1 Bakorinto 7:1-40
7 Ntangu yai, sambu na mambu yina beno sonikaka, yo kele mbote nde bakala kusimba ve* nkento;
2 kansi, sambu pite* me panzana mingi, konso bakala kuvanda ti nkento na yandi mosi+ mpi konso nkento kuvanda ti bakala na yandi mosi.+
3 Bika bakala kulungisa banzala ya nkento na yandi, mpi bika nkento kusala mutindu mosi na bakala na yandi.+
4 Nkento kele ve ti kiyeka na nitu na yandi mosi, kansi bakala na yandi muntu kele ti yo; mutindu mosi, bakala kele ve ti kiyeka na nitu na yandi mosi, kansi nkento na yandi muntu kele ti yo.
5 Beno pimisana ve, katula kaka kana beno me wakana sambu na ntangu fioti, sambu beno lutisa ntangu na kisambu mpi beno vukana diaka, sambu Satana kulanda ve na kumeka beno sambu na kukonda kudiyala na beno.
6 Mono ke pesa beno nzila ya kusala mambu ya mono me tuba, kansi yo kele ve nsiku.
7 Kansi mono ke zola nde bantu yonso kuvanda bonso mono. Ata mpidina, konso muntu kele ti dikabu na yandi+ yina Nzambi me pesaka yandi, muntu mosi kele ti dikabu ya mutindu yai, muntu ya nkaka kele ti dikabu ya mutindu ya nkaka.
8 Ntangu yai, mono ke zabisa bantu yina me kwelaka ve mpi mifwidi nde, yo kele mbote nde bo bikala bonso mono.+
9 Kansi kana bo lenda kudiyala ve, bika bo kwela, sambu yo me luta mbote na kukwela na kisika ya kuzika na nzala.+
10 Na bantu yina me kwelaka, mono ke pesa bansiku, mono ve kansi Mfumu, nde nkento fwete kabwana ve ti bakala na yandi.+
11 Kansi kana yandi kabwana ti bakala na yandi, yandi kwela diaka ve to yandi wakana diaka ti bakala na yandi; mpi bakala fwete bikisa ve nkento na yandi.+
12 Kansi mono ke tubila bantu ya nkaka, ee mono ve kansi Mfumu:+ Kana mpangi mosi kele ti nkento yina ke kwikilaka ve, mpi yandi ke zola kuzinga ti yandi, yandi bikisa ve nkento yina;
13 mpi kana nkento mosi kele ti bakala yina ke kwikilaka ve, mpi yandi ke zola kuzinga ti yandi, yandi bikisa ve bakala na yandi.
14 Sambu bakala yina ke kwikilaka ve ke baka mambote na bangwisana na yandi ti nkento na yandi, mpi nkento yina ke kwikilaka ve ke baka mambote na bangwisana na yandi ti mpangi yina; kana ve, bana na beno zolaka kuvanda kukonda bunkete, kansi ntangu yai bo kele ya santu.
15 Kansi, kana nkwelani yina ke kwikilaka ve kusola na kukwenda,* bika yandi kwenda; mpangi-bakala to mpangi-nkento kele ve ya kukangama kana mambu kusalama mutindu yina, kansi Nzambi me bingaka beno na kuvanda na ngemba.+
16 Nkento, inki mutindu nge me zaba kana nge ta gulusa bakala na nge?+ To, bakala, inki mutindu nge me zaba kana nge ta gulusa nkento na nge?
17 Ata mpidina, mutindu Yehowa me pesaka konso muntu dikabu mosi, bika konso muntu kutambula mutindu Nzambi bingaka yandi.+ Yo yina mono ke pesa nsiku yai na mabundu yonso.
18 Keti ntangu bo bingaka muntu, yandi vandaka muntu ya bo me yotisaka?+ Bika yandi katula ve luyotisu na yandi. Keti ntangu bo bingaka muntu, yandi vandaka muntu ya bo me yotisaka ve? Bika bo yotisa yandi ve.+
19 Luyotisu kele ve kima ya mfunu, mpi kukonda luyotisu kele ve kima ya mfunu;+ kansi kima ya mfunu kele kuzitisa bansiku ya Nzambi.+
20 Konso muntu kubikala mutindu yandi vandaka ntangu bo bingaka yandi.+
21 Keti nge vandaka mpika ntangu bo bingaka nge? Kubika ve nde yo yangisa nge;+ kansi kana nge lenda katuka na kimpika, sadila dibaku yina.
22 Sambu konso longoki ya Mfumu yina bo bingaka ntangu yandi vandaka mpika, yandi kele muntu ya Mfumu yina me bakaka kimpwanza;+ mutindu mosi, muntu yina bo bingaka ntangu yandi vandaka na kimpwanza kele mpika ya Kristu.
23 Bo sumbaka beno na ntalu;+ beno bika kukuma bampika ya bantu.
24 Bampangi, konso muntu kubikala na ntwala ya Nzambi mutindu yandi vandaka ntangu bo bingaka yandi.
25 Ntangu yai, sambu na bamwense,* mono kele ve na nsiku ya me katuka na Mfumu, kansi mono ke pesa dibanza na mono+ bonso muntu yina Mfumu wilaka mawa sambu na kuvanda ya kwikama.
26 Yo yina, sambu na bampasi ya bilumbu yai, mono ke yindula nde yo me luta mbote nde bakala kuvanda mutindu yandi kele.
27 Keti nge kele ti nkento? Kusosa ve kubikisa yandi.+ Keti nge kele ve ti nkento? Kusosa ve nkento.
28 Kansi kana nge kwela, nge ta sala ve disumu. Mpi kana mwense kukwela, yandi me sala ve disumu. Kansi, bantu yina ke kwela ta kutana ti bampasi na nitu na bo. Kansi mono ke zola ve nde beno kutana ti bampasi yina.
29 Diaka bampangi, mambu ya mono ke tuba yo yai, ntangu ya me bikala kele fioti.+ Katuka ntangu yai, bika bantu yina me kwelaka kuvanda bonso bo me kwelaka ve,
30 bantu yina ke dila kuvanda bonso bantu yina ke dila ve, bantu yina ke wa kiese kuvanda bonso bantu yina ke wa ve kiese, bantu yina ke sumba kuvanda bonso bantu yina kele ve ti kima,
31 mpi bantu yina ke sadila nsi-ntoto kuvanda bonso bantu yina ke sadila yo ve na mambu yonso; sambu mambu ya ke salama na nsi-ntoto kele na kusoba.
32 Ya kieleka, mono ke zola nde beno kudiyangisa ve. Bakala yina me kwelaka ve ke kudiyangisaka sambu na mambu ya Mfumu, disongidila mutindu Mfumu lenda ndima yandi.
33 Kansi, bakala yina me kwelaka ke kudiyangisaka sambu na mambu ya nsi-ntoto,+ disongidila mutindu nkento na yandi lenda ndima yandi,
34 mpi yandi kele ya kukabwana. Diaka, nkento yina me kwelaka ve, mpi mwense, ke kudiyangisaka sambu na mambu ya Mfumu,+ sambu yandi vanda santu na nitu mpi na mpeve na yandi. Kansi, nkento yina me kwelaka ke kudiyangisaka sambu na mambu ya nsi-ntoto, disongidila mutindu bakala na yandi lenda ndima yandi.
35 Mono ke tuba mambu yai sambu na mambote na beno, sambu na kukanga beno ve, kansi sambu na kunata beno na mambu ya mbote mpi na kudipesa ntangu yonso na Mfumu kukonda kutula mabanza na mambu ya nkaka.
36 Kansi, kana muntu ke yindula nde yandi ke sala ve mambu ya mbote na mutindu yandi ke kwela ve,* mpi kana yandi me lutisa nsungi ya kileke, mambu fwete salama mutindu yai: Yandi sala mambu yina yandi me zola; yandi me sala disumu ve. Bika bo kwela.+
37 Kansi, kana muntu me baka lukanu na ntima na yandi mpi yandi kele ve ti kima ya ke pusa yandi, kansi yandi kele ti kiyeka na zulu ya luzolo na yandi mpi yandi me baka lukanu na ntima na yandi nde yandi ta kwela ve,* yandi ta sala mbote.+
38 Yo yina muntu yina me makwela* me sala mbote, kansi muntu yina me kwela ve ta sala mbote kuluta.+
39 Nkento kele ya kukangama na bakala na yandi ntangu yonso yina bakala na yandi kele na luzingu.+ Kansi, kana bakala na yandi me fwa,* yandi kele na kimpwanza ya kukwela konso bakala yina yandi me zola, kaka na Mfumu.+
40 Kansi na mabanza na mono, yandi ta vanda na kiese mingi kana yandi bikala mutindu yandi kele; ya kieleka, mono ke yindula nde mono mpi kele ti mpeve ya Nzambi.
Banoti na nsi ya lutiti
^ Disongidila, kuvukisa ve nitu ti.
^ Tala Bantendula ya Bangogo.
^ To “kukabwana.”
^ To “bantu yina me kwelaka ntete ve.”
^ To “sambu na kimwense na yandi.”
^ To “ta bikala mwense.”
^ To “me pesa kimwense na yandi na makwela.”
^ Na kisina, “me lala na lufwa.”
