mutindu bo me tendula disolo yango me sepedisa mono.

Brian: Matondo na lutangu na nge. Bo me tula verse mosi ya Biblia awa. Keti nge lenda bweta yo sambu beto tanga?

Eric: Ee, mono me mona yo. Yo kele mukanda ya Baefezo 5:33. Yo ke tuba nde: “Konso muntu na kati na beno kuzola nkento na yandi mutindu yandi ke kudizolaka; na ndambu ya nkaka, nkento fwete vanda ti luzitu ya mudindu sambu na bakala na yandi.”

Brian: Keti nge ke bakisa mambu ya bo ke lomba konso muntu na kulungisa na verse yai?

Eric: Ve. Mono ke bakisa mpenza ve.

Brian: Ntembe kele ve nde bakala ke zolaka nde nkento na yandi kuzitisa yandi. Mutindu mosi mpi, nkento ke zolaka nde bakala kumonisila yandi zola.

Eric: Ee. Yo ke mpidina.

Brian: Kana balaka ke sosa mbala mingi mabaku ya kumonisila nkento na yandi zola, yo ta vanda mpasi ve sambu nkento na yandi kuzitisa yandi.

Eric: Yo ke monana mpidina.

Brian: Yo yina, ata bo me sonikaka verse yai bamvula 2000 me luta, yo ke lungisaka bampusa ya bankwelani mpi ke pesaka bo bandongisila ya mbote. Kana bo sadila bandongisila yango, yo ta sadisa bo. Bonso mbandu ya beto me katuka kutubila, zola ti luzitu ta kumisa makwela na bo ngolo.

Eric: Mono ke ndima mambu yai. Biblia ke tubaka mambu mingi ya mono ke yindulaka ve.

Brian: Eric, mono ke na kiese ya kuwa mambu ya nge ke tuba. Mono ta vutukila nge sambu na kuzaba dibanza na nge na ntu-diambu “Quatre mesures pour régler les problèmes,” ya kele na disolo yai ya beto me tadila na site Internet. *

Eric: Kima ve. Beto ta tadila yo kumosi ti nkento na mono.