1 Bakorinto 2:1-16
2 Bampangi, ntangu mono kwisaka na beno, mono kwisaka ve ti kutuba+ to mayele ya ke yitukisa sambu na kuzabisa beno kinsweki+ ya santu ya Nzambi.
2 Sambu mono bakaka lukanu ya kuzaba kima mosi ve na kati na beno, katula kaka Yezu Kristu, muntu yina bo fwaka na zulu ya nti.+
3 Mpi ntangu mono kwisaka na beno, mono vandaka ngolo ve, mono vandaka na boma mpi ti matekita mingi;
4 kutuba na mono ti mambu yina mono samunaka vandaka ve ti bangogo ya mayele ya ke ndimisa, kansi bangogo na mono vandaka kumonisa ngolo ya mpeve,+
5 sambu lukwikilu na beno kuvanda ve na mayele ya bantu, kansi na ngolo ya Nzambi.
6 Ntangu yai beto ke tubila mayele na kati ya bantu yina kele ya kuyela,+ kansi ve mayele ya ngidika yai ya bima* to mayele ya bamfumu ya ngidika yai ya bima, bayina fwete fwa.+
7 Kansi beto ke tubila mayele ya Nzambi na kinsweki ya santu,+ mayele yina me bumbanaka, yina Nzambi kanaka sambu na nkembo na beto na ntwala nde ngidika ya bima kuvanda.
8 Ata mfumu mosi ve na kati ya bamfumu ya ngidika yai ya bima* me zabaka mayele yai,+ sambu kana bo zabaka yo, bo zolaka ve kufwa* Mfumu ya nkembo.
9 Kansi mutindu bo me sonikaka nde: “Disu monaka ve mpi dikutu waka ve, ntima ya muntu yindulaka mpi ve mambu yina Nzambi yidikaka sambu na bantu yina ke zolaka yandi.”+
10 Sambu, Nzambi me monisilaka beto yo+ na nzila ya mpeve na yandi,+ sambu mpeve ke fimpaka mambu yonso, ata mambu ya mudindu ya Nzambi.+
11 Sambu nani na kati ya bantu me zaba mambu ya muntu katula kaka mpeve yina kele na kati na yandi? Mutindu mosi mpi, muntu mosi ve me zabaka mambu ya Nzambi katula kaka mpeve ya Nzambi.
12 Beto me bakaka mpeve ya nsi-ntoto ve, kansi mpeve yina ke katukaka na Nzambi,+ sambu beto zaba mambu yina Nzambi me pesaka beto na luzolo yonso.
13 Beto ke tubilaka mpi mambu yai, ti bangogo yina mayele ya bantu me longaka ve,+ kansi ti bangogo yina mpeve me longaka,+ na ntangu beto ke tendulaka* mambu ya kimpeve ti bangogo ya kimpeve.
14 Kansi muntu ya kinsuni ke ndimaka* ve mambu ya mpeve ya Nzambi, sambu yo kele buzoba sambu na yandi; mpi yandi lenda zaba yo ve, sambu bo ke fimpaka yo na kimpeve.
15 Muntu ya kimpeve ke fimpaka mambu yonso,+ kansi ata muntu mosi ve ke fimpaka yandi.
16 Sambu “nani me zaba mabanza ya Yehowa,* sambu yandi longa yandi?”+ Kansi beto, beto kele ti mabanza ya Kristu.+
Banoti na nsi ya lutiti
^ To “ya nsungi yai.” Tala Bantendula ya Bangogo.
^ To “ya nsungi yai.” Tala Bantendula ya Bangogo.
^ To “kufwa na zulu ya nti.”
^ To “ke vukisaka.”
^ To “ke bakaka.”
^ Tala Bangindu ya Ngika A5.
