Biblia ya Santu kele nsangu yina Nzambi me sonikilaka beto yonso. Beto fwete longuka yo sambu beto zaba Munkwa na yo. (Yoane 17:3; 2 Timoteo 3:16) Na kati ya Biblia, Yehowa Nzambi ke zabisaka lukanu na yandi sambu na bantu mpi sambu na ntoto yai ya bo ke zingaka.—Kuyantika 3:15; Kusonga 21:3, 4.

Mukanda ya nkaka ve ke sadisaka bantu mingi na luzingu bonso Biblia. Biblia ke sadisaka beto na kumonisa bikalulu ya Yehowa, mu mbandu, zola, kulolula, mpi mawa. Yo ke pesaka bantu kivuvu mpi yo ke sadisaka bo na kukanga ntima ata na bampasi ya ngolo kibeni. Mpi yo ke landa kumonisa pwelele mambu ya nsi ntoto yai yina ke wakana ve ti luzolo ya kukuka ya Nzambi.—Nkunga 119:105; Baebreo 4:12; 1 Yoane 2:15-17.

Na luyantiku, bo sonikaka Biblia na Kiebreo, na Kiarameye, mpi na Kigreki; bo me balulaka yo na mvimba to na ndambu na bandinga kiteso ya 2 600. Yo kele mukanda yina bo me balulaka mpi me kabulaka mingi kuluta mikanda yonso na luzingu ya bantu. Yo fwete vanda kaka mutindu yina. Mbikudulu mosi ya Biblia ke tuba nde: “Bo ta samuna nsangu yai ya mbote ya Kimfumu [nsangu ya mfunu yina kele na Biblia] na ntoto ya mvimba sambu na kuta kimbangi na makanda yonso, ebuna na nima nsuka ta kwisa.”—Matayo 24:14.

Sambu beto bakisaka mfunu ya nsangu ya Biblia, lukanu na beto vandaka ya kubasisa mbalula yina kele kaka ve ya kwikama na masonama ya kisina kansi yina kele mpi pwelele mpi mpasi ve na kutanga. Masolo yai ya kele na Bangindu ya Ngika “Minsiku ya Kubalula Biblia,” “Mambu ya Nene ya Mbalula Yai,” mpi “Mutindu Biblia Kuminaka Beto” ke tubila ndambu ya minsiku ya kubalula mikanda yina beto landaka, mpi mwa bantendula ya mambu ya nene ya mbalula yai.

Bantu yina ke zolaka Yehowa mpi ke sambilaka yandi kele na mfunu ya Ndinga ya Nzambi, yina bo me balula na mutindu ya sikisiki mpi ya bo lenda bakisa. (1 Timoteo 2:4) Yo yina, beto me basisa mbalula yai na Kikongo, na kuwakana ti lukanu na beto ya kubalula Mbalula ya Nsi-Ntoto ya Mpa na bandinga mingi. Beto kele ti kivuvu mpi beto ke samba nde, beno bantu yina ke tanga yo, beno ta baka mambote na Masonuku ya Santu ntangu beno ke sala ngolo na ‘kusosa Nzambi, mpi kumona yandi kibeni.’—Bisalu 17:27.