Megan: Mbote, Shirley. Mono waka kiese ntangu mono monaka nge na Lusungiminu ya lufwa ya Yezu Kristu na mposo ya me luta. * Inki mutindu nge monaka lukutakanu yango?

Shirley: Mono sepelaka na kuvanda na lukutakanu yina, kansi na kuta masonga, mono bakisaka ve kibeni mambu yonso ya bo tubaka. Mono ke monaka bantu ke sala Nkinsi ya Lubutuku ya Yezu mpi Pake ya lufutumuku na yandi, kansi mono me monaka ntete ve bantu ke sungimina lufwa na yandi.

Megan: Yo kele mutindu yina. Bantu mingi na ntoto ya mvimba ke salaka Nkinsi ya Lubutuku mpi ya Pake. Kansi Bambangi ya Yehowa ke monaka nde yo kele mfunu na kusungimina lufwa ya Yezu. Kana nge ke ti mwa ntangu, mono lenda songa nge bikuma ya beto ke sungiminaka yo.

Shirley: Kima ve.

Megan: Bambangi ya Yehowa ke sungiminaka lufwa ya Yezu sambu Yezu pesaka balongoki na yandi ntuma ya kusala yo. Beto tadila mambu yina salamaka na mpimpa na ntwala nde bo fwa Yezu. Keti nge ke yibuka madia ya mfunu yina Yezu diaka ti balongoki na yandi ya kwikama?

Shirley: Keti nge ke zola kutubila Madia ya Nsuka?

Megan: Ee. Bo ke bingaka yo mpi Madia ya Nkokila ya Mfumu. Ntangu bo vandaka kudia madia yai, Yezu pesaka balongoki na yandi bantuma ya pwelele. Keti nge lenda tanga mambu ya kele na Luka 22:19?

Shirley: Kima ve. Yo ke tuba nde: “Diaka, yandi bakaka dimpa, pesaka matondo na Nzambi, zengaka yo, mpi pesaka bo yo, mpi tubaka nde: ‘Yai ke tendula nitu na mono, yina mono fwete pesa sambu na beno. Beno landa na kusala yo sambu na kuyibuka mono.’”

Megan: Matondo mingi. Tala ntuma ya Yezu yina kele na nsa ya nsuka ya verse yai: “Beno landa na kusala yo sambu na kuyibuka mono.” Mpi na ntwala ya kupesa balongoki na yandi ntuma ya kuyibuka yandi, Yezu monisaka pwelele mambu yina bo fwete sala sambu na kuyibuka yandi. Yandi tubaka nde yandi ta pesa luzingu na yandi sambu na balongoki na yandi. Dibanza yai ya Yezu kele mpi na Matayo 20:28. Verse yai ke tuba nde: “Mwana ya muntu kwisaka ve sambu bantu sadila yandi, kansi sambu na kusadila mpi kupesa moyo na yandi bonso nkudulu sambu na bantu mingi.” Na bunkufi, yai kele kikuma yina Bambangi ya Yehowa ke vukanaka konso mvula sambu na kusungimina lufwa ya Yezu, disongidila kuyibuka kimenga ya nkudulu yina Yezu pesaka. Lufwa na yandi lenda pesa luzingu na bantu yonso ya bulemfu.

Shirley: Mono ke waka bantu ke tuba nde Yezu fwaka sambu na kupesa beto luzingu. Kansi na kutuba ya mbote, mono ke bakisaka ve diambu yai.

Megan: Shirley, nge mpamba ve ke monaka yo mpasi na kubakisa. Disolo ya me tala kimenga ya nkudulu ya Yezu kele mpasi na kubakisa. Kansi yo  kele mpi kieleka mosi ya kitoko yina kele na Ndinga ya Nzambi. Keti nge kele na mwa ntangu sambu mono tendudila nge yo?

Shirley: Ee.

Megan: Mono me katuka kutanga disolo ya nkudulu mpi mono ke tendudila nge yo na mutindu ya pwelele.

Shirley: Kima ve.

Megan: Sambu na kubakisa nkudulu, beto fwete bakisa mambu yina Adami ti Eva basisaka ntangu bo salaka disumu na kilanga ya Edeni. Sambu na kuzaba diambu yango, beto tanga Baroma 6:23. Keti nge lenda tanga yo?

Shirley: Ee. Yo ke tuba nde: “Lufutu yina disumu ke futaka kele lufwa, kansi dikabu yina Nzambi ke pesaka kele luzingu ya mvula na mvula na nzila ya Kristu Yezu, Mfumu na beto.”

Megan: Matondo. Beto tadila verse yango. Ntete, tala mutindu verse yai me yantika: “Lufutu yina disumu ke futaka kele lufwa.” Yai kele nsiku ya pete yina Nzambi tulaka na luyantiku ya disolo ya luzingu ya bantu, disongidila, lufutu to ndola ya disumu kele lufwa. Ya kieleka, na luyantiku, ata muntu mosi ve vandaka nsumuki. Nzambi gangaka Adami ti Eva bantu ya kukuka mpi bana na bo yonso zolaka kubutuka bantu ya kukuka. Yo yina, yo vandaka ve ata ti kikuma mosi ya zolaka kunata bantu na lufwa. Adami, Eva mpi bana na bo yonso vandaka ti kivuvu ya kuzinga kimakulu na kiese. Keti mambu salamaka mutindu yina?

Shirley: Ve. Adami ti Eva diaka mbuma yina Nzambi buyisaka bo.

Megan: Yo kele mutindu yina. Ntangu bo diaka mbuma yina, Adami ti Eva kolamaka na Nzambi mpi bo salaka disumu. Yo yina, bo kumaka bantu ya kukonda kukuka mpi bansumuki. Mambu yina Adami ti Eva salaka natilaka bo mpi bana na bo yonso malanda ya mbi.

Shirley: Inki nge ke zola kutuba?

Megan: Mono lenda pesa nge mbandu mosi. Keti nge ke salaka mampa?

Shirley: Ee!

Megan: Yindula nde nge kele ti kinzanza mosi ya mpa sambu na kuyoka mampa. Na ntwala nde nge sadila yo, yo me bwa mpi yo me fobuka. Inki ta salama kana nge me yoka mampa na kinzanza yina? Keti mampa yango ta basika ve ya kufobuka?

Shirley: Yo ta basika ya kufobuka.

Megan: Mutindu mosi, ntangu Adami ti Eva kolamaka na Nzambi, bo kumaka ya “kufobuka” to ti kifu, disongidila, bo sumukaka mpi bo kumaka bantu ya kukonda kukuka. Sambu bo kumaka bantu ya masumu na ntwala ya kubuta bana, bana na bo yonso ke butukaka ti kifu disongidila disumu. Ntangu Biblia ke tubilaka “disumu,” yo ke tubilaka kaka ve mambu yina muntu me sala kansi yo ke tubilaka mpi disumu yina beto ke butukaka na yo. Yo yina, ata beto salaka ve diambu ya mbi mpi ata beto vandaka me butuka ntete ve ntangu Adami ti Eva sumukaka, bo pesaka bantu yonso ya butukaka na nima disumu mpi kukonda kukuka yina ke nataka na lufwa. Mutindu beto ke tangaka yo na Baroma 6:23, ndola ya disumu kele lufwa.

Shirley: Diambu yai kele mbote ve. Sambu na nki bantu yonso fwete niokwama mvula na mvula sambu na disumu ya Adami ti Eva?

Megan: Nge me tuba masonga. Yo kele mbote ve. Kansi yo ke tendula mambu mingi. Na lunungu na yandi ya kukuka, Nzambi bakaka lukanu nde Adami ti Eva kufwa sambu na masumu na bo. Kansi, beto bana na bo, beto kele ti kivuvu. Nzambi bakaka bangidika ya kukatula beto na diambu yai ya mpasi. Yo yina, yandi tindaka Yezu sambu na kupesa kimenga ya nkudulu. Tala diaka Baroma 6:23. Na nima ya kutuba nde “lufutu yina disumu ke futaka kele lufwa,” verse yango ke tuba diaka nde: “Dikabu yina Nzambi ke pesaka kele luzingu ya mvula na mvula na nzila ya Kristu Yezu, Mfumu na beto.” Yo yina, lufwa ya Yezu me pesaka beto nzila ya kukatuka na kimpika ya disumu mpi ya lufwa. *

Megan: Mono ke zola kubenda dikebi na nge na diambu ya nkaka na verse yai.

Shirley: Inki diambu?

Megan: Verse yango ke tuba nde: “Dikabu yina Nzambi ke pesaka kele luzingu ya mvula na mvula na nzila ya Kristu Yezu, Mfumu na beto.” Kana Yezu monaka mpasi, fwaka mpi pesaka luzingu na yandi sambu na beto, sambu na nki verse yai ke tuba nde nkudulu kele “dikabu yina Nzambi ke pesaka” na kisika ya kutuba nde yo kele “dikabu yina Yezu ke pesaka”? *

Shirley: Humm. Mono ke zaba ve.

Megan: Nzambi gangaka Adami ti Eva mpi bo salaka disumu na ntwala na yandi ntangu bo kolamaka na kilanga ya Edeni. Yo fwete vanda nde Nzambi waka mpasi mingi ntangu bana na yandi yai zole kolamaka na yandi. Kansi, Yehowa bakaka mbala mosi ngidika sambu na dikambu yai. * Yandi bakaka lukanu sambu kigangwa na yandi mosi ya kimpeve kukwisa na ntoto, kuzinga bonso muntu ya kukuka mpi kupesa luzingu na yandi bonso kimenga ya nkudulu. Sambu na kikuma yai, nkudulu vandaka dikabu yina Nzambi pesaka. Kele ti kikuma ya nkaka ya ke monisa nde nkudulu vandaka dikabu yina Nzambi pesaka. Keti nge me yindulaka dezia mutindu Nzambi waka ntangu bo tulaka Yezu na nti ya mpasi?

Shirley: Ntete ve.

Megan: Na ntwala ya masamba na nge, mono ke mona bima yina bana ke sakanaka ti yo. Mono ke yindula nde nge fwete vanda ti bana.

Shirley: Ee, mono kele na bana zole, mosi ya bakala mpi mosi ya nkento.

Megan: Sambu nge kele kibuti, yindula mutindu Yehowa Nzambi, Tata ya Yezu yina kele na zulu, waka kilumbu yina bo fwaka Yezu. Na kikongo ya nkaka, nki mutindu yandi kudiwaka ntangu yandi vandaka kumona tuka na zulu, bo me kanga Mwana na yandi yina yandi ke zolaka mingi, bo ke pesa yandi nsoni, mpi bo ke bula yandi makofi? Mpi nki mutindu Tata kudiwaka ntangu bo vandaka kubula Mwana na yandi minsonso na nti ya mpasi sambu yandi fwa lufwa mosi ya mpasi?

Shirley: Yo fwete vanda nde yandi waka mpasi mingi. Mono me yindulaka ntete ve diambu ya mutindu yai!

Megan: Ya kieleka, beto lenda kuka ve kutuba na siki-siki yonso mutindu Nzambi waka mpasi kilumbu yina. Beto me zaba nde Nzambi ke vandaka ti mawi mpi beto me zaba sambu na nki yandi pesaka nzila nde mambu yai yonso kusalama. Biblia ke tendula mambu yango mbote-mbote na mukanda ya Yoane 3:16. Keti nge lenda tanga yo?

Shirley: Ee. Yo ke tuba nde: “Nzambi zolaka nsi-ntoto mingi kibeni yo yina yandi pesaka Mwana na yandi mosi kaka ya kubutuka, na mpila nde konso muntu yina ke monisa lukwikilu na yandi kufwa ve kansi yandi baka luzingu ya mvula na mvula.”

Megan: Matondo. Tala diaka bangogo ya luyantiku ya verse yango. Yo ke tuba nde: “Nzambi zolaka nsi-ntoto.” Ngogo ya mfunu kele zola. Zola pusaka Nzambi na kutinda Mwana na yandi na ntoto na kufwa sambu na beto. Ya kieleka, kimenga ya nkudulu kele mutindu mosi ya kuluta nene yina Nzambi me monisaka zola. Yo yina, Bambangi ya Yehowa ke vukanaka konso mvula sambu na kusungimina lufwa ya Yezu. Keti mambu ya beto me katuka kutadila awa me sadisa nge?

Shirley: Ee. Matondo mutindu nge me baka ntangu ya kusolula ti mono mambu yai.