Biblia kele ti bambikudulu mingi. Ata muntu mosi ve lenda tuba mambu yina ta salama na bilumbu ya ke kwisa na siki-siki yonso. Yo yina, kulungana ya bambikudulu ya Biblia ke pesa banzikisa ya ke monisa nde Biblia kele Ndinga ya Nzambi.—Tanga Yozue 23:14; 2 Piere 1:20, 21.

Bambikudulu ya Biblia yina me lunganaka dezia ke pusaka beto na kukwikila na Nzambi. (Baebreo 11:1) Yo ke sadisaka beto mpi na kutula ntima nde balusilu ya Nzambi ya ke monisa nde mambu ta toma na bilumbu ya ke kwisa ta lungana. Yo yina, bambikudulu ya Biblia ke pesa beto kivuvu ya kieleka.—Tanga Nkunga 37:29; Baroma 15:4.

Bambikudulu ya nkaka ya Biblia ke siamisaka bansadi ya Nzambi na kusala mambu. Mu mbandu, ntangu Bakristu ya mvu-nkama ya ntete monaka bambikudulu ke lungana, bo basikaka na Yeruzalemi. Ntangu bo fwaka mbanza sambu bantu mingi ya Yeruzalemi buyaka Yezu, Bakristu tinaka na kisika ya nkaka.—Tanga Luka 21:20-22.

Bubu yai, bambikudulu ya me lunganaka ke monisa nde kubika fioti Kimfumu ya Nzambi ta fwa bimfumu ya bantu mpi baluyalu na bo. (Daniele 2:44; Luka 21:31) Yo yina, yo ke lomba nde konso muntu kusala mambu nswalu ntangu yai sambu Yezu Kristu, ntotila yina Nzambi me ponaka kundima yandi.—Tanga Luka 21:34-36.