DISOLO YINA KELE NA LUTITI YA ZULU | KANA MUNTU ME FWA—KETI YANDI LENDA FUTUMUKA?

Inki Ke Salamaka na Nima ya Lufwa?

TALA NA

“Mono vandaka kuyindula nde kana muntu me fwa, yandi lenda kwenda na zulu, na bilungi to na kombelo. Mono zabaka nde mono vandaka ve muntu ya mbote mpenza sambu na kukwenda na zulu to muntu ya mbi mpenza sambu na kukwenda na bilungi. Mono vandaka kubakisa mpi ve kibeni dilongi ya kombelo. Mono me monaka yo ntete ve ata kisika mosi na Biblia. Yo vandaka kaka mambu ya mono vandaka kuwa na minoko ya bantu.”—Lionel.

“Bo longaka beto nde bantu yonso ke kwendaka na zulu na nima ya lufwa, kansi mono vandaka ve kundima yo. Mono vandaka kuyindula nde lufwa kele nsuka ya mambu yonso mpi nde bafwa ke vandaka ve ata ti kivuvu mosi.”—Fernando.

Keti nge me kudiyulaka bangiufula yai: ‘Inki ke salamaka mpenza na nima ya lufwa? Keti bantu ya beto vandaka kuzola yina me fwaka ke monaka mpasi na kisika mosi buna? Keti beto ta mona bo diaka? Inki ke ndimisa beto nde beto ta mona bo?’ Beto tala mambu yina Biblia ke longaka kibeni. Beto tadila ntete mutindu Biblia ke tubilaka lufwa. Na nima, beto ta tubila kivuvu yina Ndinga ya Nzambi ke pesa.

Inki ke kuminaka bantu kana bo me fwa?

MVUTU YA BIBLIA: “Bantu yina ke na moyo, bo ke zaba nde bo ta fwa; kansi bantu ya kufwa kuzaba kima ve. Bo ta zwa kima ve na ntwala, bo ke vila bo kimakulu. Sala ngolo konso kima yina ya nge zola kusala; sambu na nsi ya bafwa kisika ya nge ke kwenda, kisalu kele ve, ngindu kele ve, mayele mpi kele ve.” *—Longi 9:5, 10.

Maziamu kele kisika yina bo ke zikaka bantu kana bo me fwa; yo kele kisika ya kifwani to kisika yina muntu ke kudizabaka ve mpi ke salaka ve ata kisalu mosi. Sambu na Yobi, muntu ya kwikama, Maziamu vandaka kutendula nki? Kaka na kilumbu mosi, yandi vidisaka bima na yandi yonso mpi bana na yandi yonso. Diaka, bivimbu basikaka yandi na nitu ya mvimba. Yandi bondilaka Nzambi nde: ‘Nzambi, mbote kana nge bumba mono na Maziamu [“na bilungi,” na Biblia ya Katolika ya Douay]; mono vanda kuna.’ (Yobi 1:13-19; 2:7; 14:13) Ya kieleka, Yobi bakisaka ve nde Maziamu kele bilungi ya tiya, disongidila kisika yina bampasi na yandi zolaka kukuma diaka mingi kuluta. Kansi, yandi bakisaka nde Maziamu kele kisika ya kupema.

Masolo ya bantu ya nkaka lenda sadisa beto mpi na kuzaba mambu yina ke kuminaka bafwa. Beto lenda longuka masolo ya bantu nana yina futumukaka ya kele na Biblia.—Tala lupangu “ Balufutumuku Nana Yina Biblia Ke Tubilaka.”

Ata muntu mosi ve na kati ya bantu yai nana tubaka nde yandi vandaka na kisika mosi ya kiese to ya mpasi. Kana nde bantu yai ya futumukaka kwendaka na bisika ya mutindu yai, keti bo zolaka ve kuzabisa bantu mambu yango? Keti bo zolaka ve kusonika mambu yango na Biblia sambu bantu yonso kuzaba yo? Masonuku ke tubilaka ve mambu ya mutindu yai ata fioti. Yo kele pwelele nde bantu yai nana tubaka ve ata kima mosi sambu na lufwa. Sambu na nki? Sambu bo vandaka kudizaba ve. Yo vandaka bonso nde bo me lala mpongi ya ngolo. Bantangu ya nkaka, Biblia ke sadilaka ngogo mpongi sambu na kutubila lufwa. Mu mbandu, Davidi mpi Etiene, bantu yai zole ya kwikama “lalaka na lufwa.”—Bisalu 7:60; 13:36.

Kansi, nki kivuvu kele sambu na bafwa? Keti bo lenda telama diaka na mpongi yai?

^ par. 7 Sambu na kubalula ngogo ya Kiebreo “Sheole” mpi ngogo ya Kigreki “Hadesi,” Biblia—Mbalula ya Nsi-Ntoto ya Mpa ke sadilaka ngogo “Maziamu.” Kansi, Babiblia ya nkaka ke sadilaka ngogo “bilungi.” Dilongi yai ya kuniokula bantu na tiya ke vandaka ve na Biblia.

BALUFUTUMUKU NANA YINA BIBLIA KE TUBILAKA *

Mwana ya mufwidi Profete Eliya futumunaka mwana ya mufwidi mosi yina vandaka kuzinga na Sarefati, na nordi ya Izraele.—1 Bantotila 17:17-24.

Mwana mosi ya bwala Shunemi Profete Elisha yina yingaka profete Eliya, futumunaka mwana mosi ya bakala na bwala Shunemi mpi pesaka mwana yango na bibuti na yandi.—2 Bantotila 4:32-37.

Mvumbi mosi na maziamu Bo losaka mvumbi ya muntu mosi nswalu na kisika yina bo zikaka Elisha. Ntangu nitu ya muntu yango tutanaka ti mikuwa ya profete Elisha, muntu yango futumukaka.—2 Bantotila 13:20, 21.

Mwana ya mufwidi ya mbanza Naini Na nganda ya Naini, Yezu telemisaka bantu yina vandaka kukwenda kuzika mvumbi. Yandi futumunaka mwana-bakala yango mpi pesaka yandi na mama na yandi.—Luka 7:11-15.

Mwana ya Yairusi ya nkento Yairusi, ntwadisi ya sinagoga bondilaka Yezu na kubelula mwana na yandi ya nkento yina vandaka kubela. Ntangu fioti na nima ya lufwa ya mwana-nkento yai, Yezu futumunaka yandi.—Luka 8:41, 42, 49-56.

Lazare, nduku ya Yezu ya ngolo Lazare fwaka bilumbu iya na ntwala nde Yezu kufutumuna yandi na meso ya bantu mingi.—Yoane 11:38-44.

Dorkasi Ntumwa Piere futumunaka Dorkasi sambu bantu vandaka kuzola yandi mingi sambu na mambu ya mbote yina yandi vandaka kusala.—Bisalu 9:36-42.

Etike Mwana-bakala yai fwaka ntangu yandi katukaka na fenetre mpi bwaka na ntoto. Kansi, ntumwa Polo futumunaka yandi.—Bisalu 20:7-12.

^ par. 15 Lufutumuku ya kuluta mfunu kele ya Yezu Kristu sambu yo me swaswana kibeni ti balufutumuku nana ya beto me tubila. Disolo ya ke landa ta monisa yo.

Nge Lenda Sepela Mpi Ti

NZOZULU YA NKENGI

Keti Yezu Futumunaka Kibeni Bantu?

Balufutumuku yina Yezu salaka ke monisa nki sambu na balusilu na yandi ya bilumbu yina ke kwisa?

NZOZULU YA NKENGI