1 Bansangu 10:1-14
-
Lufwa ya Saule ti bana na yandi (1-14)
10 Bantu ya Filistia vandaka kunwana ti Izraele. Ebuna bantu ya Izraele tinaka na ntwala ya bantu ya Filistia; bantu mingi bwaka mpi fwaka na Ngumba ya Gilboa.+
2 Bantu ya Filistia vandaka kaka kupusana pene-pene ya Saule mpi ya bana na yandi, ebuna bantu ya Filistia fwaka Yonatani, Abinadabi, mpi Malki-shua,+ bana ya Saule.
3 Bitumba kumaka ngolo sambu na Saule, mpi bantu ya ke sadilaka munduki ya tolo-tolo monaka yandi, mpi bo lwadisaka yandi.+
4 Ebuna Saule tubilaka muntu yina ke natilaka yandi binwaninu nde: “Basisa mbele na nge ya bitumba mpi tobula mono ti yo, sambu bantu yai ya kukonda kuyotisa kukwisa ve kusadila mono mambu kukonda mawa.”*+ Kansi muntu yina buyaka, sambu yandi vandaka na boma mingi kibeni. Yo yina Saule bakaka mbele ya bitumba mpi bwaka na zulu na yo.+
5 Ntangu muntu yina ke natilaka yandi binwaninu monaka nde Saule me fwa, yandi mpi bwaka na zulu ya mbele na yandi ya bitumba mpi fwaka.
6 Na mutindu yina, Saule ti bana na yandi tatu fwaka, mpi bantu yonso ya nzo na yandi fwaka bo yonso.+
7 Ntangu bantu yonso ya Izraele yina vandaka na muwanda* monaka nde bantu yonso me tina mpi nde Saule ti bana na yandi me fwa, bo yantikaka kubikisa bambanza na bo mpi kutina; ebuna bantu ya Filistia kwisaka mpi kumaka kuzinga kuna.
8 Kilumbu yina landaka, ntangu bantu ya Filistia kwisaka sambu na kuyiba bima ya bamvumbi, bo monaka mvumbi ya Saule ti ya bana na yandi me lala na Ngumba ya Gilboa.+
9 Yo yina bo yibaka bima na yandi, bo zengaka yandi ntu, mpi bo bakaka binwaninu na yandi, ebuna bo tindaka ndinga na ntoto ya mvimba ya bantu ya Filistia sambu na kupanza nsangu yina na biteki na bo+ mpi na bantu na bo.
10 Na nima bo tulaka binwaninu na yandi na nzo* ya nzambi na bo mpi bo kangisaka mukwa ya ntu na yandi na nzo ya Dagoni.+
11 Ntangu bantu yonso ya Yabeshi+ na Gileadi waka mambu yonso yina bantu ya Filistia salaka Saule,+
12 basoda yonso telamaka, mpi bo kwendaka kubaka mvumbi ya Saule mpi bamvumbi ya bana na yandi. Bo nataka bo na Yabeshi mpi bo zikaka mikwa na bo na nsi ya nti ya nene na Yabeshi,+ ebuna bo buyaka madia bilumbu nsambwadi.
13 Na mutindu yina, Saule fwaka sambu na kukonda kwikama yina yandi monisaka na ntwala ya Yehowa sambu yandi lemfukaka ve na ndinga ya Yehowa,+ mpi sambu yandi kwendaka kuyula mambu na muntu yina ke solulaka ti bampeve ya bafwa+
14 na kisika ya kuyula Yehowa. Yo yina yandi fwaka yandi mpi pesaka kimfumu na Davidi mwana ya Yese.+
